Спорт
Трка за Златната топка 2022: На врвот се фудбалерите на Реал Мадрид и Ливерпул

Во текот на сезоната, фудбалскиот портал „Goal.com“ ја ажурира својата листа на фаворити за освојување на наградата „Златна топка“ во 2022 година. Порталот го рангира најдоброто, имајќи ги предвид сите елитни натпреварувања, и клупски и репрезентативни. Во последното издание на ова рангирање, на самиот врв се играчите на финалистите од Лигата на шампионите – Реал Мадрид и Ливерпул.
На првото место на оваа ранг листа е напаѓачот на Реал Мадрид, Карим Бензема. Французинот сезонава постигна нереални 47 гола и 15 асистенции во сите натпреварувања, ја освои Ла Лига, УЕФА Лигата на нации и Суперкупот на Шпанија.
На втората позиција е напаѓачот на Ливерпул Садио Мане. Фудбалерот на Сенегал во актуелната сезона има 29 гола и пет асистенции, а од трофеите на „контото“ ги има Африканскиот куп на нации, ФА Купот и Лига купот.
Трет е соиграчот на Мане, Мохамед Салах. Египетската суперѕвезда освои две куп натпреварувања во Англија, а заедно со Сон од Тотенхем, Салах ја подели титулата најдобар стрелец во Премиер лигата за сезоната 2021/2022. Тој постигна вкупно 33 гола во сезоната и имаше 19 асистенции во сите натпреварувања.
На четвртото место е Роберт Левандовски од Баерн (56 гола, 11 асистенции, Бундеслига, Суперкуп на Германија), а на петто е Килијан Мбапе од Пари Сен Жермен (48 гола, 31 асистенција, Француска Лига 1, УЕФА Лига на нации) .
Погледнете го редоследот на останатите фудбалери од списокот што го обезбеди „Goal.com“:
6. Кевин де Брујне (Манчестер Сити)
7. Винисиус Јуниор (Реал Мадрид)
8. Лука Модриќ (Реал Мадрид
9. Фил Фоден (Манчестер Сити)
10. Трент Александер-Арнолд (Ливерпул).
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Спорт
Цибона ја напушти АБА 2 лигата

Кошаркарскиот клуб Цибона донесе одлука да се откаже од настапот во регионалната АБА 2 лига.
Како што објавува „Јутарњи“, по долги консултации, загрепскиот клуб донесе одлука да се повлече од лигата. Поради оваа одлука, Цибона нема да игра против ТФТ од Скопје.
Натпреварот против ТФТ беше закажан за понеделник во 18:00 часот на „Драженов дом“.
По осум години, Цибона се врати на европските натпреварувања со аплицирање за ФИБА Еврокупот, но истовремено играше во АБА2 и домашното првенство.
„Тоа би било неодржливо со ограничен персонал“, објавува „Јутарњи“.
Претходно беше објавено дека клубот размислува за повлекување од АБА лигата, но се чекаше финансиска поддршка од Хрватскиот кошаркарски сојуз.
Спорт
Силвињо: Дојдовме да ја победиме Србија на гостински терен

Селекторот на фудбалската репрезентација на Албанија, Силвињо, истакна дека претстојниот квалификациски натпревар против Србија има посебна тежина и значење за неговиот тим, опишувајќи го како „различен од сите останати“.
„Секој натпревар е важен, но овој е посебен. Пред еден месец игравме против Летонија, и ако тогаш не победевме, овој натпревар немаше да има вакво значење. Не можам да кажам дали ова е најважниот натпревар, но дефинитивно е специфичен. Тоа е убавината на фудбалот – секој меч носи своја енергија“, изјави Силвињо.
Тој додаде дека е свесен за атмосферата и притисокот што ги очекува неговите играчи во Лесковац, но верува дека тимот ќе покаже карактер.
„Ја знаеме атмосферата во Тирана, но очекуваме слична и тука. Верувам во моите играчи и во нивната зрелост. Секој од нив знае што го очекува и е подготвен да одговори на предизвикот. Дојдовме тука по три бодови“, изјави селекторот на Албанија.
Спорт
Стивен Џерард ќе биде нов тренер на Бојан Миовски

Стивен Џерард е на чекор да се врати на чело на Ренџерс веќе оваа недела, откако одржа позитивни разговори со раководството на клубот. Поранешниот капитен на Ливерпул и Англија е во Лондон за преговори околу сензационалното враќање на „Ајброкс“. Под негово водство тимот ја освои титулата во шкотската Премиер лига во 2021 година, која останува последна за клубот до моментот.
Шкотскиот гигант е подготвен да го назначи Џерард по отпуштањето на Расел Мартин во неделата. Причината за разделбата со Мартин беше слабото отворање на сезоната, што го остави тимот на осмото место во табелата. Според новинарот Бен Џејкобс, двете страни се многу блиску до договор, кој може да биде објавен преку викендот.
„Скај Спортс“ исто така потврдува дека вчерашните дискусии меѓу Англичанецот и американските сопственици на клубот биле конструктивни, а преговорите продолжуваат. Се очекува Џерард да биде нов тренер на македонскиот репрезентативец Бојан Миовски.