Помина една недела откако Флорентино Перез, на традиционалниот божикен ручек, посвети речиси половина од својот говор на темата на судењето, првенствено на случајот „Негреира“ и конкретните одлуки кои, според него, му наштетиле на Реал Мадрид во тековната сезона.

Два дена потоа, првиот човек на Барселона, Џоан Лапорта, одговори и го нападна Реал со коментар за „акутен барселонитис“ со кој Реал ги оправдува своите лоши резултати.

По отровните стрели од двете страни, во интервју за каталонски „Спорт“, се огласи првиот човек на Ла Лига, Хавиер Тебас, личност која од различни причини, не ја „мирисаат“ ниту во Мадрид, ниту во Барселона.

Тебас смета дека Реал Мадрид е тој што непотребно ја збунува ситуацијата и ги зголемува тензиите.

„Тензиите во овој случај не се генерирани од Барселона. Ниту пак од другите клубови. Реал Мадрид е тој што е против сè… Против Барселона, против судиите, против сите. Мислам дека она што го прават е погрешно, дека не го избрале вистинскиот пат. Нивниот наратив не му помага на никого. А наративот е дека она што се случува денес, со одредени грешки од страна на судиите, е последица и вина на она што се случи во 2019 или 2017 година. Тие се обидуваат да создадат наратив дека судиите моментално се под некакво влијание. Тоа е многу опасно затоа што не е вистина“, рече Тебас и продолжи:

„Тие го создадоа тој наратив, а тоа создава тензии. Сите веќе го знаат моето размислување за случајот Негреира. Не велам дека потезите на Барселона во тоа време, односно луѓето на директорските позиции, во тој случај се исправни. Ние бевме првите што отидовме во канцеларијата на јавниот обвинител, првите што рековме дека мора да се спроведе истрага и дека дури, доколку е потребно, треба да се воведат санкции на спортската арена. Но денес да кажете дека недосуден пенал за Реал е последица на тоа, тоа е огромна разлика. Ова генерира тензии цел викенд преку клупската телевизија на Реал Мадрид, преку претседателот на Реал Мадрид пред некој ден… Мислам дека целосно го изгубија контактот со реалноста“.

Foto/ depositphotos

Актуелниот МВП во НБА лигата, Шеј Гилџес-Александер ја обележа изминатата ноќ во НБА лигата. Оклахома го победи Мемфис со 119:103, Шеј натпреварот го заврши со 31 поен.

Гилџес-Александер стана само вториот играч во историјата на НБА кој постигнал 20 или повеќе поени во 100 последователни натпревари.

Тој го заврши натпреварот со 31 поен и покажа зошто се смета за најдобар стрелец во лигата во изминатите неколку години. Единствениот човек кој успеал во овој потфат досега беше легендарниот центар Вилт Чемберлен.

Гилџес-Александер има просек од 32 поени по натпревар оваа сезона, додека бранителот на титулата Оклахома е најдобриот тим во лигата со резултат од 26-3.

Во другите натпревари, Детроит го победи Портланд со 110:102 на гости, додека Голден Стејт го победи Орландо со 120:97 како домаќин. Кливленд ја заврши серијата лоши резултати со победа против Шарлот со 139:132, а Бостон беше подобар од Индијана со 103:95. Њу Орлеанс Пеликанс го победија Далас со 119:113.

Денвер Нагетс убедливо ги победија Јута Џез со 135:112 во НБА, а Никола Јокиќ стигна до својот 14-ти трипл-дабл во сезоната, 178-ми во неговата кариера.

Никола Јокиќ за помалку од две и пол четвртини го оствари овој потфат, кога му асистираше на Пејтон Вотсон седум минути пред крајот на третиот период. Тој го заврши натпреварот со 14 поени (5 од 7 шутеви од поле), 13 скока и 13 асистенции за помалку од 29 минути.

Му недостасуваат четири натпревари за двоцифрен учинок во три статистички категории за да го надмине Оскар Робертсон, кој ја заврши кариерата со 181 трипл-дабл, за второто место на вечната листа.

Натпреварот во Колорадо беше практично решен во првите минути. Денвер поведе со 19:0 и од тој момент немаше дилеми околу конечниот победник. Во ниту еден момент Јута не успеа да се приближи на помалку од 17 поени негатива.

Интересно е што Јокиќ беше шестиот стрелец на Нагетс во овој натпревар. Мареј беше најефикасен со 27 поени, Тим Хардавеј Џуниор имаше 21, Вотсон и Кем Џонсон имаа 20, а Браун го заврши натпреварот со 15 поени. Ова беше 21 победа за Денвер со седум порази.

За Јута, Лаури Марканен имаше 27 поени, додека Кејонте Џорџ имаше 20 поени. Јусуф Нуркиќ, постигна 17 поени со 14 скока.

Foto/ freerangestock