Спорт
Сестрата на Роналдо велеше КОВИД е измама, заглави во болница со пневмонија
Катја Авеиро, сестрата на португалската фудбалска легенда Кристијано Роналдо е хоспитализирана со пневмонија откако доби КОВИД-19, иако претходно ја нарекуваше болеста „најголемата измама на светот“.
Авеиро преку Инстаграм потврди дека била позитивна на 17 јули и дека се опоравувала во изолација, пред состојбата да и се влоши и да биде однесена во болница со пневмонија.
„Не сакав да се јавувам со вакви вести, но во знак на почит за тие кои се грижат ќе ја споделам вистината. Ме фати проклетиот вирус. Бев во изолација и бев добро со малку симптоми, и за среќа мојата мајка не беше тука. Благодарам на луѓето во болницата во Фуншал, но ќе продолжам со истите мисли и верувања. Нема да ме сруши вирус поставен од алчноста на оовј свет, иако иронично тој дојде во мојот свет“, напиша Авеиро.
43-годишната Авеиро, со полно име Лилијана Катја Переира Сантош Авеиро, претходно беше пејачка под името „Роналда“. И нејзиниот брат претходно беше позитивен на КОВИД, но немаше симптоми.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Спорт
Робињо: Расистичка Италија ме осуди за силување
Робињо (40) е осуден во Италија на девет години затвор за групно силување на девојка која го прославувала својот 23 роденден во ноќен клуб во Милано во 2013 година. Тогаш беше напаѓач на Милан и бразилската репрезентација.
Бразилскиот суд му забрани да го напушти Бразил додека не одлучи дали може да ја отслужи деветгодишната казна за силување, изречена од италијанскиот суд, во неговата татковина.
Трофејниот напаѓач, поранешен фудбалер на Сантос, Реал Мадрид, Манчестер Сити и Милан, тврди дека е невин и дека целиот процес би изгледал поинаку доколку бојата на неговата кожа била поинаква. Одлуката дали ќе мора да оди во затвор треба да биде донесена во среда.
„Во Италија неправедно ме обвинуваат за нешто што не сум го направил и имам се што ми треба за да го докажам тоа. Играв во Италија четири години и уморен сум од расизмот. Не се сомневам дека процесот против мене ќе биде поинаку ако бев белец“, рече тој.
Минатата година бразилскиот портал „УОЛ“, објави аудио снимки од 2014 година на кои Робињо разговара со пријателите за силувањето на девојката.
„Ќе ја удриме по лице. Ќе ја удриш и ќе кажеш: „Што ти направив?“, рекол Робињо, што може да се слушне на видеото. Бразилецот тврди дека не учествувал во силувањето.
Во видеото, Робињо раскажува како го напуштил ноќниот клуб откако имал секс со девојката, додека неговите пријатели останале со неа. Тој бил загрижен што ќе се случи со него доколку инцидентот излезе во јавноста.
„Ако ова заврши во медиумите, ќе бидам уништен“, вели Робињо во видеото, пренесуваат бразилските медиуми. Во друг момент вели: „Таа беше пијана, не знае ни кој сум јас, ништо нема да се случи“.
Робињо поднесе жалба до неколку судови, но италијанскиот Врховен суд ја потврди деветгодишната казна, по што италијанските обвинители распишаа меѓународна потерница. Но, Бразил не ги екстрадира своите граѓани, па Италија побара Робињо да ја отслужи казната во Бразил.
Спорт
Алегри го напушта Јувентус на крајот од сезоната
Масимилијано Алегри ќе го напушти Јувентус на крајот од сезоната, тврдат неколку италијански медиуми. Според овие извори, Алегри ќе го напушти клубот пред истекот на договорот. Тренерот има договор со Јувентус до јуни 2025 година.
„Тутоспорт“ и „Газета дело Спорт“, објавија дека ниту Јувентус сака да му понуди нов договор, ниту Алегри сака да остане во клубот. Според овие извори проблем нема да биде ниту оштетата која треба да ја добие Алегри за предвремен раскин на договорот.
Тренерот има годишна плата од седум милиони евра, но според медиумите двете страни ќе договорат раскин на договорот за помала сума.
Јувентус, пред еден месец беше легитимен кандидат за шампионската титула, но во последните осум натпревари забележа само една победа и на табелата падна на третото место.
Спорт
Атлетико и ништо друго – Коке ќе потпише нов договор
Хорхе Ресуресион Меродио, во светот на фудбалот познат како Коке, ќе потпише нов договор со Атлетико Мадрид. Коке е продукт на фудбалската акедемија на „јорганџиите“, а за првиот тим настапува од 2011 година. Ова е само уште еден доказ за љубовта на 32-годишникот кон клубот, што во денешниот фудбал е вистинска реткост.
Атлетико и Коке ќе ја искористат репрезентативната пауза за да потпишат нов договор. Допарва ќе решат дали Коке ќе потпише на една или две сезони. Желбата на фудбалерот е да добие нов двегодишен договор.
Коке е апсолутен рекордер според бројот на одигран натпревари за Атлетико. Досега во кариерата дресот на „јорганџиите“ го носел на 625 натпревари. За Шпанија има одиграно 70 натпревари.