Хрватскиот институт за јавно здравје денеска објави дека сите контакти на заразените со омикрон варијантата на коронавирусот одат во 14-дневен карантин, без оглед дали се вакцинирани или веќе прележале Ковид-19.

„Доколку изворот е заразен со омикрон варијанта или постои епидемиолошки сомнеж дека се работи за тој вид, сите контакти, без разлика на статусот на вакцинација и прележана болест, ќе подлежат на 14-дневен карантин и треба да се тестираат со ПЦР тест на почеток и на последниот ден од карантинот“, стои во ревидираните препораки, а пренесе агенцијата „Хина“.

Хрватскиот завод исто така наведува дека ако варијантата на омикрон е исклучена со секвенционирање, 14-дневниот карантин се прекинува, а контактите понатаму се третираат како оние изложени на веќе присутните варијанти на вирусот.

Хрватскиот завод за јавно здравје синоќа го потврди третиот случај на омикрон варијантата на коронавирус.

Официјален Минск од следната година ќе воведе ембарго на стоки од земји кои водат непријателска политика кон Белорусија, соопшти прес-службата на Советот на министри.

Според декретот на белоруската Влада објавен денеска, забраната за увоз се однесува на одредени стоки од ЕУ, САД, Канада, Норвешка, Албанија, Исланд, Велика Британија, Црна Гора, Северна Македонија и Швајцарија, пренесе агенцијата ТАСС.

„Имајќи ги предвид континуираните обиди на колективниот Запад за незаконски санкционен притисок врз нашата земја, Белорусија презеде соодветни мерки. Според одлуката донесена од Владата, ембаргото за храна ќе биде воведено од 1 јануари 2022 година во однос на широка листа на стоки произведени во земји кои спроведуваат дискриминаторска политика и вршат непријателски дејствија против нашата земја“, се наведува во соопштението.

Белорусија од овие земји увезла храна во износ од над 530 милиони долари во рок од десет месеци годинава, соопшти белорускиот Совет на министри.

Листата вклучува прехрамбени производи особено свинско месо, говедско месо, сушено или чадено месо, колбаси, зеленчук, овошје, јаткасти плодови, кондиторски производи, сол итн.

Речиси 70 медицински работници кои присуствувале на голема божикна прослава во јужна Шпанија се заразиле со коронавирус, соопштија денеска тамошните власти.

Според Би-би-си, повеќето од 68-те заразени се лекари и медицински сестри кои работат на одделот за интензивна нега во регионалната болница во Малага.

Здравствените власти соопштија дека сите биле на забава минатата среда на која присуствувале околу 170 луѓе.

Во соопштението се додава дека заразените медицински лица се целосно вакцинирани и дека немаат никакви симптоми на вирусот.

Во локалните извештаи се наведува дека лекари и медицински сестри од други одделенија на регионалната болница во Малага се прераспределени за да ги заменат своите колеги.

Епидемијата ја зголеми загриженоста за ризикот од ширење на Ковид-19 на групните настани за време на Божик, а здравствените власти во Андалузија го советуваа медицинскиот персонал да не присуствува на божикните забави, јавува Би-би-си.

Како и многу европски земји, Шпанија бележи зголемување на инфекциите со коронавирус во последните недели, што предизвика страв од четврти бран како што се приближуваат постудените зимски месеци.