Деталите од животот на Урош Пашајлиќ (38), белграѓанецот кој беше уапсен под сомнение дека ја злоставувал невенчаната сопруга и ја држел заробена својата осумгодишна ќерка во стан на Звездара со години, продолжуваат да ја шокираат јавноста во Србија.

Од неговото барање детето да му биде доделено откако било одземено од мајката, потоа грозоморното запоставување, па сè до несреќните обиди на Пашајлиќ да изгради кариера како инфлуенсер преку своите социјални мрежи – постапките на овој човек  предизвикуваат гнев и бес кај Србите, пишува „Нова.рс“.

Пашајлиќ моментално се наоѓа во притвор поради сомнение дека извршил кривични дела семејно насилство, злоупотреба и тортура и затоа што ја запоставил својата осумгодишна ќерка и решил да не изнесува одбрана пред обвинителот, но накратко изјавил дека употребувал наркотици и алкохол подолго време.

Грозоморните злодела на Пашајлиќ излегоа на виделина откако неговата невенчана партнерка отишла во полиција бидејќи Пашајлиќ ја нападнал, а патем им кажала на полициските службеници и дека мажот ја чува во заробеништво нејзината ќерка во станот на улицата Ружице Сокиќ во Ѕвездара.

Тогаш, едно по едно, почнаа да испливуваат страшните детали.

Најпрвин беше откриено дека девојчето живеело во ужасни, нехигиенски услови во станот на Пашајлиќ, дека татко и’ ја оставил без храна, сама. Никогаш не посетувала предучилишна установа или основно училиште, не била на доктор, ниту пак го напуштила овој стан. Затоа таа никогаш немала можност за нормален живот и „благодарение“ на низа пропусти на надлежните институции останала невидлива за системот.

Поради контрадикторните одговори на надлежниот Центар за социјална работа и Првиот основен суд во Белград, не е јасно како е можно детето, откога и било одземено старателството на биолошката мајка, да заврши кај нејзиниот татко, за кој претходно било утврдено дека е зависник и бил осомничен за насилство. Судот во одговорот на прашањата на редакцијата на „Нова.рс“ посочил дека во еден момент побарал детето да биде со него до завршување на судската постапка.

На прв поглед може да се заклучи дека Пашајлиќ навистина сакал да се грижи за својата ќерка, меѓутоа, деталите кои излегоа во јавноста не само што го покажуваат спротивното, туку ја откриваат целата монструозност од затворањето на девојчето.

Додека таа ги поминувала деновите затворена во тоалетот, нејзиниот татко продолжил да живее ергенски живот.

Неговите профили на Фејсбук, Инстаграм и Јутјуб се полни со детали од неговиот личен живот. Сепак, од ниту еден пост не може да се заклучи дека тој воопшто има ќерка. Очигледно се обидел да ја држи подалеку од очите на јавноста и во виртуелниот свет. На едно од тие видеа се гледа како лежи во кадата полна со вода каде полицајците го пронашле девојчето кога упаднале во станот.

Видеото ги покажува неговите стапала во када полна со вода која полека истекува.

Тој се испробал и во улогата на „гејмер инфлуенсер“, така што се објавувал додека игра игри, а споделувал и фотографии од одмори, автомобили од различни модели и вредности. На одредени објави ги охрабрува своите следбеници на интеракција, барајќи од нив да му напишат во коментар како се чувствуваат и слично.

Веднаш по упадот на полицијата во станот, на девојчето му била укажана лекарска помош на Универзитетската детска клиника во Тиршова.

„Девојчето е примено во УДЦ Тиршова на рехидратација и реалиментација која и е неопходна поради тешка и долготрајна неухранетост“, велат од таа институција.

Според информациите на „Нова.рс“, девојчето е во исклучително лоша состојба. Храната ја добива преку инфузија, а откако ќе го опорави метаболизмот, следните чекори се разговор со психолози и социјализација.

Во Атина е спречен терористички акт од големи размери организиран од странство. Планиранaта цел на терористите била еврејски ресторан-синагога во центарот на градот, во Псири, а нападот да биде извршен за време на велигденските празници во Грција.

Трагедијата е навреме избегната благодарение на заедничката акција на грчката полиција и разузнавачката служба, во соработка со израелската разузнавачка служба, пишува „Политика“.

За планираниот напад, приведени се двајца Пакистанци кои подолго време биле на територијата на Грција и постапувале по наредба на трето лице од Иран кое се смета за „мозок“ на акцијата. Кај уапсените се пронајдени телефони со кореспонденција и информации кои потврдуваат дека веќе бил утврден датумот, местото и списокот на лица кои ќе бидат вклучени во целата акција, се вели во соопштението на грчката полиција.

Уапсените Пакистанци биле подолго време следени, особено по информациите на израелската разузнавачка служба Мосад дека веќе биле гонети на Кипар и Истанбул за планирање напади врз израелски објекти во тие земји. Истрагата во Грција започна на крајот на минатата година. Во телефонот се пронајдени и видео снимки од објектот каде требало да извршат вооружен напад. Како уште едно решение се споменувал и отровнен гас, но најпосле било одлучено тоа да биде експлозија организирана во време кога синагогата ќе биде полна и ќе има многу луѓе и туристи на улиците поради Велигденски празници, иако главната намера на терористите не била да ги напаѓаат грчките цели.

Хрватскиот министер за одбрана, Марио Баножиќ, изјави во Одеса дека очекува набргу во таа земја да пристигнат 14-те транспортни хеликоптери што Хрватска ѝ ги донира на Украина.

Неговиот украински колега Олексеј Резников изјави дека се размислува за обука на украински инструктори за деминирање во Хрватска. Баножиќ вчера беше во еднодневна посета на Украина, каде што во Одеса се сретна со својот украински колега Резников.

На прес-конференцијата како одговор на прашање на украински новинар рече дека очекува набргу да биде завршен трансферот на хеликоптерот. Хрватска ѝ донира на Украина 14 транспортни хеликоптери, од кои дванаесет се модели МИ 8 МТВ-1 и два модела МИ 8 Т. Резников ја нарече Хрватска голем пријател на Украина и му се заблагодари на Баножиќ за неговиот личен ангажман во помагањето на Украина.

„Вашите луѓе ја знаат трагедијата на Вуковар, знаат каков е споменот на загинатите, какво е мачењето на цивилите. Знаете како да ја зајакнете одбраната кога имате непријател“, изјави украинскиот министер, пренесе „Хина“. Украина ја доби првата помош од Хрватска на 28 февруари, четири дена по почетокот на инвазијата.

„Братската нација Хрватска помогна да се спротивстави на руската агресија, но и ги протера своите сили од области како Харков, Суми и Киев“, рече Резников.

Тој додаде дека Хрватска има одлично искуство во деминирање и затоа се размислува за обука на украински инструктори во Хрватска.

Баножиќ истакна дека хрватскиот народ, поради искуството од татковинската војна, знае низ што поминува Украина, дека стои на нејзина страна, дека оваа поддршка ќе продолжи колку што е потребно и дека е убеден во победата на Украина. Тој на Резников му подари реплика на водената кула Вуковар и телото на неактивирана граната во калибар од 120 милиметри, што била испукана кон неговото родно Винковци за време на татковинската војна.

Украинскиот министер на Баножиќ му подари шрапнели и традиционална украинска кошула, соопшти Министерството за одбрана.