Холандскиот премиер во заминување Марк Руте изјави дека сака да го спречи третиот бран на коронавирусот, поради што ќе се воведе полициски час од 20:30 до 4:30 часот наутро. Ова е прв пат по Втората светска војна, холандската влада да предложи полициски час.

Руте рече дека полицискиот час ќе биде воведен веднаш штом одлуката биде одобрена во парламентот, пренесува холандската телевизија Нос. Тој додаде дека за време на полицискиот час, движењето на луѓето на улица ќе биде целосно забрането, со некои исклучоци, како што се работа или прошетка на кучиња. Казната за кршење на полицискиот час ќе биде 95 евра.

Руте исто така рече дека забраната за летови кон Велика Британија, Јужна Африка и Јужна Америка ќе биде воведена од сабота.

Во Германија е регистриран прв смртен случај по втората зараза со коронавирус, што е трет случај од ваков вид во светот.

Починатиот за прв пат заболел од коронавирус во април минатата година, а по втор пат во декември. Тој не ја преживеа втората инфекција.

Починатиот човек живеел во областа Фројденштат, објавија здравствените власти на Штутгарт.

„Пациентот починал од Ковид-19 поради пневмонија и сепса, со откажувања на повеќе органи“, објавија надлежните органи.

Станува збор за маж на возраст од 73 години, кој, по првата инфекција, очигледно не стекнал силен имунитет.

Германските власти посочуваат дека се мали шансите некој по вторпат да се зарази со коронавирус, но има индивидуални случаи кога пациентите не создале доволно антитела.

Научниците од Универзитетот во Оксфорд се подготвуваат што поскоро да произведат нови верзии на вакцина, кои ќе можат да се борат со уште позаразни видови коронавирус.

Тимот кој стои зад вакцината од Оксфорд и „Астра зенека“ спроведува студии за адаптирање на технологијата за производство на нови верзии на вакцината, пишува британски „Телеграф“.

Портпаролот на универзитетот рече дека Оксфорд внимателно го следи влијанието на откриените нови видови коронавирус во Велика Британија, Јужна Африка и Бразил врз имунитетот обезбеден од нивната вакцина и ги проценува процесите потребни за адаптација на вакцините што е можно побрзо во борбата против мутациите на Ковид-19.