Дони ван де Бек, донесен како големо засилување за 40 милиони фунти, не успеа да се избори за своето место во тимот на Манчестер јунајтед. Јасна е желбата на Холанѓанецот да замине од „Олд Трафорд“. На негова адреса стигнале две понуди, за трансфер во зимскиот преоден рок.

Ван де Бек би го напуштил Манчестер јунајтед, не и Премиер лигата. Понуди за фудбалерот испратиле Евертон и Њукасл јунајтед.

Англиските медиуми, тврдат дека Јунајтед нема да го продадат фудбалерот, туку би го позајмиле во еден од овие два клуба.

Директорот на Евертон, Марсел Брандс, открил дека минатото лето, клубот имал шанса да го ангажира Ван де Бек. Преговорите за позајмица оделе добро, но од непознати причини за Евертон, пропаднале во последен момент.

Ерик Ботхајм, синоќа, беше режисерот на најтешкиот пораз што го доживеал Жозе Мурињо во тренерската кариера. Во Конференциската лига, Бодо Глимт ја победи Рома со 6:1. Ботхајм, постигна два гола и забележа три асистенции.

Ботхајм е талентиран 21-годишен фудбалер, добар пријател со најпопуларниот норвешки фудбалер, Ерлиг Халанд. Заедно настапувале во младинските селекции на Норвешка. Кога не играле фудбал, овие двајца заедно со уште еден пријател-фудбалер, Ерик Тобијас Сандберг, рапувале во групата „Флоу Кингс“.

Како тинејџери, снимале бизарни песни, правеле и видео спотови за песните.

Кога Халанд стана славен, како еден од најдобрите напаѓали во светот, порасна и популарноста на бендот. Еден од нивните спотови на каналот „Ју-тјуб“ има преку осум милиони прегледи.



Тренерот на Реал Мадрид, Карло Анчелоти, во пресрет на Ел Класико, со пофални зборови ја оценил работата на колегата Роналд Куман.

„Тој е добар тренер. Работев во Евертон, каде претходно беше и Куман, сите имаа само убави зборови за него“, рекол Анчелоти и дополнил.

„Искрено, не го познавам добро, но тој позитивно делува на своите екипи. Исто може да се каже и за неговата работа во Барселона. Мислам дека не е лесно да бидеш тренер на Барселона. Клубот е во фаза на реконструкција…Тој добро го прави тоа“.

Ел Класико ќе се одигра во недела, на „Ноу Камп“. Барселона во дербито влегува од седмото место со 15 бодови, Реал има два бода повеќе и го дели второто место на табелата.