ФИБА Европа ги одреди групите за женскиот Евробаскет. Европското првенство во женска конкуренција ќе се одржи од 17. до 27.јуни, во Валенсија и Стразбур.

Натпреварите во групите А и Б ќе се играат во Валенсија.

Во А-групата покрај домаќинот Шпанија се Шведска, Белорусија и Словачка. Србија, Италија, Црна Гора и Грција се во Б-групата.

Натпреварите во групите Ц и Д ќе се играат во Стразбур.

Турција, Босна и Херцеговина, Словенија и Белгија се во Б-групата, а домаќинот Франција, Русија, Чешка и Хрватска се во Д-групата.

Натпреварите во групите, осмина-финалните и четврт-финалните мечеви ќе се играат во Валенсија и Стразбур, а завршницата потоа ќе биде одржана само во Валенсија.

Словенецот Сашо Филиповски се наоѓа пред отказ во кошаркарскиот клуб Партизан. Филиповски, пред четири месеци, седна на клупата на поранешниот европски првак, не ги оправда очекувањата и според српските медиуми тој во текот на денот ќе го напушти клубот.

Филиповски на 5.ноември 2021 година го наследи Владо Шчепановиќ, кој доби отказ поради променливите резултати. Промената на тренерот не донесе ништо добро во таборот на црно-белите, туку дополнително се влошија.

Партизан нема шанси за пласман во плеј-офот во АБА лигата, а во регионалното нема победа во последните два месеци. Партизан во АБА лигата нема победа на последните шест натпревари, а минатиот месец не успеа да ја одбрани титулата во Купот на Србија.

Клубот ги задржа шансите за пласман во четврт-финалето во Еврокупот. Во среда, Партизан мора да го победи Метрополитан, за да се надева на пласман меѓу најдобрите осум екипи во ова натпреварување.

Српските медиуми пишуваат дека Филиповски нема да го води тимот на овој натпревар. Тој не го водел денешниот тренинг, а попладнево треба да има средба со клупските челници.

Евролигата, на денешната седница, реши да им додели А-лиценци на Баерн Минхен и Асвел од Вилербан.

Добри вести од седницата добија и во кошаркарскиот клуб Алба од Берлин. Овој клуб, во наредните две сезони, без оглед на пласманот во домашното првенство, во Евролигата ќе се натпреварува со специјална покана.

Ваквите одлуки на Евролигата, под знак прашалник го ставаат учеството на екипа од регионалната АБА лига во елитното кошаркарско натпреварување. Евролигата дополнително ќе се изјасни по ова прашање.