Спорт
Тијафоу го шокираше Циципас – Европа првпат го загуби Лејвер купот
Иако Лејвер купот во 2022 ќе остане запаметен како турнирот на кој Роџер Федерер го одигра својот последен меч, европските тенисери не направија доволно да му го донесат трофејот, откако Френсис Тијафоу се врати од мизерниот прв сет за 1:6/7:6(11)/10:8 победа над Стефанос Циципас за тимот на Светот за првпат да излезе како победник на турнирот.
Европа во својот состав ја имаше „големата четворка“ на светскиот тенис – Федерер, Рафаел Надал, Новак Ѓоковиќ и Енди Мареј, но тоа не беше доволно да се победи тимот кој го предводеше новата генерација на тенисот, како Тијафоу, Феликс Оже-Алијасим, Тејлор Фриц и Алекс де Минаур. Откако вчера Новак Ѓоковиќ победи во два меча за последниот ден Европа да го почне со 10:8 предност, Мареј и Матео Беретини загубија во двојки од Фриц и Џек Сок, по што Оже-Алијасим првпат во кариерата го победи Ѓоковиќ, за да постават притисок на Циципас, кој мораше да победи за шампионот да се одлучува во последниот меч помеѓу Каспер Руд и Фриц.
И грчкиот тенисер почна фантастично, освојувајќи го првиот сет со 6:1, но упорноста на Тијафоу се исплатеше откако спаси четири меч-топки во вториот сет за да го освои со 13:11, пред во супер тајбрејкот да биде подобар и да ја запечати 13:8 победата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Спорт
(Видео) Сити за полувреме го реши Брајтон
Фудбалерите на Манчестер Сити убедливo славеа на гостувањето кај Брајтон со 4:0 (3:0) во натпревар од 29. коло на англиската Премиер лига.
Актуелните шампиони сите дилеми околу победникот ги решија во првото полувреме и тоа во интервал од 17 минути кога постигнаа три гола.
Кевин де Брујне го постигна првиот гол во кариерата со глава во 17. минута, по центаршутот на Кајл Вокер.
Потоа два гола постигна Фил Фоден во 26. и 34. минута, првиот од слободен удар со малку среќа, а вториот по груба грешка на одбраната на домаќините.
Хулијан Алварез во 62. минута ги постави конечните 4:0.
Избраниците на Пеп Гвардиола се втори на табелата, го прескокнаа Ливерпул, а имаа бод и натпревар помалку од лидерот Арсенал.
Спорт
(Видео) Димитријевиќ МВП на ВТБ лигата
Кошаркарот на Уникс, Ненад Димитријевиќ е прогласен за најкорисен играч на регуларниот дел сезоната на руската ВТБ лига.
Уникс прв заврши во лигата, првпат во историјата, а Македонецот беше еден од најзаслужните за ваков успех.
Сезонава Димитријевиќ имаше просек од 19 поени по натпревар со 6,6 асистенции, 3,6 скока и 1,3 украдени топки.
Во минатогодишното финале на ВТБ лигата неговиот тим ја совлада Локомотива (4:1), а Димитиријевиќ беше прогласен за МВП на финалната серија.
Сезонава во решавачкиот меч за првото место во регуларниот дел против ЦСКА Москва забележа рекордни 40 поени со девет асистенции.
„За мене е голема чест да ја добијам наградата МВП за регуларниот дел од сезоната на ВТБ лигата 2023/24“, изјави Димитријевиќ и додаде:
„Оваа година победивме во многу возбудливи натпревари и славевме во регуларниот дел од сезоната. Мислам дека ова е резултат на напорната работа на целиот тим. Би сакал да им се заблагодарам на ВТБ лигата, на мојот тим Уникс, на стручниот штаб на чело од Велимир Перасовиќ, медицинскиот штаб и нашите верни навивачи. Најголема благодарност до моите соиграчи, кои ми помогнаа да станам подобар играч.“
Спорт
Адријан Њуи ќе го напушти Ред Бул
Главниот директор за дизајн на Ред Бул, Адријан Њуи, треба да го напушти тимот по контроверзата, која вклучува обвинувања против шефот на тимот Кристијан Хорнер.
Њуи, кој важи за најдобар дизајнер во историјата на Формула 1, одлуката да го напушти тимот им ја сооптшил челниците на Ред Бул, објави денеска Би-би-си.
Адријан Њуи е вознемирен од ситуацијата во Ред Бул, откако Хорнер беше обвинет за сексуално вознемирување и насилно однесување кон колешка. Хорнер ги негираше обвинувањата, а тимот по спроведена интерна истрага ги отфрли обвинувањата против Хорнер и жената ја суспендираше од работа.
Тој има договор со Ред Бул до крајот на следната сезона, а претходно беше поврзуван со преселба во Ферари.