Во Њујорк и во Вашингтон се одржа необичен протест на кој учествуваа луѓе што заработуваат повеќе од еден милион долари годишно и имаат богатство вредно и над пет милиони долари.

Протестите беа организирани од движењето „Патриотски милионери“, кое се бори за високи даноци за супербогатите Американци.

Во Вашингтон учесниците на протестот се собраа пред домот на првиот човек на „Амазон“, Џеф Безос, и носеа плакати со натписи „Оданочете ги богатите“.

Преку протестот патриотските милионери ги повикаа властите на САД да ги зголемат даноците за супербогатите.

Според членовите на движењето, најмногу даноци треба да плати Безос и сличните на него, кои купуваат недвижности и јахти вредни десетици милиони долари. Богатството на Безос се проценува на 185 милијарди долари.

Шефот на европската дипломатија, Жозеп Борел, денеска повика на итен прекин на насилството и прекин на огнот меѓу Израел и Палестина.

„Целта е да се заштитат цивилите и да се овозможи пристап на хуманитарна помош до Газа“, рече Борел по вонредниот состанок на министрите за надворешни работи на ЕУ додавајќи дека оваа изјава ја има поддршката на 26 од 27 земји членки на ЕУ, освен Унгарија.

Борел оцени дека големиот број цивилни жртви, вклучително и жени и деца, е неприфатлив.

„Ние ги осудуваме ракетните напади од Хамас и другите терористички групи на израелска територија и целосно го поддржуваме правото на Израел да се брани, но тоа треба да биде на пропорционален начин и со почитување на меѓународното хуманитарно право“, додаде Борел.

Борел исто така оцени дека е потребно вистинско политичко решение за безбедноста на Палестинците и Израелците. Иако сега приоритет е ставањето крај на непријателствата, високиот претставник на ЕУ истакна дека треба да се воспостави политичка рамка по тоа за да се најде решение за повеќедеценискиот конфликт меѓу двете страни.

Унгарија денеска одби да ја поддржи изјавата на ЕУ, со која се повикува на прекин на огнот меѓу Израел и Палестина велејќи дека ваквите ставови се делумни и небалансирани.

„Имам проблем со европските изјави за Израел воопшто. Тие не помагаат многу, особено во сегашните околности кога тензиите се толку големи“, изјави унгарскиот министер за надворешни работи, Петер Сијарто, за АФП.

Израелскиот премиер Бенјамин Нетанјаху денеска изјави дека земјата ќе го засили својот одговор на ракетните напади во следните неколку дена.

По состанокот со водачите на локалната заедница во Газа, тој рече дека воените операции ќе продолжат во следните неколку дена по што Израел ќе го засили својот одговор на каков било ракетен напад, пренесуваат израелските медиуми.

„Операцијата ќе трае уште неколку дена, а потоа ќе биде проследена со многу посилен одговор“, изјавил Нетанјаху.

Израелскиот премиер рече дека палестинскиот Хамас добил удари што не ги очекувал и дека Израел ја вратил екстремистичката организација назад со години.

Ова го изјавил Нетанјаху за време на посетата на воздухопловната база во близина на Бершева на југот на Израел додека се слушале сирени за ракетна тревога, пренесоа израелските медиуми.

„Нашите непријатели уводоа која цена треба да ја платат за агресијата против нас“, рече израелскиот лидер.

Тој најави продолжување на операцијата сè дури е потребно за да се врати мирот за граѓаните на Израел.

„Не се сомневам дека ги вративме многу години наназад“, рече израелскиот премиер.

Нетанјаху ја посети воената база на југот на земјата на деветтиот ден од конфликтот меѓу израелската армија и палестинските екстремистички организации во Газа, во кој беа убиени 213 Палестинци и 12 лица во Израел.