Спорт
„Само еден европски тим може да им парира на Бразил и Аргентина“
Прославениот италијански голман Џанлуиџи Буфон ја даде својата прогноза за Светското првенство во Катар, кое започнува во недела на 20. ноември. Италија со која Буфон во 2006 година ја освои светската титула, повторно ќе ја пропушти планетарната смотра. Азурите не учествува и на Мундијалот во Русија.
„Како навивач, секако дека сум тажен, но тоа е уште полошо за играчите. Го поминав тоа во 2018 година, кога почнува Светското првенство, а вие седите дома. Тешко е да се прифати дека сте одговорни за нешто што му беше одземено на италијанскиот народ“, рече Буфон, кој последен пат настапи за репрезентацијата во 2017 година.
Иако во Катар ја нема Италија, и него го тресе еуфоријата пред почетокот на првенството.
„Светското првенство е натпреварување каде што ако не успеете, се чувствувате опкружени од сите страни. Но, ако го достигнете врвот, како ние во 2006 година, тоа е екстаза која трае со месеци. Тоа е прекрасно чувство, бидејќи сфаќате дека сте директно одговорен за среќата на голем број луѓе, што е најубавото нешто на светот“.
Тој ги издвои фаворитите на Мундијалот во Катар.
„Аргентина или Бразил. На индивидуален план, Франција ми се чини дека е единствената европска репрезентација која може да им парира, но навистина не знам какви се тие како тим. А можеби и Белгија, бидејќи ми се допаѓа како брани Куртоа“, заклучи Буфон.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Спорт
Бекеле по 12 години повторно на Олимписките игри
Кенениса Бекеле, големата атлетска ѕвезда, ќе учествува на Олимписките игри во Париз, 12 години по неговиот последен настап на најголемиот светски спортски настан.
Бекеле, кој има 41 година, последен пат настапи на Олимписките игри во Лондон во 2012 година, кога заврши на четвртото место на трката на 10 километри.
Тој ги пропушти Рио де Жанеиро (2016) и Токио (2022) и сега е дел од 10-члениот атлетски тим на Етиопија за Париз.
Во главниот град на Франција ќе трча маратон на кој во последно време бележи одлични резултати. Тој во декември го освои четвртото место во Валенсија, додека неодамна беше втор во Лондон.
Бекеле освои три олимписки злата и едно сребро. Во Атина во 2004 година победи на 10 километри и беше втор на 5 километри, додека четири години подоцна во Пекинг славеше и на 5 и на 10 километри.
Олимпискиот маратон за мажи е закажан за 10 август.
Спорт
(Видео) Индијана избори мајсторка против Њујорк
Кошаркарите на Индијана славеа против Њујорк (116:103) и со тоа го обезбедија мајсторка во „Медисон Сквер Гарден“.
Екипите продолжија да го бранат домашниот терен, па така и во шестиот меч од полуфиналната серија на Истокот, гостинот загуби.
Најзаслужни за триумфот на Индијана беа Паскал Сијакам со 25 поени, седум скока и пет асистенции и Мајлс Тарнер со 17 поени, осум скока и три асистенции.
Тајрис Халибартон (+9ас), Ти Џеј Меконел и Ендру Небхард постигнаа по 15.
На другата страна се истакнаа Џејлен Брансон кој постигна 31 и Донте ДиВинченцо кој постигна 17 поени.
Првото двоцифрено водство „Пејсерс“ го остварија на крајот од првото полувреме и со исклучок на почетокот на вториот дел не го испуштија.
Разликата во последната четвртина се искачи на +23.
Решавачкиот седми натпревар е закажан за в недела од 21.30 часот во Њујорк.
Победникот, во финалето ќе игра против Бостон Селтикс, кој ги елиминираше Кливленд Кавалирс.
Спорт
Палмер најдобар млад играч во Премиер лигата
Фудбалерот на Челзи Кол Палмер е најдобриот млад играч во Премиер лигата оваа сезона.
Палмер, кој летово пристигна во Челси од Манчестер сити, постигна 22 гола на 33 натпревари и забележа десет асистенции.
Тој е водечка сила на сините оваа сезона, а на последните три натпревари постигна по два гола.
Тој победи во конкуренција на Александер Исак (Њукасл), Коби Мајно (Манчестер јунајтед), Букајо Сака и Вилијам Салиба (Арсенал) и Дестини Удоги (Тотенхем).
Траката за Златната копачка во Премиер лигата, Палмер ќе ја заврши на второто место зад Ерлинг Халанд од Манчестер сити, кој постигна 27 гола.
И не само тоа, 22-годишниот Палмер е номиниран и за најомилен играч на гласањето на навивачите во Премиер лигата.
Офанзивниот играч за врска на Челзи неодамна беше прогласен и за играч на месец април во Премиер лигата, откако постигна седум гола на четири натпревари.
Треба да се додаде дека тој со огромно мнозинство ја освои наградата за најдобар играч на Челзи оваа сезона.