Реал Мадрид немаше пораз оваа сезона додека не дојде гостувањето на „Метрополитано“, каде што во уште едно „Мадрилењо“, градско дерби, Атлетико Мадрид се покажа како подобар и погладен за победа тим, триумфирајќи со 3:1.

Само што почна мечот, во четвртата минута, Алваро Мората ги воодушеви 70-те илјади фанови со убав гол, најавувајќи борба за победа. Во 18. минута, „јорганџиите“ го удвоија водството преку Антоан Гризман, по што Реал Мадрид, конечно, се разбудија и во 35. минута намалија со голот на ветеранот Тони Крос.

Кога се очекуваше дека во второто полувреме, Реал ќе тргнат по победа, Алваро Мората само што почнаа вторите 45 минути зголеми на 3:1. Ова го деморализираше тимот на Карло Анчелоти, кој потоа иако тргна во постојан напад, не успеа да го најде патот до голот на Јан Облак.

Рома на Жозе Мурињо остана на само една победа на стартот на новата сезона во Серија А, откако Дуван Запата успеа да спаси поен за Торино за 1:1 реми.

„Волчицата“ беше поблиску до трите поени, откако Ромелу Лукаку стрелаше во 68. минута, и кога изгледаше дека тоа е доволно, новото засилување на „Граната“, Колумбиецот Дуван Запата израмни во 85. минута од мечот.

Ремито ја остава Рома на 13. место со само 5 освоени поени, додека Торино се деветти со 8 поени.

Пари Сен-Жермен, по неочекуваниот пораз од Ница во претходното коло, се созеде и стигна до импресивна и доминантна 4:0 победа над својот најголем (вечен) ривал, Олимпик Марсеј.

На „Паркот на принцовите“, дербито со ривалот од јужна Франција, секогаш се жестоки и неизвесни, но овојпат имаше само еден тим кој играше на теренот. Само што почна мечот, во 8. минута, Ашраф Хакими ги донесе Парижани во водство, по што следуваше неочекуваната замена на Килијан Мбапе во 32. минута поради повреда.

Ова не им пречеше на домаќините, кои во 37. минута го зголемија водството преку Рандал Коло Муани, за да стават точка на мечот преку Гонсало Рамос, кој го замени Мбапе, постигнувајќи два гола во 49. минута.

ПСЖ сега е на 3. место на табелата со 11 поени, два помалку од неочекуваниот лидер Брест, додека Марсеј се на седмото место со 9 поени и без победа во последните три кола.