Прашање е дали тренерот на Барселона, Кике Сетиен по денешниот кошмарен ден за сите навивачи за каталонскиот клуб (пораз на Барса со 8-2 од Баерн) утрото ќе го дочека како предводник на Барса. Тој вечерва по мечот призна дека Баерн заслужил да победи.

„Ова е навистина болен пораз. Мислам дека е изразен со преголема разлика, иако тие заслужија да ги постигнат најголемиот дел од головите. Не надиграа целосно во одредени моменти, а тие беа многу ефикасни. Имавме добар почеток, но тие покажаа дека поседуваат квалитет. Во моментов не би сакал да коментирам повеќе, јасно е дека постои голема фрустрација по ваквата елиминација, па сега ни останува да извлечеме заклучоци и да донесеме одлуки. Барса е навистина голем клуб и ваквите порази болат“ рече Кике Сетиен по поразот.

Баерн Минхен го прегази вицешампионот во Шпанија сезонава – Барселона, а веднаш по последниот судиски свиреж, Каталонците „почнаа да пукаат по рабовите“.

Одбраната на екипата беше катастрофална на овој меч, предводена од Жерар Пике (33). Стоперот по овој пораз најави заминување од клубот од „Ноу Камп“, по цели 14 сезони.

„Срамота, ништо друго не можам да речам. Ова не е првпат или вторпат. На овој клуб му требаат секакви промени, го допревме дното. Ако морам да си одам за да дојде млада крв, ќе си одам. Во Европа не сме компетитивни, а веќе не ни оди ниту во лигата. Овој неуспех не може да се маскира со ништо“ – рече разочараниот Пике.

Тој денеска го одигра 542-от меч за Барса, а има постигнато 47 голови.

Пораз и понижување за историја вечерва и се случи на Барселона, екипата која цела сезона во Лигата на шампиони немаше пораз.

Баерн Минхен – Барселона 8-2 стоеше на семафорот на стадионот „Луж“ во Лисабон, Португалија, по четвртфиналниот двобој на двата фудбалски гиганти.

Меси, Суарез и другарите со наведнати глави го напуштија тревникот по невидениот срам што им се случи вечерва.

Во двете полувремиња Баварците славеа со резултат 4-1. Баварците до врв ја наполнија мрежата на Германецот Тер Штеген додека тренерот Кике Сетиен немо седеше на клупата гледајќи го срамното издание на својата екипа.

Баерн поведе со 1-0 уште во 4 минута, стрелец беше Томас Милер.

Само 3 минути подоцна веќе беше 1-1, автогол на дефанзивецот на минхенскиот клуб, Давид Алаба.

На новото водство сна Баварците се чекаше до 22 минута, Хрватот Перишиќ постигна погодок за 2-1.

Во 28 минута на семафорот веќе стоеше 3-1 во корист на Баерн. Стрелец Габри.

Уште не беа соземени од шокот, а фудбалерите на Барселона и по четврти пат ја вадеа топката од својата мрежа. Стрелец на четвртиот погодок за Баерн беше Томас Милер, по вторпат.

4-1 беше резултат на полувремето.

Во вториот дел Суарез прв се запиша во листатата на стрелци, во 57 минута. Намали на 4-2 и донесе надеж, која сепак, траеше само 6 минути.

Кимих во 63 минута по одличниот продор на Кимих пак ги носи Баварците на +3, 5-2 е.

Тука веќе застана машината на Сетиен, Меси и Суарез заедно со останатите се изгубија на теренот и до крајот дозволија понижувањето да биде комплетно.

Последните 3 гола за Баерн беа дело на Левандовски, во 82 минута со глава, на асистенција на нвовлезениот Кутињо, кој е играч на Барса, што е на позајмица во минхенскиот клуб.

Поразот да пече уште повеќе, се погрижи токму нивниот, Кутињо, ги постигна последните 2 гола за конечни 8-2 на „Луж“.

Баерн го чека полуфинален дуел со подобриот од мечот Манчестер Сити – Лион, а Управата на Барселона ќе треба да размисли кој се може да биде дел од овој голем клуб.