Американскиот потпретседател Мајк Пенс во Анкара се сретна со турскиот претседател Реџеп Таип Ердоган, за да го убеди да ја запре офанзивата над курдските борци во североисточна Сирија. Турските власти се изјаснија дека операцијата, сепак, ќе продолжи.

Офанзивата создаде нова хуманитарна криза во Сирија со 200.000 раселени лица.

Трамп го обвинуваат дека ги предал курдските борци, главните партнери на Вашингтон, во борбата за уништување на самопрогласениот калифат на Исламска држава во Сирија, со повлекување на трупите од границата, по што Анкара ја започна офанзивата на 9 октомври.

Тој својот потег го бранеше како „стратешки одличен“.

Британските пратениците денеска гласаа за одржување на седница в сабота, што ќе биде прва одржана од 1982 година, за време на Фокландската војна на Велика Британија против Аргентина. На седницата во сабота, пратениците ќе гласаат за новиот договор за брегзит.

Велика Британија и Европска Унија денеска постигнаа нов договор за брегзит, што премиерот Борис Џонсон го оцени како „одличен“.

Се очекува Џонсон да има потешкотии при гласањето на договорот во Парламентот бидејќи против се северноирската Демократска унионистичка партија, која ја поддржува малцинската Влада, како и опозициските партии Лабуристички партија, Либералните демократи, Брегзит партијата и Шкотската национална партија.

Претседателот на Европска комисија, Жан-Клод Јункер денеска во Брисел по постигнувањето договор за брегзит ја исклучи можноста од какво било пролонгирање.

Го направивме тоа што го бараа, изјави албанскиот премиер Еди Рама., по состанокот со комесарот на ЕУ за соседска политика и преговори за проширување, Јоханес Хан во Брисел.

„Хан беше кристално јасен. Го направивме тоа што го бараа од нас. Но, покрај тоа што го направивме и тоа што треба да го направиме, се наоѓаме во ситуација во која Европскиот совет мора да одлучи што неговите членови сакаат или не сакаат да направат за своето семејство, со оглед дека важен член на семејството бара друг пристап на целото семејство во овој процес“ рекол Рама.

Тој додал дека треба да продолжат со реформите, бидејќи тоа е во интерес на албанските граѓани, а не за да ги задоволат Брисел, Лондон, Париз или Берлин.

„Мораме да обезбедиме авропска Албанија за нашите деца, со демократски институции, со институционални државни права, да ги исполните стандардите на економијата на ЕУ“ заклучува Рама.