Рускиот претседател Владимир Путин изјави дека не може да гарантира оти опозицискиот лидер Алексеј Навални ќе излезе жив од затвор. Тој исто така негира дека нарачал обид за атентат врз Навални.

На прашањето дали може да гарантира дека Навални ќе излезе жив од затвор, Путин рече дека не зависи од него.

„Видете, ваквите одлуки во оваа земја не ги носи претседателот. Нема да се однесуваат кон него полошо од кој било друг“, рече Путин.

Рускиот претседател уште еднаш негира вмешаност во нападот врз Навални.

„Немаме ваква навика да убиваме во кое било време“, нагласи тој и исто така негира дека Москва стои зад неодамнешниот сајбер-напад врз американската компанија „Солар виндс“ и мешањето во американските избори во 2020 година.

„Ние сме обвинети за разни работи. Мешање во избори, сајбер-напади и така натаму. И ниту еднаш, ниту еднаш и ниту еднаш не се потрудија да дадат доказ. Тоа, едноставно, се неосновани обвинувања“, истакна Путин.

Тој оцени дека руско-американските односи „паднале на најниската точка во последните години“, но дека тој и Бајден ќе може да работат заедно на прашања од заеднички интерес, како што е контролата на оружјето. Путин неодамна рече дека Бајден е „кариерен политичар“, а неговиот претходник Доналд Трамп го опиша како „живописна личност“.

Изјавите на Путин дадени во интервју за „Ен-би-си њуз“ се нова провокација на рускиот лидер пред утрешниот самит со американскиот колега Џо Бајден. Двајцата лидери утре ќе се сретнат во Женева во услови на ескалација на тензиите во врска со сајбер-нападот на Кремљ и мешање во изборите во САД, а Бајден се очекува да го отвори прашањето за Навални.

Вчера, Бајден процени дека ќе биде трагедија доколку Навални умре во затвор.

„Тоа само би им наштетило на неговите односи со остатокот од светот и со мене“, рече тој на конференцијата во Брисел по самитот на НАТО осврнувајќи се на Путин.