Првиот контингент на вакцина против коронавирус на американската компанија „Фајзер“ и „Бајонтек“ пристигна во Велика Британија.

Вакцините се однесени во централниот магацин на непозната локација, од каде што ќе бидат дистрибуирани до болничките центри за вакцинација низ Велика Британија, пренесува „Би-би-си“.

Велика Британија ја одобри вакцината во средата и нарача 40 милиони дози, што ќе биде доволно за вакцинирање на 20 милиони луѓе.

Вакцините се произведени во Белгија и пристигнати во Британија преку Ла Манш.

Шпанската влада разгледува можност за воведување четиридневна работна недела, односно скреатено работно времне, за да не дојде до пад на вработеноста.

Лидерот на левичарската партија „Унидас Помедос“, Пабло Иглесијас изјави дека владата го разгледува предлогот за скратени работни часови за да го поттикне вработувањето.

Идејата за покуса работна недела може со години да се слуша ширум светот, но пандемијата на коронавирус и нејзиното влијание врз вработувањето поттикна многумина да размислуваат за економијата и општествените структури, пишува американската агенција „Блумберг“.

Многу фирми за врерме на пандемијата ги испратија вработените на принуден одмор, а некои ги отпуштија вработените.

Предлогот за промени на работната недела во Шпанија, владата ќе го претстави во рамки на социјалниот дијалог со синдикатите и здруженијата на работодавци.

Новоизбраниот претседател Џо Бајден рече дека ќе побара од Американците да носат маски во првите 100 дена од неговиот мандат за да се намали ширењето на коронавирусот.

Бајден за „Си-ен-ен“ изјави дека верува дека ќе има значително намалување на бројот на случаи на коронавирус, доколку сите граѓани носат маски, пренесува „Би-би-си“.

Бајден исто така рече дека ќе нареди да се носат маски во сите владини згради.

„Првиот ден по инаугурацијата ќе ја замолам јавноста да носи маски 100 дена. Само 100 дена под маски, не засекогаш“, рече Бајден.

САД имаат најголем број заразени и починати од последиците на коронавирусот во светот.

Во таа земја, регистрирани се 14,1 милион случаи на коронавирус, додека околу 276.000 луѓе починаа како резултат на инфекцијата.