Европа
Путин постави шест услови за почеток на преговори за завршување на војната

Рускиот претседател Владимир Путин во разговор со турскиот претседател Реџеп Таип Ердоган изнел неколку услови за постигнување договор со Украина за прекин на огнот, изјави портпаролот на Ердоган, Ибрахим Калин во интервју за турскиот весник Хуриет, пренесува Си-Ен-Ен.
„Турскиот претседател понуди да ги донесе Путин и украинскиот претседател Володимир Зеленски во Турција за да ги олесни преговорите за завршување на војната. Додека Зеленски беше подготвен за средбата, Путин покрена прашања кои треба да се решат пред какви било преговори“, објаснил Калин.
„Првата е неутралноста на Украина, односно откажувањето од членството во НАТО. Второ, разоружување и меѓусебни безбедносни гаранции во контекст на австрискиот модел. Трето, процес кој руската страна го нарекува „денацификација“. Четврто, отстранување на пречките за широката употреба на рускиот јазик во Украина. Разбирливо е дека е постигнат одреден напредок во преговорите досега. Рано е да се каже дека има комплетен договор или дека договорот е блиску до потпишување“, изјавил Калин во интервјуто.
Додал дека Путин поставил уште две барања кои се особено важни, а тоа се признавањето на анексијата на Крим и двете т.н. „Републики“ во Донбас. Калин кажал дека овие две последни прашања „не се прифатливи барања за Украина и меѓународната заедница“.
„Доколку се постигне договор за првите четири точки, може да има дискусија за петтата и шестата“, рекол Калин, додавајќи дека преговорите потоа може да доведат до договор и крај на војната.
Според Калин, Ердоган повикал на трајно примирје и ги понудил Истанбул и Анкара како места каде би можеле да се сретнат рускиот и украинскиот претседател.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
УНИЦЕФ: Потрошувачката на богатите ја уништува животната средина во светот

Доколку целиот свет троши ресурси според стапката на најбогатите земји, ќе ни требаат повеќе од три земји, се вели во извештајот на УНИЦЕФ објавен во вторникот.
Детскиот фонд на Обединетите нации го спореди глобалното влијание врз животната средина на 39 членки на Европската Унија и Организацијата за економска соработка и развој, пренесува Хина.
Изложеноста на штетни загадувачи, потрошувачката на ресурси, отстранувањето на е-отпадот и националниот придонес во климатската криза се меѓу индикаторите опфатени со студијата.
Шпанија, Ирска и Португалија се на врвот на скалата бидејќи на своите деца им нудат добра животна средина и имаат релативно низок придонес за глобалните еколошки проблеми.
Од друга страна, Австралија, Белгија и Канада се меѓу најбогатите земји во светот, за кои се вели дека имаат големо влијание врз глобалната средина, а со тоа и врз децата ширум светот, како и децата во тие земји.
„Не само што повеќето богати земји не успеваат да обезбедат здрава животна средина за децата во нивните граници, туку придонесуваат и за уништување на животната средина на децата во другите делови на светот“, рече Гунила Олсон, директорка на Канцеларијата за истражување на УНИЦЕФ „Иноченти“.
„Во некои случаи, гледаме земји кои обезбедуваат релативно здрава животна средина за децата дома, но се меѓу најголемите загадувачи кои ја уништуваат животната средина во странство“, додаде таа.
Австралија, Белгија, Канада или САД не обезбедуваат здрави услови за децата кои живеат во нивната област, додека помалку богатите земји во Латинска Америка и Европа прават помала штета на општата состојба на планетата, покажа истражувањето.
Во 39 набљудувани земји, повеќе од 20 милиони деца имаат високо ниво на олово во крвта, се вели во извештајот.
Иако Финска, Исланд и Норвешка се во првите редови во обезбедувањето здрава средина за сопственото потомство, од друга страна, тие се на последното место според влијанието на планетата во вид на емисии, количината на електронски отпад и нивоата на потрошувачка.
Во Исланд, Латвија, Португалија и Обединетото Кралство, секое петто дете е изложено на влага и мувла дома, а во Кипар, Унгарија и Турција, повеќе од едно од четири деца.
Многу деца вдишуваат отровен воздух внатре и надвор, особено во Мексико, за разлика од Финска и Јапонија, се вели во извештајот.
Во Белгија, Израел, Холандија, Полска, Чешка и Швајцарија, постои можност повеќе од секое дванаесетто дете да биде изложено на високо ниво на загадување поврзано со пестициди, се вели во извештајот.
Европа
Лавров: Русија ќе размисли дали да ги обнови односите со Западот

Рускиот министер за надворешни работи Сергеј Лавров изјави дека Русија ќе размисли дали треба да ги обнови односите со Западот, бидејќи е убеден дека Москва мора да добие нешто ново во форма на обновени односи.
„Западот прво мора да прифати дека Русија постои. Не исчезна и убеден сум дека секоја година ќе биде се посилна. Кога Западот ќе понуди нешто ново во форма на обновување на односите, тогаш Русија ќе размислува за се“, рече Лавров, според светските агенции.
Зборувајќи за санкциите со кои се соочува Русија, Лавров посочи дека земјата мора итно да научи да биде независна од Западот.
„Мораме да се потпреме на себе, но и на оние земји кои во овој момент се покажаа како храбри и кои не танцуваат како што играат другите. Сега кога Западот стана диктатор, нашите економски врски, на пример со Кина, ќе станат посилни. А таа врска само ќе расте“, изјавил Лавров, пренесува Ројтерс.
Европа
СЗО за мајмунските сипаници: Нема да биде потребна масовна вакцинација

Од Светската здравствена организација осврнувајќи се на проблемот со мајмунски сипаници во неколку земји, наведуваат дека не веруваат дека епидемијата на мајмунски сипаници надвор од Африка ќе бара масовна вакцинација бидејќи мерките како што се добра хигиена и безбедно сексуално однесување ќе помогнат да се контролира ширењето, пренесуваат медиумите.
Ричард Пебоди, кој го води тимот на СЗО за патогени со висока закана за Европа, за Ројтерс изјавил дека сегашните залихи на вакцини и антивирусни лекови се релативно ограничени.
Неговите коментари следеа откога американскиот Центар за контрола и превенција на болести соопшти дека се во процес на пуштање на некои дози од вакцината „Џиннеос“ за употреба во случаи на мајмунски сипаници.
Германската влада рече дека ги проценува опциите за вакцинација, додека ОК веќе има понудено вакцини на некои здравствени работници, анализираат медиумите.
Според нив, јавните здравствени власти во Европа и Северна Америка истражуваат повеќе од 100 сомнителни и потврдени случаи на вирусната инфекција.
Примарни мерки за контрола на епидемијата се следење на контакт и изолација, рече Пебоди, истакнувајќи дека не се работи за вирус кој лесно се шири, ниту пак досега предизвикал сериозно заболување. Вакцините што се користат за борба против мајмунски сипаници може да имаат некои значајни несакани ефекти, додал тој, според Ројтерс.
Не е јасно што ја предизвикало појавата, а научниците се обидуваат да го разберат потеклото на случаите и дали нешто се променило во врска со вирусот. Нема докази дека вирусот мутирал, соопшти агенцијата на ОН претходно оваа недела.
Многу од заразените, но не сите на кои им е дијагностицирана актуелната епидемија на мајмунски сипаници биле мажи кои имале секс со мажи, покажале анализите според агенциите.
Повеќето од потврдените случаи не биле поврзани со патување во Африка, што укажува на тоа дека може да има многу неоткриени случаи, кажал Пебоди.
„Значи, го гледаме само врвот на ледениот брег“, рекол тој.
Со оглед на темпото на избувнувањето и неизвесноста за тоа што ја води, постои загриженост дека големите настани и забави ова лето би можеле да ги влошат работите, оценил тој.
„Не им велам на луѓето да не се забавуваат и да одат на разни настани, важно е што прават луѓето на забавите. Значи, станува збор за безбедно сексуално однесување, добра хигиена, редовно миење раце, сите овие работи ќе помогнат да се ограничи преносот на овој вирус“, изјавил Пибоди, пишува Ројтерс.