Претседателот на САД, Доналд Трамп, денес изјави дека неговата администрација наскоро може да има добри вести во врска со нејзините напори за ставање крај на речиси четиригодишната војна во Украина.

„Мислам дека се справуваме многу добро со Украина и Русија. Ова е прв пат да го кажам тоа.

Мислам дека може да имаме добри вести“, изјави Трамп пред новинарите во Овалната соба на Белата куќа, објави Ројтерс. Специјалниот американски претставник Стив Виткоф ќе присуствува на преговорите со делегациите на Русија и Украина во Абу Даби, објави денес Белата куќа.

Претходно, Зеленски објави дека следната рунда трилатерални преговори меѓу Украина, Соединетите Американски Држави и Русија за крајот на војната во Украина ќе се одржи на 4 и 5 февруари во Абу Даби, во Обединетите Арапски Емирати.

Портпаролот на Кремљ, Дмитриј Песков, денес изјави дека одложувањето на втората рунда мировни преговори за Украина во Абу Даби е резултат на несогласувања во распоредот на делегациите и дека нови разговори ќе се одржат на 4 и 5 февруари, пренесува Танјуг. На претходната средба во Абу Даби од 23 до 24 јануари, фокусот на преговорите беше ставен на крајот на војната и понатамошниот процес на мировни договори.

Норвешкиот премиер Јонас Гар Сторе го отфрли неодамнешното тврдење на американскиот претседател Доналд Трамп дека САД „никогаш не добиле ништо“ од НАТО. Зборувајќи на Безбедносната конференција во Осло во понеделник, Сторе рече дека колективната безбедност се заснова на личен интерес, а не на добротворност, објави агенцијата Анадолија.

„Звучи сосема погрешно кога американскиот претседател во Давос вели дека ние сме дале сè на НАТО, а Алијансата не дава ништо за возврат. Тоа е неточно. Едноставно неточно“, рече Сторе, додавајќи дека колективната безбедност „не е добротворна организација“, туку нешто што е „создадено од личен интерес“.

Сторе ги наведе американските закани со царини кон сојузниците и обидот за преземање на Гренланд како примери за промени во светот, опишувајќи ги како алатки за политички притисок. Затоа, тој ја нагласи потребата од продлабочување на европската соработка во областите на безбедноста, одбраната и трговијата, како и од преиспитување на улогата на САД во европската безбедност.

„Нашата цел е мудро да трошиме за одбрана, така што таа навистина ќе се вклопи во регионалните планови. Но, ќе направиме повеќе. Стратешки ќе ја продлабочиме нашата соработка со нашите водечки европски партнери, со Обединетото Кралство“, рече тој.

„Не заборавајте, пријатели, ЕУ е клучна за нашата безбедност. Но, земјите-членки на ЕУ претставуваат 20 проценти од воениот капацитет на НАТО. Околу 80 проценти доаѓаат надвор од ЕУ: САД, Канада, Турција, Велика Британија, Норвешка“, додаде тој.

НАСА денеска соопшти дека ја одложува мисијата за испраќање четворица астронаути на патување околу Месечината, откако за време на проверката на ракетата биле забележани технички проблеми.

Менаџерите на мисијата спроведувале детална проба на лансирањето, позната како „wet dress rehearsal“ (симулација на лансирање со полнење гориво), во Вселенскиот центар Кенеди на Флорида, кога инженерите откриле истекување на водород во основата на ракетата Space Launch System, пренесе Ен-Би-Си њуз.

Поради тоа, НАСА била принудена да го прекине тестот нешто по полноќ по источноамериканско време, при што останувале околу пет минути и 15 секунди до симулираното одбројување за лансирање.

Нешто по 2:00 часот наутро по источноамериканско време, НАСА соопшти дека се откажува од лансирањето на мисијата Artemis II околу Месечината, со цел тимовите да ги анализираат податоците и да изведат нова проба од типот „wet dress rehearsal“.

Според најавите, новото лансирање се планира најрано во март.

Агенцијата наведе дека на располагање има прозорци за лансирање од 6 до 9 март, како и на 11 март, а доколку биде потребно, и дополнителни датуми во април.

Претходната, беспилотна мисија Artemis I околу Месечината во 2022 година беше одложена за шест месеци поради истекување на водород, откриено за време на првата „wet dress rehearsal“ проба.

Со оглед на тоа што за првпат луѓе ќе летаат на ракетата Space Launch System и во капсулата Orion, влогот за мисијата Artemis II е исклучително висок.