Автобуси без возачи произведени од компанијата „Hyundai“ почнаа да се користат на патиштата во Сеул, главниот град на Јужна Кореја.

Според локалните медиуми, автобусите без возачи, почнаа да функционираат во областа Јонгно-гу.

Автобусите се движат помеѓу трговскиот центар Севун и плажата Чеонџе на растојание од околу три километри.

Автобусите без возачи можат да возат во одредена насока благодарение на камерите и ласерските зраци. Граѓаните можат да ги користат бесплатно по резервирање на место.

Новото возило, како што пишуваат медиумите, не личи на обичен автобус.

„Целосно е симетрично, со заоблени краеви и големи прозорци кои го прават да изгледа повеќе како играчка отколку како најсовремена форма на транспорт. Овој вид дизајн е намерен“, рече Јеонг Сеонг-Џун, шеф на проектот за автономно возење во стартапот 42 Dot, кој сега е во сопственост на јужнокорејскиот „Hyundai“.

Тоа е иднината“, изјави тој за АФП, додавајќи дека таков автобус бара „нов вид на извонреден дизајн“.

„Автобусот малку личи на „Лего“ бидејќи е направен од композитни делови за да ги намали трошоците и да го олесни реплицирањето“, објаснува Јеонг.

Според него, целта на компанијата била во иднина технологијата да биде евтина, безбедна и лесно пренослива на многу видови возила, на пример возила за испорака.

Засега, пак, со надзор на возачот, автобусот сам ќе вози по новата кружна рута долга 3,4 километри во центарот на Сеул, која ќе трае приближно 20 минути.

Патниците можат да влезат на една од двете назначени постојки, откако ќе резервираат бесплатно место преку апликацијата. Автобусот користи камера и ласер наместо скапи сензори за навигација, додаде Јеонг.

На денот на воведувањето на новата автобуска линија, многумина минувачи изгледаа заинтригирани од дизајнот на автобусот. Застанаа да го фотографираат и да ѕирнат внатре.

„Се чувствувам како да сум скокнал во временска машина возејќи во иднината“, коментираше еден 68-жител по возењето.

По неколкучасовна акција, лицата кои денеска паднаа во провалија во областа „Друма“ во Црна Гора се извлечени и предадени на итната помош на понатамошно лекување.

Двајца странски државјани паднале во провалија во месноста „Друма“ во општина Тузи, а акцијата за спасување започнала нешто по 15 часот, јавува РТЦГ.

Како што информираа од Црногорската Служба за заштита и спасување, едно лице се здобило со тешки телесни повреди, отворена скршеница на ногата, додека другото не е повредено.

Околу 2.500 голи волонтери позираа на утринското сонце на плажата Бонди во Сиднеј, Австралија, а идејата е на уметник кој сака да ја истакне важноста на лекувањето на ракот на кожата.

Инсталацијата е дизајнирана од американскиот фотограф Спенсер Туник, кој сака да ги поттикне Австралијците да одат на лекар на редовни прегледи и да ја проверуваат нивната кожа.

Законот беше променет и за првпат се дозволи голотија на оваа плажа.

Австралија има пропорционално најголем број на луѓе со рак на кожа, според Светскиот фонд за истражување на ракот.

Волонтерите почнаа да се собираат на плажата од 3.30 часот по локално време за да бидат дел од инсталацијата, која беше спроведена во соработка со добротворната организација „Skin Check Heroes“ за време на Неделата за подигање на свеста за опасноста од рак на кожата.

„Имаме можност да ја подигнеме свеста за важноста на кожните проверки и чест ми е што имам можност да дојдам овде, да работам на моите уметнички дела и да го прославам телото и заштитата“, рече фотографот Туник, пренесе Ројтерс.

Брус Фишер, 77-годишен маж кој учествувал во снимањето, за агенцијата АФП изјавил дека „половина од својот живот го поминал на сонце и дека му биле отстранети два малигни меланоми од грбот“.

„Мислам дека тоа е достојна причина и ми се допаѓа да се соблечам на плажата Бонди“, додава тој.

Туник е познат по тоа што создава фотографии од голем број голи луѓе на некои од најпознатите локации во светот.