Милан и Торино ќе му оддадат последна почест на трагично загинатиот Коби Брајант пред нивниот меч од Копа Италија утре, момент кој има посебно значење поради тоа што Брајант беше емотивно поврзан со „росонерите“.

41-годишниот Брајант, кој загина во хеликоптерска несреќа со неговата 13-годишна ќерка Џана и уште седум други луѓе, поголемиот дел од своето детство го помина во Италија, каде што неговиот татко беше професионален кошаркар во тимовите на Реџо Калабрија и Реџо Емилија.

Брајант стана голем фан на Милан и течно зборуваше италијански јазик. Тој беше посебен гостин во тренинг-центарот во Миланело во 2013 година и зборуваше за тоа како ги гледал Марко ван Бастен, Руд Гулит и Паоло Малдини.

„Во мојата соблекувална во Лос Анџелес имам дрес и шал на Милан“, изјави тогаш Брајант.

In loving memory of a true legend: Kobe Bryant ❤ pic.twitter.com/4Ysb6FhZeQ

— AC Milan (@acmilan) January 27, 2020

Легендарниот американски тенисер, Џон Мекинро се потсмеваше со освојувачката на рекордни 24 гренд слем титули, Австралијката Маргарет Корт, нарекувајќи ја „лудата тетка“ на тенисот, додавајќи дека се надева дека Серена Вилијамс ќе го сруши рекордот на 77-годишната Корт.

Проблемот на Мекинро со Корт е во нејзиното противење на истополовите бракови поради религиозните убедувања. Во понеделникот, Австралија опен ја одбележа 50-годишнината од нејзиниот успех во 1970 кога ги освои сите четири гренд слем титули во една календарска година, заедно со Род Лејвер, кој двапати го остваруваше тоа во 1962 и 1969 година.

Мекинро како коментатор на „Евроспорт“ не беше подготвен за смиреност.

„Има само една работа подолга од листата на тениските остварувања на Маргарет Корт: листата на нејзините навредливи и хомофобски изјави. Серена, направи ми услуга, освои уште два гренд слема и стигни до 25 за да ја оставиме Маргарет Корт и нејзините навредливи ставови во минатото, каде што припаѓаат“, изјави седумкратниот гренд слем шампион.

Вилијамс, која ја освои последната од своите 23 гренд слем титули во Мелбурн во 2017, загуби во третото коло оваа година.

Корт, која е христијански свештеник во нејзината црква во Перт, минатиот месец имаше директен напад на трансродовите спортисти, а го нарече учењето на ЛГБТ материјали во австралиските школи „ѓаволска работа“.

Бразилската фудбалска легенда, Роналдињо вели дека гледа огромна сличност помеѓу младиот фудбалер на Арсенал, Габриел Мартинели и уште еден бразилски легендарен фудбалер, Роналдо.

18-годишниот Мартинели направи „скок“ од најниската бразилска фудбалска лига во Премиер лигата, откако Арсенал го купија од Итуано, и импресионираше со 10 гола во 21 настапи во сите натпреварувања во тешка сезона за „топчиите“.

Младиот фудбалер стана сензација откако истрча над 60 метри за да постигне фантастичен гол за израмнување при 2:2 ремито со Челси, гол што многумина ги потсети на спектакуларниот гол на Роналдо против Компостела додека беше фудбалер на Барселона. Роналдињо се согласува.

„Ние во Бразил сме многу возбудени од него и од неговата иднина. Едно нешто е да имаш талент, но на 18 години да ја имаш таа самодоверба е многу необично. Тој ме потсетува на Роналдо во неговата прва сезона во Европа кога имаше 30 гола и кога сите се чудеа, кое е ова 18-годишно бразилско момче. Ја сакаше топката, трчаше по фудбалерите, немаше страв против никого, а истото го гледаме и кај Мартинели. Тој сака да биде со топката и да постигнува голови и може да биде најдобриот ако ја има таа амбиција“, вели Роналдињо.

Мартинели може да почека да дебитира за бразилската репрезентација во која има напаѓачи како Нејмар, Роберто Фирмино и Габриел Жесус, но Роналдињо верува дека селекторот Тите го следи тинејџерот.

„Сигурен сум дека тоа ќе се случи многу бргу. Во репрезентацијата годините никогаш не биле најважни. Роналдо играше на 17 години, а во последно време Нејмар и Жесус играа додека беа тинејџери“, додава Роналдињо.