Легендата на хрватскиот и на југословенскиот фудбал, Роберт Просинечки вели дека најавениот потенцијален дуел помеѓу Црвена звезда и Динамо Загреб во плејофот за квалификациите за влез во Лигата на шампионите не е сигурен и не сакаше да зборува многу за политичката димензија на овој дуел.

Просинечки е дел од историјата на двата клуба, откако ја почна кариерата во Динамо и играше таму во 1990-тите кога тимот се викаше Кроација, а исто така беше дел од славната генерација на Звезда која ја освои Лигата на шампионите.

Звезда прво мора да го помине Шериф од Тираспол, Молдавија, додека Динамо ќе има потешка задача со полскиот Легија Варшава.

„Не сме подготвени за такви натпревари, за жал на сите тоа им е јасно. Што, сега јас треба да кажувам кој е подобар и кој ќе помине. Засега можам да кажам дека Легија и Шериф се сериозни пречки, кои прво ќе се прескокнат. Искрено, јас најмногу би сакал да се трнгам од тоа. Да, тоа е мојот живот, важен дел од него, но не и најважниот. Затоа немам намера многу да зборувам за тој меч“, изјави Просинечки за „Спортклуб“.

Капитенот на Јувентус и на шампионската италијанска репрезентација, Џорџо Кјелини, конечно, стави потпис на двегодишно продолжување на договорот со „бјанконерите“, по што ја искажа својата животна филозофија: „Живеј во моментот!“.

Кјелини беше слободен агент од 30 јуни, и покрај тоа што ја предводеше Италија до европската титула, но сега со продолжението значи дека по крајот на договорот ќе помине неверојатни 19 години во својот клуб.

„Подобро да не размислувам за тие бројки, бидејќи ме прават да се чувствувам уште постар. Среќен сум, иако ова беше само формалност, има некои чекори во животот кои се многу важни. Пристигнав тука како момче, а сега сум дел од семејството, зрела личност која ужива во секој момент од овие последни активни години. Се надевам дека ќе му помогнам на тимот да освои нови титули, што секогаш е најважно во Јувентус. Мојот однос со клубот е над сите работи. Немав сомнеж дека ќе останам тука. Живеј во моментов, па ќе видиме што ќе се случи“, изјави Кјелини.

🗣 «Un passaggio importante della mia vita. Sono arrivato che ero un ragazzo, adesso mi sto godendo ogni istante. Voglio aiutare la Juve a vincere altri titoli»

Parola di Giorgio @chiellini ➡ https://t.co/qGmjrjmsqA#Chiellini2023 pic.twitter.com/Th4amLQJLh

— Juventus TV (@JuventusTV) August 2, 2021

Мајката на израелскиот олимписки шампион Артем Долгопјат тврди дека државата не дозволува тој да се ожени за својата девојка од Белорусија, бидејќи таа не е Еврејка.

Долгопјат, кој е роден во Днипро, Украина, беше двократен национален шампион во земјата каде што е роден, пред да направи „Алија“, еврејскиот термин за преселба во државата Израел, за во Токио да го освои само вториот златен медал во историјата на државата со триумфот во Токио.

Неговата мајка, Ангела Долгопјат, за израелските медиуми призна дека таа не е Еврејка, иако таткото на гимнастичарот е Евреин, што значи дека тој нема да добие дозвола да се ожени во Израел, каде што е дозволен брак само во сопствената религија.

„Артем живее со својата девојка од Белорусија веќе три години, но државата не им дава да склопат во брак“, изјави Ангела Долгопјат за „Ерусалим пост“, посочувајќи дека како многу Израелци тие најверојатно ќе се договорат за цивилен брак надвор од државата.

Гилад Карив, рабинот кој е дел од израелскиот парламент Кнесет, вети дека ќе се обиде да ги смени законите.

„Важно е да се спомене дека правото за брак во сопствената земја не треба да биде поврзано со олимписко злато или со друго остварување. Се работи за основно човеково право. Накратко, шампионот Артем ќе носи медали и ние ќе работиме напорно за правото за избор“, изјави Карив.