Македонија
(ВИДЕО) Доктор Георгиева: Од експлозија на петарда во дланка доаѓа до ампутација на рака

Над 80 проценти од повредените од пиротехнички средства се малолетни лица, велат статистиките на Клиниката за пластична хирургија. Доктор Гордана Георгиева во интервју за „Макфакс“ вели дека последиците од експлозија на петарди во дланка можат да бидат фатални и да доведат до целосна ампутација на дланката. Според неа, кампањата што ја спроведуваше Клиниката, но и МВР, дала плод. Бројот на повредени од пиротехника се намалува.
„Над 80 проценти од повредените од пиротехнички средства се малолетни лица. Кампањата што ја спроведовме минатата година во речиси сите основни училишта во Скопје даде плод. Учениците не ги знаат последиците кои може да се настанат од употреба на петардите. Мислам дека кампањите за подигнување на свесноста дадоа резултат. Од експлозија на пиротехника доаѓа до хедикеп, дури и ампутација на прст, но и цела дланка“, вели доктор Георгиева.
Тимот на Клиниката за пластична хирургија бил вчудовиден од основците, кои пред презентациите за последиците раскажувале какви сè петарди постојат, кажувале како ги употребувале и слично.
„Кога почнуваме со најавата на презентацијата, обично тие се повеќе информирани од нас за тоа какви типови на пиротехнички средства постојат, какви типови петарди. Тие се фалат, на пример: ‘Јас кога правам вака, таму ги најдов, вака ги употребуваме’. Ние бевме вчудовидени и изненадени од нивните познавања. Откако им укажавме на последиците, дека можат да останат без раце, изгорени, да повредат очи, влијаевме на тоа да се намали употребата или да не ги користат сами. Досегашната статистика донесе до тоа бројот на повредени од употреба на пиротехника да биде едноцифрен“, додава доктор Гордана Георгиева.
Најмладиот повреден пациент имал девет години, а непознавањето при употреба на пиротехниката придонесува до траен инвалидитет.
„Последните неколку години кога имаме повреда на возрасни луѓе е кога сакале да им помогнат на помладите во момент кога ги гледале дека ракуваат со пиротехнички средства, па во момент кога им ги одземаат да настане експлозија поради ненавремено гаснење“, посочи Георгиева.
Доктор Георгиева посочи дека тимот на Клиниката за пластична хирургија изминатава година имал бројни операции. Таа посочи дека тие се трудат да излезат во пресрет на сите пациенти кои бараат помош од нив.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Јанев на заокружување на обуката „Истрага на местото на настанот“, насочена кон унапредување на истражните капацитети на полициските сили

Директорот на Бирото за јавна безбедност Александар Јанев присуствуваше на свеченоста за доделување на дипломите, што се одржа во Центарот за обука на полицијата во Идризово, заедно со помошник министерот за внатрешни работи и началник на Центарот за обука, Влатко Митковски, како и со амбасадорот на Италија во нашата земја, Н.Е. Паоло Палминтери.
Обуката беше реализирана од Вишиот институт за истражни техники на карабинерите на Италија, со организациска поддршка од Италијанската амбасада во Скопје.
Учесниците на курсот имаа можност да стекнат напредни знаења и практични вештини за истражување на место на настан, притоа следејќи современи европски и меѓународни стандарди.
“Посебна благодарност упатувам до италијанските експерти за нивниот професионален ангажман и пренесеното знаење и сакам да истакнам дека како институција, особено ја цениме оваа соработка што претставува значаен чекор кон унапредување на капацитетите на нашата полиција и поддршка на владеењето на правото”, истакна директорот Јанев, додавајќи дека ова е уште еден показател за успешната и стратешки ориентирана билатерална соработка со Италија во областа на безбедноста и претставува дел од заедничките напори за градење побезбедно и посилно општество.
Македонија
Николоски учествува на висок министерски форум во Истанбул

Вицепремиерот и министер за транспорт Александар Николоски денеска и утре учествува на Форум за министри за транспорт што се одржува во Истанбул.
Во планираната агенда е предвидено обраќање на вицепремиерот Николоски на панелот насловен ,, Иновативни можности и решенија за финансирање на транспортни коридори” .
На Форумот ,,Глобална Транспортна Поврзаност” предвидено е да се обрати претседателот на Турција, Реџеп Таип Ердоган, министерот за транспорт на Турција, Абдулкадир Уралоглу како и други министри од Европа и светот.
На настанот ќе земат учество и бројни министри како што се министерот за транспорт на Шпанија, на Албанија, на Саудиска Арабија, Сингапур, Црна Гора, Обединетите Арапски Емирати, како и многу други високи претставници од институции од областа на транспортот.
Македонија
Сиљановска-Давкова прими припаднички на Армијата кои успешно завршија обука во САД

Претседателката Гордана Сиљановска-Давкова ги прими капетанката Неда Волчева и поручничката Сара Тасевска кои успешно го завршија седуммесечниот курс „Maneuver Captain’s Career Course“во Џорџија, САД, организиран од американскиот тренинг центар „Fort Moore”.
На средбата на којашто присуствуваа началникот на Генералштабот на Армијата, генерал-мајор Сашко Лафчиски и американската амбасадорка Анџела Агелер, двете припаднички на Армијата ја запознаа претседателката со фазите, содржините и квалитетот на воено-образовната обука и ги споделија нивните натамошни планови, заложби и амбиции за кариерен напредок.
Препознавајќи во нив потенцијал за идни генерали, Сиљановска-Давкова им честиташе на Волчева и Тасевска за успешно завршената обука и изрази уверување дека стекнатите знаења, вештини и експертиза ќе ги применат во интерес на македонската армија.
Според неа, реализацијата на оваа програма претставува влог во македонско-американското партнерство и е посебно значајна за промоција на земјава како лојален и кредибилен сојузник во НАТО.
Признавајќи ги одличните резултати што ги постигнуваат жените, соговорниците се согласија дека нивното партиципирање во меѓународните обуки треба да биде редовна пракса.
Сиљановска-Давкова на средбата ја реафирмираше својата заложба за формирање на Регионален центар за извонредност за жени, мир и безбедност со седиште во Скопје, заради промоција на жените во безбедноста и одбраната во регионот.