Српските медиуми јавуваат за прв смртен случај од коронавирус во српската влада – починал државниот секретар.

Државниот секретар во Министерството за животна средина, Бранислав Блашиќ, починал од коронавирус, јавува B92.net повикувајќи се на неофицијални извори.

Бранислав Блашиќ е роден на денешен ден во 1957 година во Кикинда. Тој беше основач на Српската напредна партија и член на претседателството.

Околу 2.500 туристи спремаат тужба против ски-центарот Ишгл во Австрија поради лошо постапување за време на епидемија на коронавирус и ускратување на информации за заразата поради што голем број на луѓе заболеле.

Популарното тиролско скијалиште веќе е под истрага на властите во Инсбрук откако стотина случаи на заразени се поврзани токму со тоа скијалиште.

Локалните власти се обвинети дека реагирале предоцна по првите знаци на заразата во Тирол, посебно во Ишгл, што придонело за ширење на вирусот во Европа, но и во светот, јави Си-ен-ен.

(Фото: ЕПА)

Австриското Здружение за заштита на потрошувачите смета дека локалните власти се одговорни за доцната реакција на почетокот на епидемијата.

Само пет дена откако Здружението на својата веб-страница го објави повикот за тужба, се јавиле околу 2.500 луѓе, а околу 80 отсто од нив се Германци.

Ишгл и околните места имаат околу 500.000 посетители секоја зима.

Во Австрија досега се забележани повеќе од 10 илјади случаи на коронавирус, а само во Тирол 1.358. Од почетокот на епидемијата во земјата починале 128 лица.

Светската здравствена организација ќе упати 900.000 долари за поддршка на Северна Кореја, поради сузбивање на епидемијата на коронавирусот.

Северна Кореја соопшти дека во земјата се уште нема заразени од новиот вирус, но набљудувачите тврдат дека тоа е малку веројатно, пренесува Ројтерс.

Во Северна Кореја се на сила мерките за борба против вирусот, вклучително затворање на границите и воведување карантин за спречување на епидемијата.