Илјадници деца во Сиднеј денеска се вратија на училиште по неколкумесечно учење од далечина, бидејќи најголемиот град во Австралија, поттикнат од зголемените стапки на вакцинација, продолжува да ги олеснува ограничувањата за Ковид-19.

Маските повеќе нема да бидат задолжителни во канцелариите, а повеќе луѓе ќе можат да се собираат дома и на отворено, откако сојузната држава Нов Јужен Велс, каде се наоѓа Сиднеј, достигна стапка на вакцинација од 80 проценти за лица над 16 години.

„ Ова не е готово, има уште долг пат, рече денеска премиерот на Нов Јужен Велс, Доминик Перо, повикувајќи ги луѓето строго да ги почитуваат преостанатите здравствени прописи.

Нов Јужен Велс денеска пријави 265 нови случаи на коронавирус, што е најнизок дневен скок во последните 10 недели и значително под максималниот број од 1.599 регистрирани во почетокот на септември. Соседна Викторија пријави 1.903 нови случаи, што е зголемување од 1.838 претходниот ден. Главниот град на таа земја, Мелбурн, е на пат да започне да излегува од блокадата во која беше речиси девет месеци, бидејќи вакцинацијата се приближува до стапката од 70 проценти.

Некои австралиски држави, кои немаат пријавени случаи на вирус, соопштија дека ќе ги држат затворени внатрешните граници од страв дека повторното отворање може да го совлада нивниот здравствен систем. Спротивно на тоа, федералната влада соопшти дека од утре ќе издаде пасоши за вакцинација за меѓународни патувања, клучен чекор во плановите да им се овозможи на австралиските граѓани да патуваат во странство од следниот месец.

Со приближно 145.000 случаи на коронавирус и 1.543 смртни случаи, изложеноста на Австралија на пандемијата на коронавирус беше релативно ниска.

„ Блокадата ќе остане во сила уште две недели во најголемиот град на Нов Зеланд, Окленд, поради борбата против епидемијата на делта-сојот, изјави премиерката на Нов Зеланд, Џасинда Ардерн.

Нов Зеланд се бори со епидемија на делта-сојот што се прошири надвор од Окленд и соседните региони, и покрај острите мерки и затворање на границите. Ардерн посочи дека нема да има промена во социјалните ограничувања што беа во сила во Окленд во изминатите 62 дена.

Двајцата мажи се пренесени во болница откако биле избодени со нож во трговски центар во Мелбурн.

И двајцата се здобиле со повреди опасни по живот за време на нападот на плоштадот Беркли, во предградието на Бранзвик, кој бил извршен нешто по осум часот наутро, и тие биле пренесени во болница во стабилна состојба, пренесува британскиот весник „Гардијан”.

„ Прво слушнавме само врескање, но не обрнувавме многу внимание на тоа, но потоа рече бегај, има некој со нож!“ изјави работник во месарница што се наоѓа во близина на нападот.

Тој и другите работници се засолниле во задниот дел на продавницата, пред полицијата да ги евакуира половина час подоцна.

Очевидци на настанот велат дека трговскиот центар бил евакуиран и дека сите вработени останале затворени во своите продавници.

Еден маж бил уапсен на лице место и со повреди бил пренесен во болница.

Полицијата изјави дека не бара ниту едно лице и дека нема закана за заедницата.

Мјанмар ќе ослободи од затвор повеќе од 5.636 лица уапсени за учество во протестите против владејачката хунта, објави државната телевизија, преку која водачот на хунтата, генерал Мин Аунг Хлаинг, рече дека владата работи за мир и враќање на демократијата.

Амнестијата е донесена од хуманитарни причини, се вели во соопштението и се обвинуваат илегалните опозициски групи за поттикнување немири.

Шефот на воената хунта во Мјанмар и извршителот на државниот удар Мин Аунг Хлаинг ја бранеше улогата на неговата воена влада, за која вели дека се обидува да воспостави ред и мир, и ја обвини опозицијата за насилство.

Во телевизиско обраќање, водачот на државниот удар повтори дека хунтата презема чекори во процесот за враќање на демократијата, но дека за некои од барањата на специјалниот пратеник на АСЕАН не може да се преговара.

Тоа е прва реакција на Мин Аунг Хлаинг по вчерашната одлука на АСЕАН да го исклучи од самитот од 26 до 28 октомври, на кој наместо него покани „аполитички претставник“ на Мјанмар.