Капитенот на Арсенал, Пјер-Емерик Обамејанг, откри дека боледува од маларија, откако не беше дел од тимот на „топчиите“ за мечот од четврт-финалето на Лига Европа против Славија Прага.

Обамејанг го пропушти и мечот со Шефилд јунајтед во текот на викендот, по што 31-годишниот Габонец откри дека заболел додека бил на интернационалната пауза со својата репрезентација.

„Момци, благодарам за сите пораки и повици. За жал, добив маларија додека играв за репрезентацијата на Габон пред неколку недели. Неколку дена сум во болница, но се чувствувам подобро благодарение на докторите кои бргу интервенираа. Не се чувствував најдобро последните неделни, но ветувам дека ќе се вратам уште посилен. Сега ги гледам моите момци. Ајде Арсенал!“, напиша Обамејанг со фотографија од болничкиот кревет.

Обамејанг досега има пропуштено седум натпревари на Арсенал оваа сезона, и речиси сигурно нема да игра на следните два натпревари од Премиер лигата против Фулам и Евертон. Тој има 14 гола во 33 меча оваа сезона.

 

View this post on Instagram

 

A post shared by Aubameyang Pierre-Emerick (@auba)

Барселона и Реал Мадрид се заинтересирани за Ерлинг Халанд, како и неколку премиерлигаши, но никој од нив не е подготвен да ја исполни желбата на Норвежанецот и неговиот агент Мино Рајола за годишна плата од 35 милиони евра.

Околу 20-годишниот напаѓач на Борусија Дортмунд многу се пишуваше оваа сезона, а Рајола заедно со неговиот татко, Алф-Инге, беа на преговори со Барселона и Реал Мадрид, каде што се зборувало за можен трансфер. Во Мадрид, тие разговарале со генералниот директор Хозе Анхел Санчез, а во Барселона со претседателот Жоан Лапорта, но по крајот на овие разговори не е планиран приод од двата клуба, ниту понуда за големи суми.

Според порталот „Гол“, еден англиски премиерлигаш пред неколку месеци почнал преговори со луѓето на Халанд, но веднаш се откажал по дознавањето на астрономската сума. Реал и Барса, исто така се свесни дека во сегашната економска ситуација без навивачи на трибините, ваков потег е едноставно невозможен. Оттаму тие очекуваат значително намалување на барањата за да се реализира трансфер, посебно бидејќи ќе мора да им се плати и висока сума на Борусија Дортмунд.

И во Дортмунд се смирени, првично бидејќи имаат договор со Халанд до 2024, кој вклучува и клаузула за прекин во 2022 со отштета од 75 милиони евра. Тие се сигурни дека нема да го продадат Халанд дури и да не обезбедат место во ЛШ и единствено што може да ги премисли е понуда до 150 милиони евра, која исто така е тешко дека ќе пристигне. Борусија смета дека со преговорите со Џејдон Санчо минатото лето, кога Манчестер јунајтед неколку пати се обиде да стигне до договор, покажале дека нема да ги даваат своите таленти на „попуст“.

Светската автомобилистичка федерација (ФИА) пред втората трка од Ф1 шампионатот, Емилија-Ромања ГП во Имола објави „објаснувања“ за придржување на границите на патеката по контроверзите во Бахреин, каде што Луис Хамилтон и Мерцедес повеќе пати излегуваа надвор од патеката за да добијат предност.

Хамилтон излегуваше надвор од патеката барем 29 пати, пред стјуардите во Бахреин да дадат наредба за придржување на границите на патеката по половина трка. Контроверзите не завршија тука, откако Макс Ферстапен во Ред бул го помина Хамилтон на истата кривина, пред да му биде наредено да ја вратат позицијата.

ФИА затоа објави детални правила за границите на патеката, со кои ако возач излезе надвор од границите три пати, ќе добие црно и бело знаме (неофицијален жолт картон во Ф1), а потоа за секој нареден прекршок стјуардите ќе одлучуваат за казната. Кривините кои ќе се надгледуваат во Имола се 9-тата, 13-тата и 15-тата, иако нема обврска на последната кривина, каде што минатата година речиси сите возачи излегуваа целосно надвор од патеката.