Спорт
Шпанија и пукна „петарда“ на Словачка – Полска елиминирана од ЕУРО2020
Фудбалската репрезентација на Шпанија конечно победи на ЕУРО2020. Во мечот од третото коло од групата Е избраниците на Луис Енрике со високи 5:0 ја поразија селекцијата на Словачка кој ги собра симпатиите на фудбалскиот свет во воведниот триум на првенството против Полска.
Уште во 12 минута Алваро Мората имаше можност да ја донесе својата селекција во предност. Шпанија доби пенал откако Коке беше соборен во шеснаесетникот. Мората биеше десно високо, но голманот Дубравка му го одбрани ударот.
Шпанија ја имаше иницијативата во првиот дел, а во 30. минута дојдоа во водство на неочекуван начин. Сарабија биеше во пречката од голот на Словачка, но топката која се спушташе пред голот на Дубравка, голманот несмасно ја смести во сопствената мрежа.
Словачка беше разнишана, а ги „дотолчи“ Емерик Лапорт со неговиот гол со глава во 45+2 за 2:0 за „Фуријата“ на полувремето.
Во вториот дел комплетно се распадна играта на Словаците, па најпрво Сарабија во 56 минута погоди за 3-0.
Четвртиот гол во мрежата на Дубравка беше дело на Феран Торес кој погоди по само неколку секунди откако влезе во игра, во 67 минута.
Точка на мечот и конечни 5-0 за Шпанија со автоголот на Куцка, во 71 минута.
На мечот во Русија од истата група, Емил Форсберг уште по 81 секунда донесе предност за „трите круни“ на мечот против Полска.
Иако наликуваше дека брзо ќе биде решен победникот во Санкт Петербург, посебно по вториот гол за Форсберг во 59 минута, сепак Роберт Левандовски не мислеше така.
Најпрво по многуте промашувања погоди конечно во 61 минута за 1-2, а донесе и израмнување 2-2 во 84 минута.
Последните минути од мечот Полска тргна со сите сите по победата која ќе им донесеше пласман во осминафиналето, но петтиот гол на мечот заврши во мрежата на Шчесни. Класон во 94 минута погоди за 3-2 за прво место за Шведска со 7 бода во групата Е. Тие одат на Швајцарија, Чешка или Украина во Глазгов.
Шпанија ја заврши групата како второпласирана со 5 бода и во осминафиналето „Фуријата“ оди на Хрватска во Копенхаген.
Заврши ЕП за Словачка и Полска.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Спорт
(Видео) Сити за полувреме го реши Брајтон
Фудбалерите на Манчестер Сити убедливo славеа на гостувањето кај Брајтон со 4:0 (3:0) во натпревар од 29. коло на англиската Премиер лига.
Актуелните шампиони сите дилеми околу победникот ги решија во првото полувреме и тоа во интервал од 17 минути кога постигнаа три гола.
Кевин де Брујне го постигна првиот гол во кариерата со глава во 17. минута, по центаршутот на Кајл Вокер.
Потоа два гола постигна Фил Фоден во 26. и 34. минута, првиот од слободен удар со малку среќа, а вториот по груба грешка на одбраната на домаќините.
Хулијан Алварез во 62. минута ги постави конечните 4:0.
Избраниците на Пеп Гвардиола се втори на табелата, го прескокнаа Ливерпул, а имаа бод и натпревар помалку од лидерот Арсенал.
Спорт
(Видео) Димитријевиќ МВП на ВТБ лигата
Кошаркарот на Уникс, Ненад Димитријевиќ е прогласен за најкорисен играч на регуларниот дел сезоната на руската ВТБ лига.
Уникс прв заврши во лигата, првпат во историјата, а Македонецот беше еден од најзаслужните за ваков успех.
Сезонава Димитријевиќ имаше просек од 19 поени по натпревар со 6,6 асистенции, 3,6 скока и 1,3 украдени топки.
Во минатогодишното финале на ВТБ лигата неговиот тим ја совлада Локомотива (4:1), а Димитиријевиќ беше прогласен за МВП на финалната серија.
Сезонава во решавачкиот меч за првото место во регуларниот дел против ЦСКА Москва забележа рекордни 40 поени со девет асистенции.
„За мене е голема чест да ја добијам наградата МВП за регуларниот дел од сезоната на ВТБ лигата 2023/24“, изјави Димитријевиќ и додаде:
„Оваа година победивме во многу возбудливи натпревари и славевме во регуларниот дел од сезоната. Мислам дека ова е резултат на напорната работа на целиот тим. Би сакал да им се заблагодарам на ВТБ лигата, на мојот тим Уникс, на стручниот штаб на чело од Велимир Перасовиќ, медицинскиот штаб и нашите верни навивачи. Најголема благодарност до моите соиграчи, кои ми помогнаа да станам подобар играч.“
Спорт
Адријан Њуи ќе го напушти Ред Бул
Главниот директор за дизајн на Ред Бул, Адријан Њуи, треба да го напушти тимот по контроверзата, која вклучува обвинувања против шефот на тимот Кристијан Хорнер.
Њуи, кој важи за најдобар дизајнер во историјата на Формула 1, одлуката да го напушти тимот им ја сооптшил челниците на Ред Бул, објави денеска Би-би-си.
Адријан Њуи е вознемирен од ситуацијата во Ред Бул, откако Хорнер беше обвинет за сексуално вознемирување и насилно однесување кон колешка. Хорнер ги негираше обвинувањата, а тимот по спроведена интерна истрага ги отфрли обвинувањата против Хорнер и жената ја суспендираше од работа.
Тој има договор со Ред Бул до крајот на следната сезона, а претходно беше поврзуван со преселба во Ферари.