Европа
Жена во Турција почина ден откако беше извлечена од урнатините, била затрупана 104 часа

Жена почина денеска во болница, еден ден откако беше извлечена од урнатините на зграда во јужна Турција каде што беше заробена 104 часа под урнатините, соопштија спасувачите.
Германските спасувачи во петокот ја извлекоа 40-годишната Зејнеп Кахраман од урнатините во градот Кирихан во јужна Турција. Нејзиното спасување го нарекоа „чудо“ во време кога спасувачките тимови пронаоѓаат се повеќе тела по најсмртоносниот земјотрес во регионот во последните децении.
„Штотуку дознавме од нејзините брат и сестра дека Зејнеп за жал починала во болница“, рече Стивен Баер, шеф на германскиот меѓународен тим за спасување.
„Штотуку го информиравме тимот дека таа за жал починала. Ние сме уништени“, додаде тој.
Додека некои спасувачи ги задржуваа солзите и се тешеа меѓусебно, лекарот од тимот рече дека ризикот бил особено висок во првите 48 часа по толку комплицирана операција за спасување.
„На крајот на краиштата, таа навистина беше закопана повеќе од 100 часа. Не заробена, туку закопана“, објасни Питер Кауб.
Тој нагласи дека спасувачките напори не биле залудни.
„Да може да умре во прегратките на сопственото семејство и да може да ги живее последните моменти со семејството, секоја секунда е важна. По десет часа, откако ја започнавме операцијата за спасување, таа го имаше првиот човечки контакт и можеше да разговара со преведувачот и со нас, а потоа дури и со нејзиното семејство. И конечно, нејзиното семејство можеше да ја држи во раце“, рече Кауб.
Семејството на Кахраман претходно за „Ројтерс“ изјави дека спасувачите пристигнале два дена по земјотресот во понеделникот.
Германските работници успеале да стапат во контакт со жената додека се уште била длабоко под урнатините, каде преку црево и доставувале вода. Во еден момент и помогнаа на нејзината сестра да се спушти по скалата поблиску до Зејнеп за да разговара со неа.
Вкупниот број на загинати од земјотресот што во понеделникот ја погоди јужна Турција и северна Сирија сега надминува 25.000 лица.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Клучен руски радар уништен во Крим; Украина: Ова значително ќе ги отежни нивните напади

Украинските специјални сили извршија прецизен удар врз стационарниот радарски комплекс „Скала-М“ на привремено окупираната територија на Крим, објави украинскиот УНН.
Уништувањето на овој објект значително ќе ја намали способноста на Русите да го контролираат воздушниот простор и да користат авијација против цивилното население, според ССО (Сили за специјални операции на Украина).
Како што објави ССО, ноќта помеѓу 9 и 10 август 2025 година, единиците на Движењето на отпорот на Силите за специјални операции на вооружените сили на Украина спроведоа успешна операција во областа на населбата Абрикосивка на привремено окупираната територија на Крим.
Целта на украинските борци беше стационарниот радарски комплекс ТРЛК-10 „Скала-М“.
Овој советско-руски комплекс комбинира примарни и секундарни системи за откривање на воздушни цели, а негова главна задача е да го следи воздушниот сообраќај на рутите и во зоните на пристап. Со дострел до 350 км, „Скала-М“ е клучен елемент на системот за контрола на воздушниот сообраќај на руските сили, особено за координација на борбената авијација, според Украинците.
Според воените проценки, уништувањето на таков објект значително ќе го комплицира непријателското користење на авијацијата за напад врз цивилната инфраструктура и населбите. „Специјалните оперативни сили: секогаш надвор од дострел!“, нагласи командата на ССО.
фото: принтскрин
Европа
Туск: Путин користи идиоти за да посее раздор меѓу Киев и Варшава

Полскиот премиер Доналд Туск изјави дека рускиот претседател Владимир Путин оркестрира обиди за создавање поделби меѓу Украина и Полска. Туск предупреди дека иако решението за војната во Украина можеби се приближува, Русија прави сè што може за да посее раздор меѓу Киев и Варшава.
Во остра порака, Туск нагласи: „Анти-полските гестови на Украинците и поттикнувањето анти-украински расположенија во Полска се сценарио на Путин, оркестрирано од странски агенти и локални идиоти. Секогаш истото“.
Од почетокот на руската инвазија во 2022 година, Полска е еден од најважните и најверни сојузници на Украина. Сепак, кај некои делови од полското население расте незадоволството поради големиот број бегалци од соседната, воено разорена земја.
Овие тензии кулминираа со неодамнешен инцидент. На 9 август, најмалку 57 украински државјани беа наводно уапсени и депортирани од Варшава откако избувнаа немири на концерт на белоруски рапер.
фото: принтскрин
Европа
Германски министер за завршувањето на војната: Украинските отстапки се можни, но не сега

Германскиот министер за надворешни работи Јохан Вадефул изјави дека Европа не е само набљудувач кога станува збор за иднината на Украина. По средбата со колегите од ЕУ, Вадефул изјави за германскиот јавен радиодифузен сервис ZDF дека Европејците цврсто стојат заедно и дека затоа нивните гласови ќе бидат слушнати и во Вашингтон и во Москва.
Тој најави серија онлајн-состаноци утре, организирани од германскиот канцелар Фридрих Мерц, на кои ќе учествуваат лидерите на Франција, Велика Британија, Италија, Полска, Финска, генералниот секретар на НАТО и високи претставници на ЕУ, како и американскиот претседател, Доналд Трамп, и украинскиот претседател, Володимир Зеленски.
„Важно е Трамп да го чуе европскиот глас и добро е што Германија јасно го пренесува. Европејците имаат голема тежина, едноставно затоа што имаат заеднички став“, рече тој.
Вадефул нагласи дека Европа останува јасна дека преговорите за иднината на Украина може да се одржат само по договорено и почитувано примирје и дека самитот в петок би можел да биде само почеток на дискусиите за условите за почнување мировни преговори.
„Самиот факт дека Украина сега е подготвена да разговара за статус кво е веќе отстапка бидејќи Русија ја окупира украинската територија кршејќи го меѓународното право“, рече тој. Тој нагласи дека одлуките за иднината на Украина може да ги донесе само Киев. „Европејците не може да дозволат некој друг да одлучи за тоа. Ние нема да го сториме тоа ниту, пак, САД можат“.
Тој додаде дека идниот мировен договор може да вклучува отстапки од украинската страна, но дека ова е прашање за кое ќе се одлучува подоцна. Разговорите оваа недела, рече тој, служат за создавање фер услови за овие преговори.
Вадефул заклучи дека иднината на Украина е поврзана со европската безбедност и дека европските лидери нема да стојат настрана додека одлуките се носат зад наш грб. „Европејците ќе продолжат да стојат покрај Украина, како што правевме во текот на целата војна“, рече тој додавајќи дека Германија останува на чело на таа поддршка.
фото: принтскрин