Европската унија ќе одвои 600 милиони евра за зајакнување на границата на Бугарија со Турција, изјави денеска државниот секретар во бугарското МВР, Петар Тодоров.

Тој рече дека претседателката на Европската комисија, Урсула фон дер Лајен, во ја информирала Владата на Бугарија дека Комисијата одржала состанок за нов стратешки пристап за заштита на надворешната граница на ЕУ и оти Бугарија е приоритет.

„За зајакнување и техничка изградба на нашата граница ќе бидат издвоени повеќе од 600 милиони евра. Таму имаме над 110 километри технички необезбедена граница, а има што да се направи и на другите 200 километри“, посочи тој.

Според него, парите ќе бидат потрошени за опрема, камери, сензори и автомобили.

Во првите три месеци приливот на мигранти е зголемен за 43 отсто во однос на лани, а како што се наведува, лицата кои се занимаваат со нелегална трговија доаѓаат од сите слоеви.

Косовската претседателка Вјоса Османи порача дека Косово нема да се откаже од основниот договор и дека Србија мора да почитува сè што е договорено во Охрид, пишува „Косово онлајн“.

„Српската страна не почитува ниту еден договор произлезен од дијалогот“, изјави Османи за приштинските медиуми.

„Србија и по 24 часа од средбата во Охрид, не го почитуваше договорот, како што беше случај и во февруари, што докажува дека дијалогот за неа нема никаква политичка или правна вредност. Текстот на основниот договор останува ист и не се менува, така што членот 4 од тој договор, кој ја обврзува Србија да не се противи на членството на Република Косово во ниту една организација, останува во сила“, рече Османи.

Претседателот на Албанија, Бајрам Бегај, имаше средба со секретарот на Светата столица за односи со држави и меѓународни организации, надбискупот Пол Ричард Галагер, кој е во официјална посета на Албанија.

Истакнувајќи ги одличните односи меѓу Албанија и Ватикан, но и духовните односи на албанската католичка заедница и Светата столица, Бегај ја поздрави посетата на Галагер на Тирана и оцени дека тоа е потврда за добрите односи.

Бегај особено се осврна на исклучителната улога и придонес што Светата столица ја имал во напорите за постигнување мир и стабилност во регионот на Западен Балкан.

Во тој контекст тој го повторил барањето за признавање на Косово од страна на државата Ватикан, признание, кое, како што наведе, ќе послужи како голема поддршка за најновата држава во Европа.

Бегај ја истакнал потребата од зголемена поддршка од сите важни актери за Косово и неговите граѓани, како и за дијалогот меѓу Косово и Србија, кој е поддржан од Европската Унија и САД.

Соговорниците се осврнале и на влијанието на руската воена агресија врз Украина на Балканот и на свеста за значењето што овој регион го има за стабилноста на европскиот континент, се наведува во соопштението.