Свет
Медведев: Лоши вести за Мерц и за Макрон – Трамп е жив

Заменик-претседателот на Советот за безбедност на Русија, Дмитриј Медведев, изјави дека вестите за активностите на руската армија во украинскиот конфликт, како и фактот дека американскиот претседател Доналд Трамп е жив, се лоша комбинација за европските лидери, како што се германскиот канцелар Фридрих Мерц и францускиот претседател Емануел Макрон.
Во објава на своите профили Медведев истакна дека западните политичари вознемирено ги следат настаните на фронтот, но се свесни и дека Трамп, кој се залага за мирно решение на кризата, останува клучен фактор на светската сцена. Како илустрација, тој прикачи снимка од екранот на која Мерc и Макрон се наречени идентични близнаци и ретки изроди.
„Едниот копнее за одмазда, а другиот, ‘петелот’, се плаши од предаторот на портата и дури се обидува да го уценува Трамп со рускиот претседател Владимир Путин“, изјави Медведев.
Францускиот претседател претходно изјави дека, доколку средбата меѓу Путин и украинскиот лидер Володимир Зеленски не се одржи набргу, Москва ризикува нов пакет-санкции. „Доколку ветената билатерална средба не успее, тоа ќе значи дека Путин повторно го надмудри Трамп“, рече Макрон додавајќи дека Европа не смее да биде наивна во однос на Русија.
Во исто време, францускиот политичар Флоријан Филип, лидер на партијата Патриот, го обвини Макрон дека ја демонизира Русија во интерес на Брисел. Според него, францускиот претседател се обидува да создаде атмосфера погодна за испраќање француски војници во Украина, што дополнително би ја продлабочило кризата.
Медведев, кој отворено и остро коментира за политиката на Западот во последните месеци, со овој настап повторно го насочи вниманието кон длабоките поделби во рамките на трансатлантскиот блок. Додека Париз и Берлин бараат нови санкции и сè посилна посветеност на Европа на воената стратегија, Москва продолжува да нагласува дека клучот за решение лежи во преговорите – во кои, како што верува Кремљ, Трамп може да игра значајна улога, според анализите на светските медиуми.
Фото: принтскрин
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Осомничениот во случајот со Медлин Мек Кен: „Вратете ми го животот!“

Кристијан Брукнер, осомничен во истрагата за исчезнувањето на Медлин Мек Кен, за првпат јавно проговори по излегувањето од затвор. Во интервју за „Скај њуз“ рече дека е жртва на „лов на вештерки“ и побара да му се врати нормалниот живот.
„Не се чувствувам слободен. Носам нараквица и под 24-часовен надзор сум. Сакам ова да престане и некој да преземе одговорност,“ изјави Брукнер.
Тој се обиде да влезе во канцеларијата на германскиот обвинител Ханс Кристијан Волтерс, кој претходно јавно тврдеше дека има докази дека Брукнер ја киднапирал и убил Медлин, иако призна дека тие не се доволни за подигнување обвинение.
Брукнер (49) неодамна беше ослободен по издржана казна за друго кривично дело. Германските медиуми јавуваат дека по неговото ослободување бил сместен во привремено живеалиште, но по јавниот притисок и протестите на граѓаните, бил преместен од градот Нојминстер.
На директно прашање дали има врска со исчезнувањето на британското девојче, Брукнер одговори дека по совет на адвокатите нема да зборува на таа тема.
Тригодишното девојче исчезна од апартмански комплекс во Праја да Луз во Португалија на 3 мај 2007 година, што предизвика истрага низ цела Европа и стана еден од најпознатите случаи на исчезнати лица. Нејзините родители вечерале со пријателите во блискиот ресторан додека таа и нејзините помали браќа и сестри близнаци спиеле во станот. Нејзината мајка Кејт открила дека Медлин ја нема околу 22 часот по локално време.
Случајот останува нерешен, но германските обвинители велат дека имаат докази кои сугерираат дека Брикнер можеби бил во областа кога исчезнала Медлин. Волтерс рече дека иако тој и другите обвинители не веруваат дека имаат доволно докази за формално да го обвинат Брикнер во случајот Меккен, нивните напори ќе продолжат.
Свет
Нетанјаху стигна во Белата куќа, Трамп уверен дека ќе има мир во Газа

Израелскиот премиер Бенјамин Нетанјаху денеска пристигна во Белата куќа, каде што беше пречекан од американскиот претседател Доналд Трамп, јави Би-Би-Си.
За време на кратката средба пред новинарите, на прашање дали верува дека наскоро ќе биде постигнат мир во Газа, Трамп одговори: „Да, многу сум уверен.“
Двајцата лидери потоа се упатија на затворен состанок во Овалната соба, каде што се очекува да разговараат за нов мировен предлог од 21 точка. Подоцна е најавен заеднички ручек и прес-конференција, на која ќе бидат соопштени повеќе детали од разговорите.
Свет
Емиратите го притискаат Нетанјаху да го прифати планoт на Трамп за Газа

Обединетите Арапски Емирати го повикаа израелскиот премиер Бенјамин Нетанјаху да ја поддржи мировната иницијатива на американскиот претседател Доналд Трамп за Газа и да се откаже од плановите за анексија на Западниот Брег, јави „Ројтерс“ повикувајќи се на дипломатски извори.
Емиратите, кои ги нормализираа односите со Израел во рамки на Абрахамските договори, предупредија дека евентуална анексија би ја блокирала можноста за понатамошна нормализација со водечките арапски и муслимански држави, вклучително и Саудиска Арабија и Индонезија.
Ставот на Абу Даби му бил пренесен на Нетанјаху од шефот на дипломатијата на Емиратите, шеик Абдулах бин Зајед, на средба во Њујорк за време на Генералното собрание на ОН.
Во меѓувреме, Нетанјаху престојува во Вашингтон, каде што денеска има средби со Трамп. Се очекува двајцата лидери да разговараат за нов мировен предлог од 21 точка за Газа, а подоцна е најавена и заедничка прес-конференција.