Спорт
УЕФА ги објави новите финансиски правила
По 12 години, УЕФА се откажа од правилата за финансиски ферплеј (ФФП) и воведе нови финансиски правила, кои ќе се познати како ФСЦЛР и под кои клубовите ќе може да трошат до 70 отсто од своите приходи.
Ова беше потврдено по состанокот на Извршниот комитет на УЕФА во Нион, Швајцарија, и ќе биде познато под името Регулативи за финансиска одрживост и лиценцирање на клубовите (Financial Sustainability and Club Licensing Regulations (FSCLR)).
ФФП беше воведено во 2010 во обид да се спречи претераното трошење на клубовите. Сепак, правилата беа постојано критикувани бидејќи клубовите повторно наоѓаа начини да ги заобиколат.
Сега ФСЦЛР е базирана на три столба – солвентност, стабилност и контрола на трошењето. Солвентноста значи дека клубовите нема да може да им должат на даночните власти, другите клубови или своите вработени, со закана за исфрлање од натпреварувањата на УЕФА, како Лигата на шампионите. Стабилноста, пак, одредува колку може еден клуб да биде во загуба – прифатливи загуби се сметаат 60 милиони евра во три сезони, а клубовите што се во „добра финансиска состојба“ ќе може да одат во долг уште 10 милиони евра. На крајот, ограничувањето на трошењето значи дека сите трошоци на клубот мора да претставуваат до 70 отсто од приходите на клубот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Спорт
Барселона се распрашува за Лирој Сане
Поради тешката финансиска состојба, Барселона летово ќе биде принудена да продава играчи, особено ако сака да донесе звучни имиња од други клубови.
Шпанските медиуми објавија дека Барселона веќе стапила во контакт со Баерн во врска со Лирој Сане.
28-годишен крилен напаѓач е под договор со Баерн и за следната сезона, а „Трансфермаркт“ неговата вредност ја проценува на 70 милиони евра. Шпанските медиуми пишуваат и дека Барселона би можела да испрати еден од своите играчи во Баерн и со тоа да ја намали цената на германскиот репрезентативец.
Сане пристигна во Баерн во 2020 година од Манчестер Сити.
Спорт
Надал: Ако немам чувство дека можам да се натпреварувам тогаш нема да играм на РГ
Шпанскиот тенисер Рафаел Надал, по Мастерсот во Рим, ќе донесе одлука дали ќе настапи на вториот гренс слем во сезоната, Ролан Гарос.
Рафа моментално се наоѓа во Мадрид, каде во првото коло убедливо славеше во дуелот со 16-годишниот Американец Дарвин Бланш.
„Реален сум за тоа што се случува. Искрено, играв против играч кој направи многу грешки и ми ги олесни работите. Со најголема почит кон играчот кој има голема иднина, тој направи многу грешки и мечот траеше само еден час. Ова нема да ги смени моите размислувања за Ролан Гарос. Овде нема да донесам никаква одлука, по Мастерсот во Рим ќе ја донесам конечната одлука. Не зборувам за победите, туку за чувството дека можам да дадам се од себе и дека можам да се натпреварувам. Мислам дека ова е логично по се што направив во Париз“, изјави Надал.
Негов следен ривал ќе биде Алекс де Минор, кој го елиминира минатата недела во Барселона.
Спорт
Бруно Гимараеш има посебна клаузула во договорот која важи до 30 јуни
Играчот од средниот ред на Њукасл, Бруно Гимараеш е на мета на бројни клубови, а тој има посебна клаузула во договорот.
Како што откри трансфер-инсајдерот, Фабрицио Романо, од последната недела на мај до крајот на јуни, Гимараеш има откупна клаузула од 100 милиони фунти или 116 милиони евра.
Доколку Бразилецот се договори со некој клуб и тој клуб ја плати сумата, Њукасл ќе биде принуден да го пушти.
Во моментов не се знае дали некој клуб е подготвен да потроши толку пари, но веќе е познато дека ПСЖ покажува интерес за бразилскиот репрезентативец.
Прашање е само дали е реално еден ваков трансфер да се случи пред официјалниот почеток на летниот преоден рок.
Летниот преоден рок стартува на 1 јули.