Свет
Меј: Британија е внимателна поради „дестабилизирачките“ активности на Иран

Британската премиерка Тереза Меј изјави пред својот израелски колега Бенјамин Нетанјаху дека Лондон го поддржува нуклеарниот договор на шесте големи сили со Иран, но дека треба да се биде претпазлив поради „дестабилизирачкото однесување“ на Иран во регионот, соопшти во понеделниот нејзиниот портпарол.
„Премиерката јасно даде на знаење дека го поддржуваме договорениот нуклеарен договор. Сега е потребно на соодветен начин да се спроведе, но исто така треба да бидеме претпазливи поради дестабилизирачките активности на Иран во регионот“, изјавил портпаролот на британската премиерка запрашан дали Лондон разгледува нови санкции против Техеран, како што тоа го стори Вашингтон.
Израелскиот премиер Бенјамин Нетанјаху во понеделникот во Лондон ги повика „одговорните земји“ да го следат примерот на САД во барањето да се воведат нови санкции во Иран.
„Иран сака да го уништи Израел, тоа отворено го зборува. Сака да го освои Блискиот исток, ѝ се заканува на Европа, му се заканува на Западот, му се заканува на светот и испраќа провокација по провокација. Затоа го поздравувам инсистирањето на (американскиот претседател Доналд) Трамп за новите санкции за Иран. Другите земји требало да го следат, особено одговорните земји. Сакам да ви говорам за начинот на кој можеме да се погрижиме агресијата на Иран да не мине без одговор“, изјавил Нетанјаху на средбата со британската премиерка.
Американскиот потпретседател Мајк Пенс му советуваше во неделата на Иран да не ја „тестира решителноста“ на САД, кои штотуку усвоија нови мерки кои го санкционираа иранското тестирање на балистички проектили.
„Иран би требало да го погледне календарот и да сфати дека во Овалната соба е нов претседател. И не би требало да ја тестира решителноста на овој нов претседател“, изјави Пенс во разговорот за телевизиската мрежа ABC News.
Американскиот министер за одбрана за Џејмс Матис, исто така, во саботата во јапонската престолнина Токио дека Иран е држава којашто наводно најмногу го поддржува тероризмот.
Иран во понеделникот објави дека неодамнешното пробно лансирање на ракетата не била никаква порака за новиот американски претседател Доналд Трамп, ниту со тоа да го тестираат, како и дека со тоа не е прекршен нуклеарниот договор./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Нетанјаху: Најверојатно го убивме лидерот на Хамас, ќе ја окупираме цела Газа

Израелскиот премиер Бенјамин Нетанјаху изјави дека израелската војска веројатно го убила Мохамед Синвар, де факто лидерот на Хамас во Газа и брат на убиениот лидер Јахја Синвар.
„Елиминиравме десетици илјади терористи“, рече Нетанјаху на својата прва прес-конференција по неколку месеци.
Мохамед Синвар беше цел на израелски воздушни напади минатата недела врз Европската болница во Кан Јунис. Според палестинското Министерство за здравство, во нападот загинале 28 Палестинци, а повеќе од 50 се ранети. Доколку се потврди, неговата смрт ќе биде уште еден во серијата атентати на високи функционери на Хамас, иако Хамас сè уште ја задржува контролата врз Газа.
Мохамед Синвар беше брат на Јахја Синвар, поранешниот лидер на Хамас, кој беше убиен од израелската армија во јужниот дел на Газа во октомври.
Нетанјаху на истата конференција потврди дека новата израелска воена офанзива во Газа нема да престане.
„Нашите сили окупираат се повеќе територии во Газа“, рече тој. „На крајот на операцијата, целиот Појас Газа ќе биде под израелска безбедносна контрола.
Тој рече дека Израел може да се согласи на привремен прекин на огнот, но само ако тоа вклучува ослободување на заложниците. Крајот на војната, според него, е можен само доколку се исполнат клучните услови: демилитаризација на Газа, соборување на Хамас од власт и спроведување на американскиот план за доброволно иселување од Газа.
„Кој и да нè повикува да ја прекинеме војната пред да ги постигнеме тие цели, всушност бара Хамас да остане на власт“, рече Нетанјаху.
Нетанјаху додаде дека постои „целосна координација“ со сегашната американска администрација на Доналд Трамп во врска со иранската нуклеарна програма, додека Вашингтон се обидува да преговара за нов договор со Техеран.
Според него, секој иден договор со Иран мора да вклучува забрана за развој на нуклеарно оружје и крај на збогатувањето ураниум. Си-Ен-Ен во вторникот објави дека американската разузнавачка заедница верува дека Израел подготвува можен напад врз иранските нуклеарни постројки.
„Израел има право да се брани од режим кој се заканува со негово уништување“, заклучи Нетанјаху.
Свет
Трамп прифати авион вреден стотици милиони долари од Катар

Соединетите Американски Држави прифатија луксузен авион дониран од Катар како дел од идната флота „Ер Форс уан“, што предизвика бран критики – дури и меѓу блиските поддржувачи на претседателот, Доналд Трамп.
„Секретарот за одбрана го прифати Боингот 747 од Катар во согласност со сите федерални закони и прописи“, изјави портпаролот на Пентагон, Шон Парнел.
Авионот, кој доаѓа од флотата на катарското кралско семејство, вреди околу 400 милиони долари и ќе мора да претрпи голема модернизација, вклучително и безбедносни надградби, пред да може да се користи за претседателски транспорт.
Белата куќа инсистира дека подарокот е легален, но веста за трансферот на авионот минатата недела предизвика голема политичка полемика.
Подарокот доаѓа во време кога американскиот Устав, во таканаречената клаузула за емолументи, експлицитно им забранува на владините службеници да прифаќаат подароци од странски влади без одобрение од Конгресот – и во овој случај, такво одобрение не се барало ниту било дадено.
Претседателот Трамп тврди дека се е легално бидејќи авионот му бил предаден на Министерството за одбрана, а не на него лично. Тој нагласи и дека нема да го користи авионот по завршувањето на мандатот, туку ќе биде префрлен во неговата претседателска библиотека.
Бранејќи ја одлуката минатата недела, Трамп рече: „Ни даваат подарок“. Тој додаде дека би било „глупаво“ да се одбие авионот.
Авионот сè уште ќе бара години работа и десетици милиони долари инвестиции за да се прилагоди на стандардите потребни за транспорт на американскиот претседател, вклучувајќи безбедносни системи, опрема за комуникација и одбранбени механизми.
Регион
Судот донесе нова пресуда против родителите на Коста Кецмановиќ

Вишиот суд во Белград донесе пресуда со која Миљана и Владимир К., родителите на момчето што го изврши масакрот во училиштето „Владислав Рибникар“, се прогласени за одговорни за нематеријалната штета нанесена на Татјана Стевановиќ, професорката по историја која беше ранета во нападот.
Треба да и платат 6.900.000 динари, односно околу 58.800 евра, заедно со законските камати и трошоците на постапката.
Судот смета дека за штетата одговараат родителите бидејќи настанала како резултат на лошото воспитување и примерот што го дале на нивниот син. Во пресудата е наведено дека го однеле на стрелиште и му дале пристап до оружје, без соодветно обезбедување во куќата. На овој начин, според мислењето на судот, ги занемариле основните родителски обврски и дозволиле развој на опасен интерес за оружје кај малолетно дете.
Судот ги отфрли тврдењата на родителите дека не можеле да предвидат што ќе се случи, нагласувајќи дека момчето било способно да го разбере значењето на неговите постапки и да го контролира своето однесување во моментот на нападот.