Бугарското Министерство за надворешни работи им даде 72 часа на двајца руски дипломати да ја напуштат земјата. Обвинети се дека биле вклучени во шпионажа во таа балканска земја од 2016 година, соопшти денеска Министерството.

Портпарол на Министерството за надворешни работи изјави дека ја известил руската амбасада во Софија, пренесе „Ројтерс“.

Претходно, обвинителите објавија дека двајцата дипломати барале доверливи информации за плановите за модернизација на армијата и одржување на воената опрема од 2016 година.

Со нацрт-законот за градот Дервента, за кој се расправа во Националното собрание на Република Српска, се дефинира дека општината добива статус на град, рече министерката за администрација и локална самоуправа на овој ентитет, Сенка Јујиќ.

Објаснувајќи го овој предлог-закон во Националното собрание на Република Српска, Јујиќ потсети дека општина Дервента во 2019 година, врз основа на одлуката на општинското собрание, ја поведе постапката за доделување статус на град со доставување на оваа одлука до владата на Република Српска.

Таа додаде дека заедно со оваа одлука на општинското собрание е доставена студија за оправданоста на барањето за стекнување статус на град, која содржи историски претпоставки, географска положба, природни ресурси, демографски, социјален и економски развој, вработување и деловно работење во 2018 година, регионална интеграција и буџет.

Според неа, Дервента е развиена општина, која има социјален, економски, фискален и административен потенцијал, можност за градење, развој и одржување на инфраструктурата. Таа потсети дека законот за локална самоуправа предвидува дека град може да се основа со закон во урбана област која сочинува единствена географска, социјална, економска, историска и територијална единица со соодветно ниво на развој.

Јујиќ рече дека овој закон пропишува исполнување услови за добивање статус на град – да има повеќе од 50.000 жители и во последните три години, врз основа на одлуката за утврдување на нивото на развој на единицата за локална самоуправа, да има статус на развиена општина.

Маските за лице повеќе не се задолжителни во поголем дел од Нов Зеланд бидејќи случаите на Ковид-19 продолжуваат да опаѓаат.

Маските престанаа да бидат задолжителни во Окленд, срцето на неодамнешната епидемија, освен во јавниот превоз и во авионите. Остатокот од Нов Зеланд ги укина сите ограничувања поврзани со пандемијата во понеделникот кога не беа пријавени нови случаи за една недела.

Окленд продолжува да се соочува со ограничувања, но ублажени правила, кои дозволуваат да се соберат до 100 луѓе, објави Би-би-си.

Нов Зеланд е пофален за брзата реакција на Ковид-19, а секојдневниот живот во голема мера се врати во нормала кога земјата објави во јуни дека нема случаи на коронавирус. Но, вториот бран го погоди Окленд во август и најголемиот град во земјата се врати во привремена блокада, а другите градови исто така воведоа нови ограничувања.

Нов Зеланд забележа 1.468 потврдени случаи на Ковид-19 и 25 смртни случаи.