Поранешната српска манекенка и мис Југославија, Јелена бин Драи, живее во Дубаи веќе 24 години, каде што изгради семејство со арапскиот претприемач Саид бин Драи, со кого има четири деца. По долго медиумско молчење, Јелена неодамна отворено проговори за својот брак, семеен живот и за правилата што ги следи во Обединетите Арапски Емирати во емисија на телевизијата „К1“.

Таа призна дека ѝ требало време да се навикне на пустинската клима, но и да ја разбере културата во која сè се мери – од начинот на облекување до покажувањето почит.

„Кога дојдов, се облеков како во Милано. Мини здолништа, блузи со длабоко деколте, сè што беше нормално за 20-годишна девојка. Но, набргу сфатив дека ако сакам луѓето да ме почитуваат овде, морам да ги почитувам нивните правила. Кога сум во Србија, се облекувам како што сакам. Во Дубаи знаете како да се облекувате и како да се однесувате“, рече Јелена додавајќи: „Тоа не значи дека не ми се допаѓа модата, напротив. Сакам да изгледам убаво, но научив дека вистинската елеганција никогаш не вреска. Тоа е лекција што Дубаи бргу ја учи на секоја жена“.

Нејзиниот ден, вели таа, почнува во шест часот наутро и е исполнет со многубројни деловни и семејни обврски.

„Имам помош во куќата, но тоа не значи мир. Тоа значи бучава од шест часот наутро, врати, ѕвона, трчање“, рече таа, пренесе „Индекс“.

Откри дека нејзиниот најмлад син Рашид зборува српски, а постарите деца го прават тоа само кога е потребно.

„Кога им треба нешто, сите јазици функционираат“, додава Јелена. Таа нагласи дека во нејзиното семејство постојат јасни правила и дека, без оглед на обврските, сите се собираат како заедница навечер.

„Во Дубаи сè се мери точно и функционира прецизно, но топлината во семејството не може да се купи со луксуз или правила. Тоа се учи од дома“, рекла таа.

Начинот на облекување, истакнува, е клучен дел од почитувањето на културата во која живее, а постоењето ред носи и чувство на сигурност.

„Во Емиратите сè е видливо и сè има свои граници. Ако одите на плажа, можете да носите што сакате. Ако одите во трговски центар, мора да покажете почит кон земјата во која живеете. Ова не значи дека жената се откажува од себе, туку дека знае каде е и кому му припаѓа“, објаснила таа.

Конечно, Јелена се осврна на шпекулациите што го следат нејзиниот брак со години, особено за тоа дали нејзиниот сопруг има повеќе од една жена.

„Весниците повеќе не пишуваат дека Саид носи нова жена на секои три месеци. А што би рекла мајка ми – јас сум премногу за него“, рече Јелена со насмевка.

Таа истакна дека нема поделба во нејзиниот брак со Саид, туку рамнотежа што самите ја создале.

„Во арапската култура мажот има улога на заштитник, но ако сте сигурни во себе, таа улога не е ограничувачка, напротив. Саид има своја традиција, јас имам своја. Се почитуваме и се надополнуваме. Кога жената знае која е, не мора тоа никому да му го докажува“, заклучи Јелена.

На 71 годинa денес во Сараево почина Халид Бешлиќ, еден од најголемите музички великани на просторот на поранешна Југославија. Пејачот ја изгуби битката со тешка болест по кратко боледување, пренесуваат медиумите од Босна и Херцеговина.

Бешлиќ беше хоспитализиран кон крајот на август во Клиничкиот центар на Универзитетот во Сараево, каде што беше под постојан надзор на лекарите. И покрај напорите на медицинскиот тим, пејачот почина денеска околу 13 часот.

Со своите безвременски хитови Халид Бешлиќ остави неизбришлив белег на музичката сцена и во срцата на многу генерации.

Роден на 20 ноември 1953 година во Кнежина кај Соколац, Бешлиќ беше симбол на севдахот и емоцијата.

Грците со гордост објавуваат дека најуспешниот тенисер во историјата, Новак Ѓоковиќ, ќе се пресели во оваа земја со своето семејство и ќе започне ново поглавје во својот живот.

Грчката веб-страница „Glow.gr“ подготви голем текст за Новак Ѓоковиќ, објаснувајќи ја позадината на неговата одлука да ја направи Атина своја нова база.

„Неговата одлука не дојде туку така, туку е последица на неговата врска со Грција, која се зајакна со текот на годините.“

Заедно со неговата сопруга Јелена, тој ја посети Грција неколку пати, со семејни одмори на Крит и Миконос и направи поклонение на Света Гора, која има големо духовно значење за него. Од 2024 година започнаа неговите официјални контакти со грчката влада со цел да добие Златна виза. Семејството Ѓоковиќ бара идеален дом за своите деца, а акцентот е ставен на мирно, безбедно соседство кое е поврзано со природата.

Љубовта на Новак кон Грција не е ограничена само на културата и природата. Тој постојано нагласуваше дека бил трогнат од топлината на луѓето, рамнотежата помеѓу традицијата и модерноста, духовноста на православието и неговата поврзаност со монасите на Света Гора.

Постојат и практични причини: Атина е блиску до повеќето градови каде што се одржуваат турнирите, има одлична медицинска и образовна инфраструктура, а се развива и во деловен поглед.“

Во заклучокот на текстот се наведува дека Ѓоковиќ е една од највлијателните личности во светот на спортот.