Турција и предложи на Русија конфликтот во Нагорно-Карабах да се реши со испробан метод, по примерот на сирискиот модел, изјави турскиот министер за надворешни работи Мевљут Чавушоглу.

Како што рече тој, би било добро што побрзо да се започне заедничка работа по тоа прашање, исто како што Москва и Анкара работеле во Сирија.

„Досега, овој конфликт не беше решен ниту на билатерално, ниту на мултилатерално ниво. Нерешениот конфликт само ја охрабрува Ерменија“, рече тој, додавајќи дека Азербејџан предолго ја толерирал ерменската окупација.

Според Чавушоглу, прашањето може да се реши и ако Ерменија ги повлече своите трупи од територијата на непризнатата република Нагорно-Карабах.

Турскиот министер соопшти и дека на таа тема се одржал разговор со рускиот претседател Владимир Путин и рускиот министер за надворешни работи, Сергеј Лавров.

Чавушоглу претходно изјави дека Турција е подготвена да го поддржи Азербејџан и на бојното поле и на преговарачката маса.

Азербејџан ќе ги продолжи своите воени операции сè додека Ерменија целосно не ги повлече своите сили од окупираните територии.

Ова денеска го рече постојаниот претставник на Азербејџан во ОБСЕ за време на вонредниот состанок на Постојаниот совет на таа организација.

„Баку се надева дека Минската група на ОБСЕ конечно ќе ја разбере сериозноста на намерите на Азербејџан и дека ќе побара целосно и безусловно повлекување на ерменските вооружени сили од окупираните територии. Дотогаш, Азербејџан ќе ги продолжи своите легитимни воени операции“, рече претставникот.

Тој смета дека решавањето на конфликтот е можно само врз основа на норми и принципи на меѓународното право и во меѓународно признатите граници на Азербејџан, со целосно почитување на суверенитетот и територијалниот интегритет на републиката.

Во меѓувреме, тамошните власти соопштија дека најмалку едно лице загинало, а три се повредени кога ерменските сили отвориле оган во јужниот азербејџански град Горадиз.

Ситуацијата во Нагорно-Карабах ескалираше на 27 септември, кога започнаа борбите на спорната територија. И Азербејџан и Ерменија прогласија воена состојба и воведоа мобилизација.

Двете земји беа дел од Советскиот Сојуз пред тој да се распадне во 1991 година. Тие веќе четири децении се во конфликт околу регионот Нагорно-Карабах, кој е меѓународно признат како дел од Азербејџан, но е под контрола на Ерменците.

Романија го забележа најголемиот дневен пораст на случаи на коронавирус, уште од појавата на пандемијата во земјата кон крајот на февруари.

Во последните 24 часа се регистрирани 2.158 нови инфекции, така што вкупниот број на заразени сега е над 128.000.

Романија, земја со повеќе од 19 милиони жители, досега потврди повеќе од 4.800 смртни случаи поврзани со вирусот.