Водечките медиуми од САД, Велика Британија и Европа повикаа на прекин на судската постапка што се води во САД против основачот на „Викиликс“, Џулијан Асанж, со кого соработувале.

Уредниците и издавачите на „Гардијан“, „Њујорк Тајмс“, „Мондо“, „Шпигел“ и „Ел Паис“ во отворено писмо повикаа на ослободување на Џулијан Асанж, пренесува Ројтерс.

„Ова обвинение претставува опасен преседан и се заканува да го поткопа првиот амандман на САД и слободата на печатот“, нагласуваат во писмото и велат дека „објавувањето не е кривично дело“.

Американските власти го бараат Асанж по 18 точки од обвинението, вклучително и шпионажа, објавување доверливи воени досиеја и американски дипломатски телеграми.

Во понеделникот се навршија 12 години откако „Викиликс“ објави повеќе од 250.000 документи, кои Асанж ги добил од поранешната разузнавачка аналитичарка Челзи Менинг.

Според „Викиликс“, документите разоткриле корупција, дипломатски скандали и шпионажа на САД на меѓународно ниво.

Асанж помина седум години во амбасадата на Еквадор во Лондон, пред британската полиција да го уапси во 2019 година поради прекршување на условите за кауција.

Тој е во затвор во Лондон, додека се одлучува за негова екстрадиција.

Доколку биде екстрадиран во САД, му се заканува затворска казна до 175 години.

Русија најверојатно ќе продолжи да ги напаѓа украинската електрична мрежа, гасната инфраструктура и основните услуги за луѓето, изјави генералниот секретар на НАТО Јенс Столтенберг, додавајќи дека рускиот претседател сака да ја искористи зимата како оружје за војна.

„Да го правиме ова додека влегуваме во зима покажува дека претседателот Путин сега се обидува да ја искористи зимата како оружје за војна против Украина“, изјави Столтенберг за новинарите во Букурешт пред дводневниот состанок на министрите за надворешни работи на НАТО во вторник и среда, пренесува „Ројтерс“.

Столтенберг рече дека очекува НАТО да ја забрза испораката на системи за противвоздушна одбрана во Украина, пишува dpa.

„Една од пораките“ на состанокот на НАТО во Букурешт ќе биде потребата од „забрзување“ на испраќањето повеќе системи за противвоздушна одбрана, муниција и резервни делови во Украина, како и зајакнување на обуката на украинските војници, додаде тој.

Италијанската полиција уапси брачна двојка од Босна и Херцеговина, родители на 14-годишно девојче кое било принудувано да проси.

Девојчето било принудено да проси пред локалните продавници, а тие не ѝ давале храна и потоа ја затворале во куќата.

Откриено е и дека девојката за пари биле ветена на постар маж, иако таа јасно го одбила тоа.

На крајот, таа во солзи дошла сама во полициската станица и упатила тешки обвиненија против 41-годишниот татко и 36-годишната мајка, пишува италијанскиот Secolo d’Italia.

Таа сега е сместена во безбедна куќа, каде што е под надзор и заштита на полицијата и персоналот.

Полицијата проверува дали и нејзините браќа биле изложени на малтретирање.