Свет
Палестински жени обвинуваат за сексуално малтретирање во израелските затвори
Дена Карми (41), Палестинка која поминала 16 месеци во израелски затвор, раскажува потресна приказна за сексуалното малтретирање со која се соочила зад решетките. Нејзиното тело сè уште трепери додека раскажува за испрашувања во текот на ноќите од машки израелски разузнавачи. Во секој момент таа била понижувана и носена поблиску до крајно сексуално малтретирање, пишува „Анадолија“.
Карми била уапсена во јули 2018 година во нејзината куќа во Хеброн и осудена на казна затвор од 16 месеци за наводно учество во социјални активности поврзани со Хамас во Хеброн заедно со уште шест други жени. Нејзиниот сопруг Нашат бил убиен во 2010 година од израелската армија.
„Вербалното сексуално малтретирање е дел од организирана политика на понижување и тортура врз сите палестински притвореници, особено врз жените и децата“, вели Сахар Франсис, директор на „Адамир“, група за човекови права и за поддршка на затвореници.
Таа вели дека израелските власти го направиле сексуалното вознемирување алатка за вршење притисок врз затворениците, особено на испрашувањата.
Друга палестинска затвореничка во раните 30-ти вели дека била подложена на сексуално вознемирување во возилото за пренесување затвореници меѓу Рамалах и Ерусалим.
„Еден од еврејските криминалци, кој седеше спроти мене, почна сексуално да ме навредува. Бев шокирана и тропнав врз металниот кафез агресивно барајќи помош. Но, никој не одговори на моите апели. Еврејскиот затвореник ги соблече пантолоните и правеше одвратни сексуални движења што не сум во можност да ги опишам“, вели таа инсистирајќи на анонимност.
Таа вели дека ниту еден офицер од единицата „Нахшон“, одговорна за пренесување на затворениците, не ѝ помогнал или не спречил еврејскиот криминалец да ја малтретира. Таа посочи дека криминалецот продолжил да ја малтретира повеќе од два часа.
„Плачев, се молев и го молев Бог да ми помогне“, додаде таа.
Тасним Џубран, психотерапевт и професионалец за ментално здравје, вели дека повеќето палестински затвореници избегнуваат да зборуваат за такви искуства поради страв од стигма имајќи предвид дека локалната култура го третира сексот како срам.
„Сексуалното вознемирување се смета за траума, што доведува до долгорочно физичко и психолошко нарушување во односот на жртвата со самата себе и со околината. Тоа влијае и на сексуалното здравје на жртвата ако таа нема психотерапија по ослободувањето“, вели Џубран.
Активистката на „Адемир“, Франсис, вели дека израелскиот правосуден систем не ги сфаќа сериозно поплаките поврзани со сексуално вознемирување.
„Ние документиравме и поднесовме многу жалби до израелските судови и до ОН. Но, досега нема ефективен одговор“, рече таа.
Во 2015 година „Адамир“ поднесе жалба против неколку полицајки кои физички малтретирале палестинска затвореничка подложувајќи ја на претрес до гола кожа.
„Полицијата ги испита, но не беше поведено обвинение. Ова беше единствениот случај кога полицијата делумно реагира“, додаде Франсис.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Трамп вели дека Украина не изразила никаква благодарност за напорите на САД
Американскиот претседател Доналд Трамп денеска изјави дека Украина не изразила никаква благодарност за напорите на САД.
-„Лидерството“ на Украина изрази нулта благодарност за нашите напори, а Европа продолжува да купува нафта од Русија. САД продолжуваат да продаваат огромни количини оружје на НАТО, за дистрибуција во Украина (измамникот Џо даде сè, бесплатно, вклучително и „големи“ пари), напиша Трамп на платформата „Truth social“.
Тој ја даде изјавата додека високи функционери од САД, Украина и советниците за национална безбедност на Франција, Велика Британија и Германија разговараат за нацрт-планот на САД за завршување на војната во Украина во Женева.
-Војната меѓу Русија и Украина е насилна и ужасна војна која, со силно и вистинско американско и украинско лидерство, никогаш немаше да се случи. Започна долго пред да го земам мојот втор мандат, за време на администрацијата на заспаниот Џо Бајден, и само се влоши, рече Трамп.
„Доколку претседателските избори во 2020 година не беа наместени и украдени, немаше да има војна меѓу Украина и Русија…Наследив војна што никогаш не требаше да се случи, војна што е губитничка за сите, особено за милионите луѓе што толку непотребно загинаа, заклучи Трамп.
Свет
Зеленски: Мировниот план на САД може да вклучува елементи од клучно значење за Украина
Предлогот на САД за запирање на војната во Украина може да вклучува делови што се засноваат на украинските перспективи и се од клучно значење за украинските национални интереси, изјави денеска претседателот на земјата, Володимир Зеленски.
„Веќе имаме кратка информација од членовите на делегацијата за резултатите од првиот состанок и првите преговори“, напиша Зеленски на „Х“ за разговорите со ЕУ и САД во Женева.
-Работата продолжува за постигнување на главната цел што ја очекува нашиот народ: да се стави крај на крвопролевањето и војната, додаде тој.
Во исто време, американскиот претседател Доналд Трамп изјави дека украинските власти не изразиле никаква благодарност за напорите на САД по ова прашање, а Европа продолжува да купува нафта од Русија.
Свет
Фон дер Лајен: ЕУ мора да игра централна улога во обезбедувањето мир во Украина
Претседателката на Европската комисија (ЕК), Урсула фон дер Лајен, денеска изјави дека ЕУ мора да игра „централна улога“ во обезбедувањето мир во Украина и дека ова е еден од главните елементи за „праведен и траен мир и суверенитет на Украина“.
Делегација од Украина, европски безбедносни претставници и американска делегација предводена од државниот секретар Марко Рубио денеска се среќаваат во Женева за да разговараат за неодамна протечениот предлог на САД за прекин на војната во Украина.
Во соопштение објавено на веб-страницата на ЕК, фон дер Лајен изјави дека одржливиот мировен план, покрај запирањето на војната, не смее „да сее семе на иден конфликт“.
Таа додаде дека „границите не можат да се менуваат со сила“ и го отфрли ограничувањето на персоналот во украинската армија, што е една од точките на протечениот мировен план.
-Не може да има ограничувања на украинските вооружени сили што би ја направиле земјата ранлива на идни напади и со тоа би ја поткопале европската безбедност, се вели во соопштението.
Фон дер Лајен изјави дека „Украина мора да има слобода и суверено право да ја избере својата судбина“ и дека избрала „европска судбина“, додавајќи дека ЕУ ќе продолжи да работи со Украина, коалицијата на земји што ја поддржуваат Украина и САД за да се постигне „вистински напредок кон мирот“.
Таа изјави дека „клучен елемент“ на мировниот договор мора да биде и „враќањето на секое украинско дете киднапирано од Русија“.

