Свет
Протести во Колумбија поради убиство во полициска станица – 10 загинати и над 400 повредени
Во дводневните протести во Колумбија, што избувнаа поради смртта на маж во полициски притвор, загинаа 10 луѓе, а над 400 се повредени.
Насилството што ја потресе Богота по смртта на Хавиер Ордонез продолжи и втора ноќ по ред, со помали протести и судири со полицијата.
Министерството за одбрана соопшти дека 10 луѓе се убиени, а 209 цивили и 194 полицајци се повредени. Уништени се десетици автобуси, вклучително и 13 запалени. За време на немирите оштетени се и голем број полициски станици.
Министерот за одбрана, Карлос Холмес, упати извинување во име на полицијата за какви било незаконски активности направени за време на притворот на Ордонез.
Тој рекол дека е наредено дисциплинско сослушување за да се утврди дали полицајците извршиле убиство и злоупотреба на својата положба. Главното обвинителство ќе утврдува дали ќе биде поднесена кривична пријава.
За време на истрагата седум полицајци се суспендирани.
Протестите во Колумбија избувнаа кога на социјалните мрежи беше објавено видео на кое беше прикажано како полициски службеници повеќепати употребиле електрошок врз Хавиер Ордонез (46), татко на две деца, кој подоцна починал во болница.
Инцидентот предизвика бес поради прекумерната употреба на сила во полицијата. Се случува истовремено со масовните протести поради расната дискриминација и полициското малтретирање на Афроамериканците во САД.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
(Фото) Женско тело пронајдено во замрзнувач во Србија, се трага по нејзиниот партнер
43-годишниот Далибор Демировиќ ја убил својата 36-годишна партнерка Катарина Глигоријевиќ во селото Печењевце во близина на Лесковац во јужна Србија, ноќта од понеделник кон вторник.
Вишото јавно обвинителство во Лесковац соопшти дека осомничениот за убиството е во бегство. Телото на жртвата е пронајдено вчера во замрзнувач.
Демираовиќ носел електронска нараквица бидејќи бил осуден на домашен притвор за спречување на службено лице во вршење на службена должност. Тој нападнал полицаец фрлајќи ограда од тераса кон него. Се претпоставува дека по убиството, ја извадил електронската нараквица и со црвен автомобил се одвезол во непознат правец, пишува српски Телеграф.

Соседите за српските медиуми изјавиле дека односот меѓу Демировиќ и Глигоријевиќ бил исклучително проблематичен. „Тие биле во токсична врска изминатата година. Таа одеше и доаѓаше кај него. Имаа многу турбулентна врска“, рекле мештаните.
Непотврдените информации сугерираат дека немало очигледни повреди на телото на жртвата, па затоа се сомнева дека се задушила. Телото наводно го пронашол синот на убиецот од неговиот прв брак, кој потоа го известил братот на убиецот, кој ја повикал полицијата.
Полицијата започнала интензивна потрага, во која се вклучени и бројни мештани. Мајката и таткото на убиецот се во куќата на убиецот, а полицијата ги чува бидејќи, како што велат, се плашат дека би можеле да бидат следната цел на нивниот син.
Европа
(Видео) Пресретната подморница што превезувала повеќе од 1,7 тони кокаин, пловела кон Европа
Четири лица се уапсени откако португалските власти пресретнаа подморница за дрога што превезувала повеќе од 1,7 тони кокаин во средниот Атлантик. Полуподморницата се движела кон Пиринејскиот полуостров и била запленета во последните денови, потврдија официјални лица.
Објавени се и снимки на кои се гледа како полицијата и морнарицата го опкружуваат бродот пред да се качат на него, да ја запленат дрогата и да го апсат четиричлениот екипаж, за кои се вели дека се од Јужна Америка.
🚨Tal como lo advertí
🇻🇪Ahora el cartel de los soles dirige toda su carga hacia europa
🇵🇹Portugal intercepta narcosubmarino con 1,7 toneladas de cocaína y detiene a cuatro tipulantes venezolanos
— YO SOY 🇻🇪🇺🇸✈️ (@ElGanadorHenry) November 4, 2025
Центарот за поморска анализа и операции со седиште во Лисабон добил информации дека криминална организација се подготвува да испрати подморница натоварена со кокаин во Европа.
Неколку дена подоцна, португалски брод успешно ја лоцираше подморницата на приближно 1.000 наутички милји (1852 км) од брегот на Лисабон, во операција поддржана од Националната агенција за криминал на Велика Британија и Администрацијата за борба против дрога на САД.

Осомничените – двајца Еквадорци, еден Венецуелец и еден Колумбиец – беа притворени откако беа изведени пред суд. Витор Ананијас, шеф на португалската полициска единица за борба против дрога, рече дека нивните различни националности покажуваат дека организацијата што стои зад нив не е со седиште само во една земја.
Регион
Силен земјотрес во Грција, почувствуван и во Бугарија: „На 5-ти кат сме, се тресевме околу 10 секунди“
Земјотрес со магнитуда од 4,7 степени според Рихтеровата скала ја погоди Грција во 8:16 часот наутро, а беше почувствуван и во Бугарија.
Според достапните податоци, епицентарот на земјотресот се наоѓал на 12 километри западно од Ксанти во Грција.
Хипоцентарот на земјотресот, според податоците на Европско-медитеранскиот сеизмолошки центар, се наоѓа на длабочина од приближно 7 километри под површината на земјата.
Земјотресот беше добро почувствуван во Кавала, а граѓаните на Пловдив и другите бугарски градови исто така велат дека го почувствувале потресот.
„На 5-ти кат сме, добро се тресевме околу 10 секунди“, „Навистина се почувствува кај нас“, „Во Софија сме, почувствувавме мало тресење на земјата“, сведочеа жителите на бројни градови во Бугарија.
Грците велат дека го почувствувале земјотресот и на островот Тасос.
„Се тресеше во Лименарија“, „Кавала, се тресеше добро“, сведочат луѓе.
Досега нема извештаи за материјална штета или повредени, а надлежните служби ја следат ситуацијата.

