Спорт
Уругвајците на Атлетико го „сотреа“ Јуве, Сити против Шалке и ВАР системот во Германија (видео)
Големата пресметка меѓу Атлетико Мадрид и Јувентус заврши со 2:0 победа на шпанскиот клуб, обезбедена во последните минути од мечот, откако прво ВАР системот им поништи еден гол на Алваро Мората и не им досуди еден пенал, додека во Гелзенкирхен, Манчестер сити стигна до импресивна 3:2 победа над Шалке, откако домаќините дојдоа до 2:1 водство преку два гола од пенал.
УЕФА го воведе ВАР-системот за мечевите од осминафиналето на Лигата на шампионите и контроверзниот систем, нормално, донесе нови контроверзи. Ајакс беа бесни откако нивниот прв гол против Реал Мадрид беше поништен поради контроверзен офсајд, а вечерва ВАР имаше главна улога на мечот во Германија.
Во првите 45 минути двата противници на „Ванда метрополитано“ беа израмнети, откако Јувентус се закани преку Кристијано Роналдо од слободен удар и преку Лео Бонучи со убав удар на главата, додека на другата страна Шчесни ги одбрани ударите на Гризман и Томас. Најконтроверзниот момент беше по половина час игра, кога судијата прво покажа на белата точка, за потоа со помош на ВАР да одреди дека Де Шиљо го фаулирал Диего Коста надвор од шестнаесетникот.
Атлетико беше многу подобар противник во второто полувреме, откако прво Диего Коста во 52. минута промаши чист „зицер“, а само две минути подоцна Гризман ја погоди пречката! Алваро Мората влезе како замена против поранешниот клуб, и во 70-тата минута ја затресе мрежата на Шчесни пред судијата Феликс Цвајер да го поништи голот поради престрого досуден фаул од Мората над Кјелини.
Сепак, „јорганџиите“ дојдоа по своето во последните 15-тина минути. Во 78. минута по силниот удар со глава на Мората по корнер, топката се одбива од Манџукиќ и стигнува до Хименез кој од седум метри не промашува за водство! Диего Годин, уште еден Уругваец во дресот на Атлетико, ја удвои предноста во 83. минута повторно во ситуација од корнер, кога топката стигнува до Годин, кој го погоди Роналдо и потоа голот на Јуве.
Судијата Карлос дел Серо Гранде беше во центарот на конфузијата во Гелзенкирхен по досудениот пенал за домаќините во првото полувреме. Сити водеа преку голот на Серхио Агуеро, а домаќините имаа шанса да израмнат кога Николас Отаменди играше со рака по шутот на Даниел Калигури, кој сигурно ќе завршеше во гол.
Шалке дојдоа во предност повторно со удар од белата точка во 45. минута, повторно преку Бенталеб, пред Отаменди да добие втор жолт картон во 68. минута.
Прво беше досуден корнер, пред по интервенција на ВАР, да се досуди пенал, одложувајќи го мечот речиси три минути, пред Набил Бенталеб да израмни на 1:1.Но, тогаш на сцена стапи „четата“ на Пеп Гвардиола – Лирој Сане во 85. минута постигна гол против поранешниот клуб за 2:2, пред Рахим Стерлинг во 90-тата минута да го комплетира пресвртот.
Фото: ЕПА
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Спорт
(Видео) Сити за полувреме го реши Брајтон
Фудбалерите на Манчестер Сити убедливo славеа на гостувањето кај Брајтон со 4:0 (3:0) во натпревар од 29. коло на англиската Премиер лига.
Актуелните шампиони сите дилеми околу победникот ги решија во првото полувреме и тоа во интервал од 17 минути кога постигнаа три гола.
Кевин де Брујне го постигна првиот гол во кариерата со глава во 17. минута, по центаршутот на Кајл Вокер.
Потоа два гола постигна Фил Фоден во 26. и 34. минута, првиот од слободен удар со малку среќа, а вториот по груба грешка на одбраната на домаќините.
Хулијан Алварез во 62. минута ги постави конечните 4:0.
Избраниците на Пеп Гвардиола се втори на табелата, го прескокнаа Ливерпул, а имаа бод и натпревар помалку од лидерот Арсенал.
Спорт
(Видео) Димитријевиќ МВП на ВТБ лигата
Кошаркарот на Уникс, Ненад Димитријевиќ е прогласен за најкорисен играч на регуларниот дел сезоната на руската ВТБ лига.
Уникс прв заврши во лигата, првпат во историјата, а Македонецот беше еден од најзаслужните за ваков успех.
Сезонава Димитријевиќ имаше просек од 19 поени по натпревар со 6,6 асистенции, 3,6 скока и 1,3 украдени топки.
Во минатогодишното финале на ВТБ лигата неговиот тим ја совлада Локомотива (4:1), а Димитиријевиќ беше прогласен за МВП на финалната серија.
Сезонава во решавачкиот меч за првото место во регуларниот дел против ЦСКА Москва забележа рекордни 40 поени со девет асистенции.
„За мене е голема чест да ја добијам наградата МВП за регуларниот дел од сезоната на ВТБ лигата 2023/24“, изјави Димитријевиќ и додаде:
„Оваа година победивме во многу возбудливи натпревари и славевме во регуларниот дел од сезоната. Мислам дека ова е резултат на напорната работа на целиот тим. Би сакал да им се заблагодарам на ВТБ лигата, на мојот тим Уникс, на стручниот штаб на чело од Велимир Перасовиќ, медицинскиот штаб и нашите верни навивачи. Најголема благодарност до моите соиграчи, кои ми помогнаа да станам подобар играч.“
Спорт
Адријан Њуи ќе го напушти Ред Бул
Главниот директор за дизајн на Ред Бул, Адријан Њуи, треба да го напушти тимот по контроверзата, која вклучува обвинувања против шефот на тимот Кристијан Хорнер.
Њуи, кој важи за најдобар дизајнер во историјата на Формула 1, одлуката да го напушти тимот им ја сооптшил челниците на Ред Бул, објави денеска Би-би-си.
Адријан Њуи е вознемирен од ситуацијата во Ред Бул, откако Хорнер беше обвинет за сексуално вознемирување и насилно однесување кон колешка. Хорнер ги негираше обвинувањата, а тимот по спроведена интерна истрага ги отфрли обвинувањата против Хорнер и жената ја суспендираше од работа.
Тој има договор со Ред Бул до крајот на следната сезона, а претходно беше поврзуван со преселба во Ферари.