Растот на новозаболени со коронавирус во Италија е стабилен – во изминатите 24 часа се регистрирани 1.766 позитивни на коронавирусот.

Расте бројот на пациенти кои се лекуваат на единиците за интензивна нега, а во моментов има 254 од нив, а бројот на смртни случаи од коронавирус во последните 24 часа е 17.

Последните денови, повеќе од сто илјади луѓе се тестираат на вирусот во Италија секој ден, а за време на викендите тој број е помал – во последните два дена биле тестирани 20.000 луѓе.

Најмногу заразени има во регионот Кампања – 245 нови случаи.

Во таа, како и во другите италијански региони, е во сила одлуката да се носи заштитна маска на отворено, почнувајќи од деца постари од 6 години, забрането е собирање, а баровите и рестораните работат до 22 часот.

Во Сицилија, мерката ќе биде воведена на 1 октомври и ќе трае цел месец, најави претседателот на регионот, Нело Мусумечи.

Исто така, на островот, сите посетители и локалното население што се враќаат од други земји мора да подлежат на брз тест за корона вирусот и да се пријават преку интернет на веб-страницата на регионалната здравствена установа.

Според изјавата на владиниот техничко-научен комитет задолжен за следење на епидемијата на коронавирус, во повеќето италијански региони Rt факторот, кој ја покажува стапката на ширење на вирусот врз основа на голем број параметри, е под 1, во некои 0,95, а ако ја премине линијата 1, тоа е знак дека Ковид-19 започнал експоненцијално да се шири.

Од почетокот на пандемијата во Италија, вкупно 309.000 лица се заразија со коронавирусот, од кои сто илјади во провинцијата Ломбардија, која беше епицентар на инфекцијата на врвот на пандемијата.

Вкупниот број на смртни случаи од почетокот на пандемијата во Италија е 35.835, а оздравеле 224.417 пациенти кои биле заразени.

Германската канцеларка Ангела Меркел го посетила рускиот опозициски лидер Алексеј Навални за време на закрепнувањето во берлинската болница „Шарите“.

Тоа укажува колку германската канцеларка сериозно и внимателно му приоѓа на овој случај, објавија германските медиуми.

Претставникот на Ангела Меркел не сакаше да ги коментира овие информации објавени од германски „Шпигел“.

Германската влада претходно соопшти дека тестовите спроведени во Германија, Франција и Шведска покажале дека Навални е отруен со нервен отров новичок и побара официјално објаснување од Кремљ.

Москва негираше каква било поврзаност со случајот.

Нерегистрираната белоруска организација за заштита на човековите права „Весна“ објави дека 339 лица биле лишени од слобода за време на вчерашните демонстрации во Белорусија.

Претходно, претставникот на белоруското Министерство за внатрешни работи, Олга Чемоданова, изјави дека безбедносните сили уапсиле околу 200 демонстранти за време на протестот, пренесува ТАСС.

Во извештајот на организацијата „Весна“ се наведува дека полицијата во неколку градови во Белорусија уапсила и истакнати белоруски новинари.

По официјалното објавување на резултатите од претседателските избори во Белорусија на 9 август и наводната убедлива победа на претседателот Александар Лукашенко, приврзаниците на неговата ривалка Светлана Тихановскаја одбија да го признаат поразот.

Оттогаш, во Белорусија се одржуваат протести, со чести судири меѓу демонстрантите и припадниците на белоруските безбедносни сили.