Одличен меч со дури 4 погодоци одиграа попладнево градските ривали Работнички и Македонија ЃП на нашиот најголем стадион во Скопје. На крајот мечот заврши со поделба на бодовите, 2-2.

Гостите дојдоа во водство во 7 минута, со погодокот на Да Силва.

Сепак „Романтичарите“ во 10 минута со голот на Лука Станковски израмнија на 1-1.

Фернандињо во 17 минута повторно гостите од скопската населба Ѓорче Петров ги доведе во водство од 2-1.

Но до полувремето Работнички се погрижи на пауза да се оди со нерешен резултат. Голот за 2-2 беше дело на Марио Станковски.

Во вториот дел мрежите мируваа, а единствено може да се одбележи дека Максимов (Работнички) поради втор жолт картон предвреме го заврши мечот, во 65 минута.

Во Струмица, Академија Пандев со кормиларот Александар Васоски убедливо со 3-0 славеше против скопски Вардар.
Сите три гола за домаќините беа постигнати до 35-тата минута, а стрелци беа Радески, Крстевски и Стоилов (пенал).

На останатите мечеви од ова 28 коло од ПМФЛ Беласица на свој терен поразена со 0-3 од лидерот Шкендија, Борец во Велес загуби од Шкупи со 1-0, додека Струга Трим Лум на домашен терен славеше убедливо со 3-0 против тимот на Пелистер.

Вчера Ренова со 2-1 беше поуспешна од Силекс.

По 28 кола лидер на табелата и понатаму е тетовска Шкендија со 65 бода, на втората позиција е Шкупи со 52, трет е тимот на Македонија ЃП со 48, а на следните две позиции се Струга и Работнички со 44, односно 41 поен.

По денешниот пораз Вардар е претпоследен со 28 бода и според сегашниот распоред на табелaта, заедно со Беласица е на позиција која води во понизок ранг.
Фото: ФК Работнички

Калчолигашот Милан дојде до многу важен триумф попладнево на својот „Сан Сиро“ во рамки на 31 коло во Серија А.

„Росонерите“ со 2-1 славеа против екипата на Џенова и првпат по 7. февруари годинава (тогаш со 4-0 славеа против Кротоне) дојдоа до цел плен на својот стадион во рамки на Серија А.

Трагичар кај гостите беше Џанлука Скамака, тој во 68 минута аматерски реагираше во својот шеснаесетник по една нафрлена топка, па од неговиот грб топката се најде во мрежата на голманот Перин, за водство на Милан од 2-1.

Претходно, во првиот дел најпрво Анте Ребиќ со прекрасен удар од 16 метри донесе домашна предност од 1-0.

Сепак, Дестро со глава во 37 минута погоди за 1-1.

Капитенот на македонската фудбалска репрезентација, Горан Пандев во игра влезе во 74 минута, но немаше некоја посериозна шанса да го загрози Џиџи Донарума.

Најголемата шанса за 2-2 Џенова ја имаше во 86 минута кога во два наврати стоперите на Милан ја вадеа топката од гол линијата по една грешка на Донарума. Мазиело и Бехрами не успеаја да ја сместат топката во мрежата.

Со овие три бода Милан останува втор на табелата, сега со 66 – 4 повеќе од третопласираниот Јувентус кој од 15 часот игра во Бергамо, против Аталанта.

Интер и понатаму е недостижен со 74 и меч помалку, оној вечерва од 20.45 нагости кај Наполи.

Младиот возач на Прамак Дукати, Хорхе Мартин по импресивниот старт на сезоната во Мото ГП имаше голем пех во Португалија. Ја повреди десната рака и десната нога, па ќе мора да оди на операција во Барселона, по вчерашниот пад на седмиот свиок на патеката „Портимао“. Се работи за повтеда на коска на дланката и на десната нога, над скочниот зглоб.

„Не ми е ова најдобриот ден верувајте ми! Многу боли, но јас сум `Мартинатор`. Ќе се видиме наскоро“ порача Мартин на Твитер.

Not my best day, you can trust me! A lot of pain but I am Martinator. SEE U SOON @motogp pic.twitter.com/rWAIouJ5Tp

— JorgeMartínAlmoguera (@88jorgemartin) April 17, 2021

Тој е дебитант во Мото ГП шампионатот, а на првите две трки беше одличен. Во Доха заврши како трет.

Хорхе Мартин е екс-светски шампион во Мото 3 со Хонда, а минатата сезона беше петтопласиран во Мото 2 возејќи Калекс.

Тежок пад на Хорхе Мартин