Во последните 24 часа во Србија се потврдени 6.748 нови случаи на коронавирус, починаа 60 луѓе.

Епидемиологот и член на Кризниот штаб, Бранислав Тиодоровиќ, рече дека лекарите предложиле наставата да се префрли онлајн најмалку десет дена, но бидејќи тој предлог не е усвоен, не очекува епидемиолошката состојба да се стабилизира бидејќи бројот на заразени деца расте.

Властите секојдневно апелираат граѓаните да се вакцинираат бидејќи, како што велат, тоа е единствениот начин да се излезе од епидемијата.

Од денеска во Србија почнуваат со употреба ковид – пасошите, што треба да резултира со поголем број вакцинирани лица, а од понеделник, како што е најавено, ќе започне строга контрола на примената на пропишаните мерки.

Здравјето на чешкиот претседател Милош Земан „малку се подобри“, рекоа денеска неговите лекари.

„ Има причини за внимателен оптимизам“, изјави портпаролката на воената болница во Прага и додаде дека стручен тим ќе продолжи да го лекува 77-годишниот претседател, пренесоа чешките медиуми.

Земан беше префрлен на одделот за интензивна нега на 10 октомври и хоспитализиран поради компликации на една од неговите хронични болести, но деталите за дијагнозата не се познати.

Земан има клучна обврска да го додели мандатот за формирање влада по парламентарните избори на почетокот на октомври, на кои либерално-конзервативните опозициски партии освоија мнозинство места во Претставничкиот дом.

Уставната комисија на чешкиот Сенат во вторникот го прогласи претседателот Земан за неспособен да ги извршува своите должности. Таа одлука мора да биде потврдена од двата дома на чешкиот парламент, а претседателските должности потоа ќе бидат префрлени на премиерот и на претседателите на парламентарните домови.

Во Русија, петти ден по ред, е поставен нов рекорд, 1.075 починати од Ковид-19 и 37.678 нови инфекции во изминатите 24 часа, покажуваат официјалните податоци.

Од јуни Русија се соочува со нов бран на епидемијата, за кој се обвинуваат мутираните поагресивни соеви на коронавирусот, непочитување на мерката за носење маска и големи тешкотии со кои се соочуваат здравствените власти во кампањата за вакцинација, пренесува АФП.

Бројот на починати сега достигна 229.528, што ја прави Русија земја со најмногу смртни случаи од Ковид во Европа.

Но, статистичката агенција „Росстат“ смета дека податоците се многу потценети бидејќи компанијата броела повеќе од 400.000 мртви само до крајот на август.

Само една третина од Русите се вакцинирани откако првата национална вакцина, „спутник В“, се појави во декември 2020 година. Експертите сметаат дека ваквиот неуспех на кампањата за вакцинација може да се објасни со традиционалната недоверба на населението кон властите.

Рускиот претседател Владимир Путин во средата конечно го одобри владиниот предлог за неработна недела, за да се намали можноста за ширење на инфекцијата. Компаниите нема да работат од 30 октомври до 7 ноември, за да се спречи ширењето на вирусот.

Путин појасни дека неработните денови, кои ќе им се исплаќаат на вработените во некои региони, ќе почнат порано, а во некои може да се продолжат. „Епидемиолошката ситуација е различна во различни делови на земјата, поради што нивните лидери имаат право да воведат дополнителни мерки“, рече Путин.

Делумно заклучување ќе биде воведено и во главниот град Москва на 28 октомври, што значи дека ќе бидат отворени само продавниците во кои жителите ќе можат да се снабдуваат со намирници и средства за хигиена и аптеки.