Атлетико Мадрид стигна до гостинска 0:2 победа кај Вилјареал за да ја продолжи низата на „жолтата подморница“ без победа, и да се врати на +5 предност пред Барселона на врвот на Ла лига, и тоа со натпревар помалку.

На „Керамика“, тимот на Диего Симеоне дојде во водство во 25. минута со автоголот на Алфонсо Педраза, а победата беше потврдена во 69. минута преку Жоао Феликс.

„Рохибланкос“ имаат 58 поени од 24 меча, пред Барселона со 53 од 25 меча и Реал Мадрид со 52 од 24 меча. Вилјареал се на седмото место со 37 поени.

Со голот на Анте Ребиќ, Милан стигна до трилер 2:1 победа на гостувањето кај Рома да ја прекине лошата серија од два порази во Серија А и да се доближи на четири поени од лидерот Интер.

Во првото полувреме имаше речиси се – обид со петица на Златан Ибрахимовиќ, многу шанси на двете страни, стативи, за на крајот во 43. минута „росонерите“ да дојдат во водство од пенал откако Фацио направи фаул на работ на шестнаесетникот, а Френк Кеси беше сигурен од белата точка.

Меѓутоа, во второто полувреме, Рома успеа да врати преку Жордан Верету во 50. минута, пред на сцена да стапи хрватскиот напаѓач Анте Ребиќ осум минути подоцна, со убав гол од свртување. Како што можат да забележат сите кои ги познаваат локалните јазици, потоа тој им упати сочна пцост на ривалите од Рома директно во камерата.

Милан сега има 52 поени, четири помалку од Интер, но дури шест пред Јувентус и Аталанта, додека Рома останува петта со 44 поени.

⚽️ GOOOAL ANTE REBIC !!!pic.twitter.com/c8KajbdQMY

— Milan Reports (@MilanReports) February 28, 2021

Можеби беше потребно гостување кај последнопласираниот тим во Премиер лигата, но лузерската серија од четири меча во низа на Ливерпул заврши, по 2:0 триумфот кај „отпишаните“ Шефилд јунајтед.

Отпорот на тимот кој веќе ја планира следната сезона во Чемпионшип беше скршен во 48. минута, кога Кертис Џонс доби „отпадок“ во шестнаесетникот и го совлада противничкиот голман. Во 66. минута, ударот на Роберто Фирмино го „закачи“ дефанзивецот на „блејдс“, Кин Брајан за 0:2 и победа на тимот на Јирген Клоп.

Покрај прекинувањето на лошата низа, трите поени ги носат Ливерпул на шестото место со 43 поени, еден зад петтопласираниот Челси и два зад Вест хем на четвртото место. Шефилд јунајтед остануваат на 11 поени на последното место, дури 15 од безбедната зона.