Свет
Москва го заобиколи Обама, на преговорите за Сирија го покани тимот на Трамп
Русија го повикала тимот на новоизбраниот американски претседател Доналд Трамп на мировните преговори за Сирија кои на 23-ти јануари ќе се одржат во казахстанската престолнина Астана, под нејзино и покровителство на Турција и Иран, заобиколувајќи ја всушност администрацијата на Барак Обама на заминување, објави во петокот вечерта The Washington Post.
Според изворите на весникот, поканата била упатена преку рускиот амбасадор во САД, Сергеј Кислјак, во текот на телефонскиот разговор со советникот на Доналд Трамп за национална безбедност, Мајкл Флин.
Истовремено соговорник на The Washington Post рекол дека во текот на телефонскиот разговор не била донесена дефинитивна одлука.
Претходно американскиот Стејт департмент, кој до свеченото преземање на должноста на 20-ти јануари од страна на Трамп, уште го води администрацијата на Демократската партија, изјави дека во Вашингтон уше не добиле никаква официјална покана за средбата посветена на Сирија во Астна, но се во постојна контакт за оваа иницијатива со Турција и со Русија, но дека на републиканската администрација ѝ препорачуваат да учествува на нив, доколку им се даде можност.
Идниот портпарол на Белата куќа, Шон Спејсер го потврди во петокот за медиумите телефонскиот разговор меѓу Флин и Килсјак, но рече дека се зборувало за „подготовка на телефонски разговор меѓу рускиот претседател (Владимир Путин) и избраниот претседател (Доналд Трамп) по неговото официјално преземање на должност“.
Преговорите во Астана треба да се одржат на 23-ти јануари, кој е и првиот работен ден за администрацијата на Трамп. Средбата во Астана треба да биде вовед во меѓусириските преговори кои во Женева на 8-ми февруари ќе се одржат под покровителство на Обединетите нации./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Макрон ја поздрави пресудата на Врховниот суд против царините на Трамп
Францускиот претседател, Емануел Макрон, ја поздрави одлуката на американскиот Врховен суд да ги поништи царините што претседателот на САД, Доналд Трамп, ги воведе минатата година, нагласувајќи дека е добро да има контрола и рамнотежа во владеењето на правото и демократијата.
„Не е лошо да постои Врховен суд и владеење на правото во демократијата“, рече Макрон и додаде дека Франција ќе ги разгледа последиците од глобалните царини од 10 отсто што Трамп ги воведе синоќа, пренесува Ројтерс.
Доналд Трамп, пак, порача дека САД не планираат да им враќаат пари на компаниите по поништените царини и ги критикуваше судиите кои гласаа за укинување на мерките, нарекувајќи ги „нелојални“ и потенцијално под влијание на странски интереси. Тој исто така најави и отворање на истраги за заштита на САД од некоректни трговски практики на други земји и компании.
Свет
Трамп не планира да им враќа пари на компаниите поради укинувањето на царините
Американскиот претседател, Доналд Трамп, изјави дека САД не планираат да им враќаат пари на компаниите, откако Врховниот суд ги поништи царините што тој ги воведе минатата година за низа странски земји.
На конференцијата за новинари во Белата куќа, Трамп рече дека неговиот тим не предвидува поврат на средства и додаде дека верува оти случаите ќе завршат на суд во следните неколку години.
„Напишаа ужасна, погрешна одлука, скоро како да не ја напишале паметни луѓе. На крај ќе бидеме на суд наредните пет години“, рече Трамп.
Судот со шест гласа за и три против одлучи дека Трамп ги надминал своите овластувања кога го искористил Законот за вонредни федерални состојби од 1977 година (IEEPA) за воведување реципрочни глобални царини.
Американските увозници кои минатата година плаќале царини можеби ќе побараат поврат на средства од Агенцијата за царини и гранична заштита, што би можело да чини милијарди долари, иако дел од трошоците можеби веќе ги префрлиле на потрошувачите.
Трамп, исто така, предупреди дека земјите кои, според него, лошо постапувале кон САД ќе „платат цена за тоа“, додека оние кои биле „добри кон Америка“ ќе бидат „многу добро третирани“.
Без да даде конкретни докази, Трамп повтори дека странски интереси влијаеле на одлуката на Врховниот суд да ги укине царините.
„Мислам дека странските интереси ги претставуваат луѓе со големо влијание. Тие имаат големо влијание на Врховниот суд, дали преку страв, почит или пријателства, не знам. Но, ги познавам некои од луѓето од другата страна и не ми се допаѓаат. Мислам дека се вистински ѓаволи“, заклучи Трамп.
Свет
Трамп потпиша указ за нови царини од 10 проценти на глобално ниво
Американскиот претседател Доналд Трамп соопшти дека потпишал указ за воведување глобални царини од 10 проценти за сите земји, кои, како што наведе, ќе стапат во сила речиси веднаш. Одлуката доаѓа откако Врховниот суд на САД поништи дел од царините што тој ги воведе минатата година за голем број држави.
Тој остро ги критикуваше судиите кои гласаа за укинување на претходните мерки, оценувајќи дека нивната одлука била „погрешна“ и најави дека администрацијата ќе преземе дополнителни чекори за да обезбеди, како што рече, поголеми приходи од царините.
На прес-конференција во Белата куќа, Трамп најави дека новите мерки ќе бидат донесени согласно член 122, кој му овозможува на претседателот привремено да воведе дополнителни давачки на увоз во случај на сериозни нерамнотежи во платниот биланс.
Најави и покренување истраги и други механизми, со цел, како што посочи, заштита на американската економија од нефер трговски практики. Според Трамп, одлуката на Врховниот суд не ги укинува царините како инструмент, туку се однесува само на одредена правна основа за нивна примена.

