Англија доби казна од еден меч без публика од страна на УЕФА по хаосот на „Вембли“ за време на финалето на Евро 2020, кое го загубија од Италија.

Над 5.000 навивачи без билети успеаја да влезат на стадионот и УЕФА одреди дека имало „неефективна безбедносна операција“ од страна на организаторите на 11 јули. Англиската Фудбалска асоцијација (ФА) е казнета со два меча без публика, од кои вториот е условен, а исто така ќе треба да платат казна од 100.000 евра.

Њујорк никс седма година во низа се највредниот тим во НБА лигата, потврди годишната листа на магазинот „Форбс“. Никси, кои имаат само една победа во плеј-оф серија од 2000, и последен пат беа НБА шампиони во 1973 година, вредат 5.8 милијарди долари, зголемување од 16 отсто во споредба со минатата година.

Во топ 5 клубови се и Голден Стејт вориорс (5.6 милијарди долари), Лос Анџелес лејкерс (5.5 милијарди долари), Чикаго булс (3.6 милијарди долари) и Бостон селтикс (3.5 милиони долари). Ова е првпат од следењето на финансиите на НБА тимовите од страна на „Форбс“, три клуба да вредат над 5 милијарди долари.

И покрај тоа што поради пандемијата на КОВИД-19, мечевите се играа без публика во сезоната 2020/21, вредноста на просечен НБА тим порасна за 13 отсто поради рекордните спонзорски договори и големите очекувања од следниот ТВ-договор на лигата.

Интересно, НБА шампионите, Милвоки бакс се само 17. највреден клуб со 1.9 милијарди долари, што претставува пораст од 17 отсто.

Ѕвездата на Пари Сен-Жермен, Нејмар ќе го пропушти мечот против РБ Лајпциг во Лигата на шампионите, откако заработил нова повреда играјќи за Бразил во мечевите против Колумбија и Уругвај во квалификациите за Мундијалот во 2022 година.

Бразилецот го одигра целиот меч против Уругвај во четвртокот, по што во петокот не настапи за ПСЖ на мечот против Анжер и клубот потврди дека 29-годишниот Нејмар има повреда на стомачкиот мускул.

За ПСЖ подолго време во аут се и Леандро Паредес и Серхио Рамос, додека Анхел ди Марија нема да може да настапи поради жолти картони. ПСЖ се први на табелата во групата А по ремито со Бриж и победата од 1:0 над Манчестер сити.

Нејмар оваа сезона има постигнато само еден гол за ПСЖ.