Американската УФЦ-ѕвезда, Џастин Гетџи, вели дека мајка му ќе може да престане да оди на работа по неговиот саботен мегамеч против Хабиб Нурмагомедов на УФЦ 254 бидејќи тој ќе заработи доволно за да си ја осигури иднината.

Се очекува Гетџи да заработи над 3 милиони долари, без разлика дали ќе успее да го победи шампионот во лесна категорија, Нурмагомедов на Островот на борбите во Абу Даби. Неговата мајка Каролина, која по потекло е Мексиканка, работи во пошта.

„Моите родители никогаш не летале надвор од САД, а сега пристигнаа со бизнис-класа. Мојот татко Џон се пензионира пред неколку години откако 37 години работеше во рудник за бакар. А мојата мајка ќе оди во пензија по овој меч. Кога ќе почне мечот, тоа ѕвонче на почетокот ќе осигури таа да може да се пензионира по 35 години работа. Сите пари што ги заработуваа одеа кај мене и кај моите браќа и мојата сестра за да добиеме шанса“, вели Гетџи.

Американецот има скромно потекло од Сафорд, Аризона, каде што израсна со својата сестра и братот близнак и признава дека не било лесно.

„Живеевме на два часа од кој било град. Кога одевме да купуваме алишта за училиште, беше како празник за нас бидејќи возевме два-три часа. Знам колку финансиски им тежеше тоа и нема подобро чувство од тоа да си способен да го вратиш тоа“, вели Гетџи.

Борис Бекер е обвинет дека одбива да ги предаде трофеите, вклучувајќи го и трофејот од Вимблдон од 1985 по кој стана суперѕвезда, за да ги подмири своите долгови во Велика Британија по банкротот.

52-годишниот Бекер почна процедура за заштита од банкротирање во јуни 2017 година, и пред судот во Лондон е обвинет дека ги крие информациите за своите сметки и своите поседи кои можат да бидат продадени за да се подмират долговите. Меѓу трофеите кои обвинителите ги бараат се неговиот прв трофеј од Вимблдон и тој од 1989, и трофеите од Австралија опен од 1991 и 1996 година.

Неговото судење почнува во септември 2021 година, а обвинителите тврдат дека по банкротот тој ги „сокрил“ трофеите, и префрлил над милион фунти на други сметки, вклучувајќи ги тие на своите поранешни сопруги Барбара Бекер и Шарлели Лили Бекер, а ги криел и своите акции во компанијата „Брејкинг дата корп“.

Бекер, популарниот „Бум Бум“ освои пет гренд слем трофеи во кариерата и 49 титули во сингл, собирајќи над 25 милиони долари во наградни фондови. Ако е осуден, му се закануваат неколку години во затвор.