Португалските власти соопштија дека новиот вид на коронавирус, делта сојот, е одговорен за големото зголемување на бројот на заразени лица во регионот на Лисабон.

Националниот институт за здравство соопшти дека многу заразниот индиски вид опфаќа 60 проценти од новите случаи во Лисабон.

Поради неодамнешното зголемување на бројот на заразени, властите минатата недела ги забранија сите патувања во Лисабон и надвор од главниот град за време на викендот.

Оваа мерка стапи на сила во петокот и ќе трае до утре наутро.

Лисабон има околу 2,8 милиони жители.

Полицијата во повеќе германски градови синоќа прекина забави на отворено, при што дошло до судири меѓу полицијата и насобраните.

Во градскиот парк во Хамбург, полицијата по полноќ прекинала забава на која се собрале повеќе од 7.000 луѓе.

Според полициското соопштение, забавата започнала мирно, а во текот на вечерта имало сѐ повеќе конфликти меѓу насобраните и употреба на забранети пиротехнички средства.

Во Аугсбург, Баварија, полицијата во центарот на градот интервенирала по полноќ и прекинала забава на која имало околу 1.400 луѓе.

На другиот крај од градот околу 250 лица блокирале мост, по што интервенирала полицијата. Некои од собраните фрлале шишиња и други предмети кон полицијата, а неколку полицајци биле повредени.

Во судирите била нападната и Брза помош, по што еден од напаѓачите бил уапсен.

Во повеќето делови на Германија забрането е собирање на повеќе од 250 лица на отворено.

Во Велика Британија во последните 24 часа се потврдени 9.284 нови случаи на коронавирус, а шест лица починаа.

Иако бројот на нови случаи е помал во споредба со последните неколку дена, трендот на ширење на вирусот предизвикан од делта-вирусот, првпат откриен во Индија, продолжи во Велика Британија во последните недели.

За време на викендот се одвива масовна кампања за вакцинација во Лондон. Владата работи на забрзување на утврдената програма за вакцинација за да се ограничи ширењето и влијанието на делта варијантатата на вирусот.