Свет
На разговорот меѓу Трамп и Зеленски присуствувал и Помпео

Американскиот весник „Њујорк тајмс“ дознава дека на разговорот помеѓу претседателот Доналд Трамп и украинскиот претседател Зеленски, на 25 јули, присуствувал и државниот секретар Мајк Помпео, со што скандалот расте и не оди во прилог на Трамп. Во телефонскиот разговор, Трамп бара услуга од Зеленски, да започне истрага против поранешниот потпретседател Џо Бајден.
Демократите сега го обвинуваат Помпео за молчење, „иако знаел дека се работи за противправен акт и загрозување на националната безбедност“. Помпео е повикан да сведочи пред одбор во Претставничкиот дом, и до петок тој треба да потврди дали тој ќе биде еден од сведоците во истрагата на Конгресот за импичмент на Трамп. Во материјалите од свиркачот кој го откри скандалот се споменува и името на Курт Волкер, американски претставник за Украина кој веќе си даде оставка и во треба да сведочи в четврток.
Во меѓувреме, Мич Меконел, лидер на републиканското мнозинство во Сенатот изјави дека доколку долниот дом на Конгресот изгласа отповикување на претседателот, законот наложува Сенатот да свика судење за импичмент, кое ќе биде претседавано од врховен судија на Уставниот суд.
Денеска, некои американски медиуми објавија и дека администрацијата на Трамп барала помош од уште една странска сила во однос на руската вмешаност во изборите и истрагата на специјалниот советник Роберт Малер. Се дозна дека државниот обвинител Вилијам Бар неколку пати побарал службите на Австралија да истражуваат за истрагата на Милер.
Демократите сега и од него бараат да си даде неотповиклива оставка поради наведување странска сила да се меша во политичките процеси на САД.
Конгресната Комисија за разузнавање го повика на сведочење и личниот адвокат на Трамп, Руди Џулијани, кој е во центарот на скандалот и за кого се смета дека е инспираторот на идејата да се бараат компромитирачки материјали за семејството Бајден во Украина. Џулијани е постојано во дослух со претседателот и работи во својство на негов советник, иако нема функција во Администрацијата.
Поранешниот потпретседател Бајден, еден од најверојатните демократи кои се борат за номинација претседателски кандидат, е голем политички противник на претседателот.
Истакнати републикански стратези и политичари денеска повикаа дистанцирање на Републиканската партија од Трамп и да се побара неискомпромитиран кандидат за претседател на изборите во 2020 година “бидејќи ако Трамп биде отповикан ќе изгуби секаков кредибилитет да ја води партијата на избори“.
Резултати на анкета на телевизијата „Си-Би-Ес“ објавени денеска укажуваат дека Американците се поделени во однос на прашањето за импичмент – повеќе од 47 проценти одобруваат отповикување на претседателот Трамп, додека 47 проценти се против. Бројот на оние што се за сега е поголем од минатата недела кога само 37 проценти одобрувале импичмент.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Фицо разговараше со Мерц: Предлогот за суспендирање на испораката на руски гас е идеолошки и штетен

Словачкиот премиер Роберт Фицо разговараше по телефон со германскиот канцелар Фридрих Мерц за рускиот гас и антируските санкции и го пофали конструктивниот пристап на Европската комисија (ЕК) кон резервите на Словачка во врска со предложеното суспендирање на увозот на гас од Русија од 2028 година, но истакна дека предлогот за суспендирање на испораката на руски гас е „идеолошки“ и „штетен“.
„Верувам дека предлогот на ЕК за суспендирање на испораката на руски гас е идеолошки и штетен за целата ЕУ, а особено за Словачка, која по децении транзит на руски гас е на крајот од цевката без гас и директен пристап до терминали за течен гас. Овој предлог од ЕК, чие усвојување бара само квалификувано мнозинство, дополнително ќе ја оштети конкурентноста на целата ЕУ и ќе доведе до зголемување на цените на гасот за словачките домаќинства и индустријата“, истакна Фицо.
Фицо додаде дека доколку Словачка нема доволно гаранции за минимизирање и надоместување на штетата предизвикана од предлогот на ЕК за запирање на протокот на руски гас, ќе побара одложување на гласањето за 18-от пакет антируски санкции, за што е потребна согласност од сите земји-членки на ЕУ, пренесува TASR.
Регион
Мајка им давала на децата желе бомбони направени од канабис: уапсена 29-годишна жена во Грција

Полицијата во Ираклион, на грчкиот остров Крит, уапсила 29-годишна жена за која постои сомнение дека им дала на своите деца, на возраст од 14 и 10 години, препарати со канабис во форма на желе бомбони.
По консумирањето, децата се чувствувале лошо и биле префрлени во Универзитетската болница во Ираклион, каде што биле хоспитализирани на детското одделение, објавува грчкиот весник „Катимерини“.
Директорот на болницата, Јоргос Халкиадакис, изјавил дека нивната здравствена состојба е добра.
Жената, која работи во хотел, наводно изјавила дека пронашла желе бомбони во хотелскиот простор и, мислејќи дека се обични слатки, им ги дала на децата.
Предметот на истрагата го води Пододделот за сузбивање и истрага на кривични дела во Ираклион.
Се очекува резултатите од истрагата да фрлат повеќе светлина врз тоа дали мајката ја кажувала вистината, а доколку е така, да откријат како бонбоните стигнале до хотелот и дали имало некакви пропусти во безбедносните процедури.
Свет
ЕУ лансира нова платформа за вработување работници надвор од Унијата

Базата на таленти на Европската Унија (ЕУ), платформа за вработување што ги здружува работодавачите со седиште во ЕУ и граѓаните на земјите што не се членки, влезе во понатамошни преговори со европските законодавци, објави денес истражувачкиот центар во Брисел „Институт Егмонт“.
Платформата, која колоквијално се нарекува Тиндер за баратели на работа, алудирајќи на популарната апликација за запознавање и поврзување на луѓе, се преплетува со неколку други иницијативи на ЕУ, што ја зголемуваат конкурентноста на земјата преку пазарот на трудот, според написите на медиумите во регионот.
Базата на таленти беше претставена како дел од Пакетот за мобилност на вештини и таленти и треба да им помогне на работодавачите да ги пополнат празните работни места, како и да го решат недостатокот на работни места во секторот, и да им помогне на граѓаните од земјите што не се членки на ЕУ да најдат работа на стандардизиран и предвидлив начин во земјите-членки на Унијата.
Работодавачите во ЕУ, тврдат дека имаат тешкотии во наоѓањето кандидати, особено во малите и средните претпријатија, а околу 74 проценти од нив изјавиле дека во моментов се соочуваат со недостаток на квалификувани работници на барем една позиција во нивната компанија.
Земји како Белгија, Италија и Холандија имаат проблем со вработувањето долго време, а тој се дуплираше во последните пет години.