Австрија ќе го укине ветото за прием на Романија и Бугарија во полноправно членство во Шенген зоната за слободно движење, соопшти денеска австриското Министерство за внатрешни работи.

Потегот на Австрија го отвора патот министрите за внатрешни работи на Европската унија да го одобрат потегот на состанокот во четврток, пренесува Ројтерс.

Министерот за внатрешни работи Герхард Карнер наведува дека Австрија смета дека сега е време за понатамошни чекори во процесот на проширување на Шенген зоната и дека за ова прашање ќе се разговара на следниот состанок на Советот на ЕУ за правда и внатрешни работи.

Претседателот на Украина, Володимир Зеленски денеска оцени дека режимот на сирискиот претседател Башар ал Асад паднал бидејќи сите руски војници се префрлени во Украина, каде, како што рече, има речиси 800.000 и го повтори повикот за помош од западните партнери.

„Зошто ни е потребна помош и доверба од нашите партнери? Затоа што гледаме што е Украина и каква е војната во Украина. Гледаме дека режимот на Асад падна затоа што таму нема навистина моќни руски војници. Да бидеме искрени, сите беа префрлени во Украина. Речиси 800.000 руски војници се на територијата на Украина и тоа укажува дека армијата на оваа псевдо-империја се бори против украинскиот народ“, рече Зеленски на средбата во Киев со премиерот од Естонија, Кристен Михал, пренесе Укринформ.

Тој истакна дека земјите треба да разберат дека силата на Украина зависи од тоа дали армијата во Русија е силна и додаде дека „целиот успех на светот лежи во обединувањето околу Украина“.

Претседателот на Белорусија Александар Лукашенко помилува 29 лица кои, како што се наведува, извршиле екстремистички злосторства, соопшти денеска неговиот кабинет.

„Сите тие се покајале за својата постапка и испратиле барање до претседателот на државата за помилување. Се работи за 11 жени и 18 мажи“, се наведува во соопштението, пренесува агенцијата Белта.

Според извештаите, меѓу нив има шест лица помлади од 25 години, тројца пензионери, двајца инвалиди и 15 хронични пациенти.