Њујорк Никс го одбранија домашниот терен, славеа против Индијана Пејсерс со 130:121 и во полофиналната серија поведоа со 2:0. Брилијантната трета четвртина, која Никс ја добија со 36:18 им го трасираше патот до победата.

Џејлен Брансон, ја прекина низата од четири натпревари со 40+ поени, но повторно го предводеше тимот до победата. Мечот го заврши со 29 поени, 24 постигна во второто полувреме откако поради поврда на ногата не играше во вториот период.

Пред точно 54 години, Вилис Рид исто така со повреда излезе на теренот и ги предводеше Никс до првата титула во историјата, а сега Брансон ја пропушти целата втора четвртина додека Пејсерс изградија двоцифрена предност.

„МВП, МВП“, скандираа навивачите во „Медисон Сквер Гарден“.

„Тој е воин“, рече соиграчот Донте ДиВинченцо, „Не се сомневав дека ќе се врати. Што и да му се случи, тој се враќа“.

Оу-Џи Ануноби постигна 28 поени (плеј-оф рекорд), ист број на поени уфрли ДиВинченцо, Џош Харт имаше 19 поени, 15 скока и седум, Ајзеа Хартенштајн додаде 14 поени (5-7 од поле), 12 скока и осум асистенции.

Пејсерси го завршија натпреварот без тренерот Рик Карлајл, кој доби втора техничка грешка во финишот.

За Пејсерси одличен меч одигра Тајрис Халибартон, запиша 34 поени, шест скока и девет асистенции. Оби Топин додаде 20 поени (7-10 од поле), Ти- Џеј Меконел имаше 10 поени и 12 асистенции, а потфрли Мајлс Тарнер со само шест (3-11 од поле).

Индијана ќе биде домаќин на натпреварот број 3 во сабота од 1 часот .

Кошаркарот на Денвер Нагетс Никола Јокиќ е најкорисен играч во НБА за сезоната 2023/2024. Јокиќ доби 926 гласови (79 први места), второто место го зазеде Шеј Гилџис-Александер од Оклахома Сити Тандер со 640, а трет беше Лука Дончиќ од Далас Маверикс со 566.

Јокиќ трет пат во последните четири сезони ја освои наградата за МВП, додека минатата година, според многумина незаслужено, трофејот „Мајкл Џордан“ му припадна на Џоел Ембиид од Филаделфија.

Центарот на актуелниот НБА шампион е прогласен за најдобар играч на финалната серија минатата сезона.

29-годишниот играч оваа сезона блеска и во лигашкиот дел од натпреварувањето имаше просек од 26,4 поени, 12,4 скока и девет асистенции.

Мозес Мелоун, Лери Бирд и Меџик Џонсон имаат по три МВП титули, Вилт Чембрлен и Леброн Џејмс имаат една повеќе, Бил Расел и Мајкл Џордан освоија по пет, додека Карим Абдул Џабар е неприкосновен со седум.

Фудбалерите на Реал Мадрид се пласираа во финалето на Лигата на шампионите каде на 1.јуни за титулата ќе се борат со Борусија Дортмунд.

Вечерва на „Сантијаго Бернабеу“, Реал повторно режираше нестварен пресврт и со головите на Хоселу во 88. и 91.минута го победи Баерн со 2:1.

Сепак, сенка на феноменалното полуфинале фрли помошникот на Симон Марчињак, Томаш Листкиевич, кој во последната минута од судиското надополнување реши да го прекине нападот на Баварците поради дискутабилен офсајд.

Во последните секунди Де Лихт погоди по додавањето на Милер, но помошникот во ситуацојата која беше „тесна“ реши да го крене знамецето.

Протоколот предвидува линискиот судија да ја остави акцијата да заврши, за доколку е постигнат гол, подоцна со помош на ВАР да се утврди дали голот бил регуларен или не.

Овде судијата не го направи тоа, па фудбалерите на Баерн, но и тренерот Томас Тухел целосно ги загубија нервите.