Свет
(Видео) Воз удри во автомобил во Полска

Полските државни железници (PKP) објавија драматично видео од несреќата во која воз удри автомобил на шините. Опасниот инцидент се случил откако возачот поминал низ спуштени рампи и застанал директно на шините на делницата помеѓу Граново и Стешев, објавува polsatnews.pl.
Според написите, сите служби за итни случаи – пожарникари, полиција и служби за итна медицинска помош, веднаш биле испратени на местото на настанот, а бил распореден и хеликоптер за спасување. Полицијата во Познањ потврди дека автомобилот го управувал 81-годишен маж.
Според извештајот, возачот поминал со возилото низ рампите кои веќе биле спуштени и се запрел на пругата. По судирот, тој бил однесен во болница и е во стабилна состојба.
Една недела по несреќата, Полските државни железници објавија видео од камера за надзор како дел од својата кампања „Безбедно преминување“. „Патничко возило заврши под возот на линијата Познањска главна станица – Волштин“, се вели во описот на објавеното видео.
Несреќата предизвикала прекин на железничкиот сообраќај на таа делница околу два часа, а за патниците бил организиран заменски автобуски превоз. PKP нагласи дека сите уреди на преминот работеле правилно.
„Секоја година, на железничко-патните премини се случуваат околу 170 несреќи, во кои загинуваат неколку десетици луѓе. Како дел од кампањата „Безбеден премин“, ја подигнуваме свеста за опасностите што произлегуваат од непреземање посебни мерки на претпазливост“, соопшти компанијата.
Фото: принтскрин
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Орбан: Подготовките за самитот Трамп-Путин во Будимпешта продолжуваат

Унгарскиот премиер Виктор Орбан изјави дека подготовките за состанокот меѓу американскиот претседател Доналд Трамп и рускиот лидер Владимир Путин во Будимпешта продолжуваат, иако самитот беше привремено одложен поради одбивањето на Москва да прифати прекин на огнот во Украина, јави Ројтерс.
Рускиот министер за надворешни работи Сергеј Лавров изјави дека барањето за итен прекин на огнот е спротивно на договорите постигнати на претходниот самит на Алјаска, предлагајќи наместо тоа привремено примирје.
„Министерот за надворешни работи Петер Сијарто е во Вашингтон. Подготовките продолжуваат, датумот сè уште е неизвесен. Кога ќе дојде време – ќе се одржи.“
Трамп, кој претходно најави средба во обид да го прекине војниот конфликт, изјави дека не сака да одржи „бесмислен состанок“, но најави дека во следните два дена ќе има нови информации.
Орбан, долгогодишен сојузник на Трамп, одржува и блиски односи со Москва, што често го става во судир со Европската унија.
Свет
(Видео) Во тешка несреќа со повеќе возила загинаа над 60 лица во Уганда

Teшка сообраќајна несреќа се случи на еден од главните автопати во Уганда, пришто животот го загубија 63 лица, потврди полицијата. Трагедијата се случила на автопатот Кампала-Гулу, еден од најпрометните во земјата, пишува Би-Би-Си.
Според полицискиот извештај, несреќата се случила 15 минути по полноќ по локално време. Два автобуси што се движеле во спротивни насоки се судриле челно додека се обидувале да избегнат камион и автомобил. Еден од автобусите одеднаш скршнал за да избегне судир, но со тоа предизвикал „фронтален и страничен судир“ што започнал „верижна реакција“. Во хаосот што следел, другите возила ја изгубиле контролата и се превртеле.
🔴 At least 63 dead in #Uganda bus crash
A tragic road accident involving two buses on one of Uganda’s busiest highways has killed at least 63 people and left several others injured, authorities confirmed on Wednesday. The crash occurred shortly after midnight on the highway… pic.twitter.com/ZS0jPbUV0m
— News.Az (@news_az) October 22, 2025
Покрај загинатите, повредени се и голем број патници од сите вклучени возила, кои се однесени во болница во градот Кирјандонго. Полицијата започна истрага за да ги утврди сите околности на несреќата. Тие ги предупредија возачите да избегнуваат „опасно и невнимателно престигнување“, посочувајќи дека таквото однесување е „една од водечките причини за сообраќајни несреќи во земјата“.
Свет
Повеќе од 850 експерти и јавни личности бараат запирање на развојот на вештачката интелигенција

Повеќе од 850 познати личности, меѓу кои водечки експерти за вештачка интелигенција, технолошки пионери и јавни фигури, во средата ја потпишаа изјавата со која се повикува на запирање на развојот на таканаречената „суперинтелигенција“ — форма на вештачка интелигенција што би ги надминала човечките способности во повеќето когнитивни задачи.
Изјавата ја потпишале основачот на „Вирџин груп“ Ричард Бренсон, коосновачот на „Епл“ Стив Возниак, како и научниците Јошуа Бенџио и Џеф Хинтон, познати како татковци на современата ВИ“. Меѓу потписниците е и Стјуарт Расел од Универзитетот Беркли.
Во документот се наведува дека развојот на вакви системи носи сериозни ризици од губење на слободата, достоинството и контролата, до закана за националната безбедност и можно исчезнување на човечкиот род.
Потписниците бараат мораториум на развојот на суперинтелигентни системи, сè додека не се постигне широк општествен консензус и научен договор за нивната безбедност и контрола, пренесе „Си-ен-би-си“.
Покрај технолошките и академските имиња, потписници има и од други области – универзитетски професори, верски лидери, медиумски личности и поранешни американски функционери од двете политички партии.
На списокот се најдоа и поранешниот началник на Генералштабот на американската армија Мајк Мален, поранешната советничка за национална безбедност Сузан Рајс, како и Стив Бенон и Глен Бек, блиски сојузници на американскиот претседател Доналд Трамп.
Интересно, меѓу потписниците се и принц Хари и Меган Маркл, што ѝ даде на иницијативата дополнителна глобална видливост. Организаторите наведуваат дека бројот на потписници и натаму расте.